Prime part.
Incuadrament de cuistion e esemplis
Une des funzions principâls des leçs dal om e je chê di regolâ la convivence fra sogjets diviers. Chest al ven fat sedi pe nestre specie, cuant che in bal a son individuis, popui, stâts, impresis, associazions e vie indevant, sedi pe convivence fra la nestre specie, chei altris vivents e lis lôr comunitâts (in sens slargjât).
◆ In chest periodi storic, là che i cambiaments dal ambient e dal clime (e ce che chest al puarte cun se) a son deventâts une vore evidents, ancje cui che nol è a contat diret cun chestis problematichis, par esempli par motîfs lavoratîfs o parcè che al vîf in contescj ambientâi ancjemò avonde naturâi – là che al pues viodi a clâr lis consecuencis puartadis dai cambiaments – si è inacuart che “al è alc che nol va”. Par chest, interessâsi al ambient al è deventât une mode o un “must”, cemût che a disin chei plui inmaneâts propit cu lis modis.
◆ Chest si è rifletût ancje su la legjislazion, pocade di stimui rivâts di grups di personis, moviments e lobbies.
Al è di un pâr di agns indaûr la modifiche dal articul 9 de Costituzion taliane che e à fissât la tutele dal ambient, de biodiversitât e dai ecosistemis. Duncje, inte cjarte costituzionâl, che e je la principâl font dal dirit de republiche, la difese di ambient, biodiversitât e ecosistemis e je deventade une des fondis di cjalâ par produsi leçs e ats aministratîfs.
◆ Politics e aministradôrs publics di cualsisedi nivel, saborant il stât di anim de int, si declarin ducj a pro de protezion dal ambient e dai vivents e si jemplin la bocje (cemût che a àn ripuartât plui voltis intai diviers articui dal autôr publicâts su la Patrie) di peraulis che pe plui part no san nancje ce che a vuelin dî, tant che ecosisteme, resilience, sostignibilitât e, in diviers câs, lis doprin ancje inmacantlis, creant locuzions e frasis dispès cence sens.
◆ Duncje, se legjislatôrs, tantis associazions, moviments e buine part de int a àn cheste “propension positive” pal mont naturâl, o podìn stâ sigûrs che la normative lu tuteli e che e favorissi la convivence di chês altris speciis cul om e la permanence di un ecosisteme funzionâl e ben struturât ancje pes gjenerazions di oms e di altris vivents che a vignaran dopo da nestre.
Fasìn cumò cualchi esempli pratic di ce che a previodin chest pôc di positîf e la legjislazion consecuente.
◆ Metìn câs che cualchi motociclist al vebi trasformât intun so “cjamp di adestrament” un prât cuntune o plui pocis là che si riprodusin speciis animâls protetis (par es. anfibis) e che, vie pai siei alenaments, al vebi fracaiât individuis di chês speciis. Cui che al è incargât ae vigjilance al à di viodilu intal moment che al fracaie l’animâl, rivâ a fermâlu e a stabilî che la azion e sedi stade fate di pueste. Intal câs che si rivi a fâ dut chest, al colpevul i ven dade une sanzion aministrative di pôcs euros par individui copât; bisugne però tignî iniment che stabilî il numar di chescj al è une vore dificil parcè che, magari cussì no, al è dificil podê contestâ un fat viodût cun speciis che magari a son grandis pôcs centimetris e che a vivin dentri di un ambient naturâl. Cun di plui, ancje se i individuis a fossin di speciis di interès pe Union Europeane, che e previôt par lôr une protezion rigorose, il paiament al sarès, ancje se dopli, simpri di pôcs euros.
◆ Intal câs che a chest motociclist i vegni tal cjâf di passâ indevant e indaûr suntune poce (cuntun compuartament riferibil a chel dai fruts e che l’autôr al à podût verificâ plui voltis) e che le distruzin o comprometin, se la poce e je fûr di areis tuteladis (duncje inte plui part dal teritori), in pratiche al ven contestât alc dome se la distruzion e pues compuartâ une menace par dute la specie protezude che, par esempli, si riprodûs li dentri, e simpri tal câs che chê specie e sedi une di chês di interès pe Union Europeane (se no si torne a colâ tal câs ripuartât parsore).
◆ Al è evident che, intai esemplis fats, al è cuasi impussibil rivâ a intervignî par evitâ un dam ancje in presince di speciis paradis in maniere fuarte di bande de Union Europeane.
Cun cheste sorte di legjislazion, se une persone e cjape sù individuis di une specie protete che si pues mangjâ, par esempli crots, e ju vent, ancje se e ven cjapade sul fat, jessint la sanzion une vore basse e la probabilitât di jessi becâts dome une volte ogni tant une vore grande, il vuadagn al è simpri plui grant, e duncje cui che al fâs azions di cheste fate sigûr nol ven scoragjât a fâlis.
◆ Ancje in chest câs al è evident che no si pues rivâ a fermâ il dam.
Si podarès continuâ cun considerazions di cheste fate, ma puartìn cumò la atenzion suntun altri fenomen che al tocje la cuistion di un altri pont di viste.
A esistin intervents che par leç a son calcolâts di “publiche utilitât”, improrogabii e urgjents – tant che lis centrâls idroeletrichis – cussì l’“animalut” (cemût a clamin i animâi la plui part des personis lontanis dal mont naturâl) che al varès di jessi protet “si pues metilu in secont plan”, in graciis dai beneficis rivâts de realizazion dai implants idroeletrics. In tancj câs, chestis voris a son convenientis dal pont di viste economic par cui che lis propon, dispès privâts, dome graciis a incentîfs stabilîts ancje lôr par leç.
◆ Altris intervents calcolâts urgjents a son chei che a colin inte suaze de cussì clamade protezion civîl, là che intune logjiche di emergjence al è permetût passâ sore di un insiemi di fats, e chest al devente une cundizion che e limite la pussibilitât di fâ intervents integrâts, par esempli chei pal slizeriment dal impat des oparis.
I prins câs ripuartâts a mostrin la inutilitât evidente di regulis che no coventin pe funzion che a son stadis scritis.
◆ I ultins doi câs a mostrin la finalitât vere, che no je sigûr chê conservative, ancje se i intervents puartâts indenant a son fats passâ par “amîs” dal ambient, cuant che magari, ancje se calcolâts urgjents, a durin un timp esagjerât.
In ducj i câs il dam al è une vore incisîf. ❚
[La seconde part e sarà publicade sul numar di Març]
