SECONDE part
Leçs di setôr che no tutelin habitats e speciis
Se si àn di tutelâ i habitats e lis speciis, cemût mai lis leçs di setôr no lu fasino? Parcè che la lôr finalitât reâl no je chê di protezi, ma chê di permeti che si puedi fâ, realizâ e costruî oparis, intune otiche di sfrutament dal ambient a ducj i nivei, sedi chel calcolât ricreatîf (par es. il motociclisim), che chel dai afârs (par es. lis centrâls idroeletrichis). Al impuarte pôc se chest al è la cause de muart di altris vivents e de distruzion, modifiche, incuinament e v.i. dai habitats, cun consecuencis diretis e indiretis ancje sul om.
◆ Cun di plui, in chest setôr si è in presince di leçs che a difindin il plui fuart, soredut cuant che il plui debil nol pues difindisi. O fevelìn di chei altris vivents e dai ambients dulà che a vivin, che no àn la capacitât di ribelâsi a ce che ur fâs l’om, almancul in maniere direte.
◆ Un dai fatôrs che a contribuissin a cheste situazion e je la ignorance e la insensibilitât che cheste e puarte cun se. Personis che no cognossin la Nature e lis sôs regulis no puedin fâ leçs justis pe sô conservazion e par chê dal om. Chest fatôr nol permet di fâ capî la gravitât dal dam che si cause intun contest naturâl, e di proviodi une schirie di intervents che, integrantsi un cun chel altri, a rivin a diminuî l’impat des azions permetudis.
◆ Par jessi clârs: leçs che tai fats no si puedin meti in vore e/o che a puartin par cui che lis “subìs” un dam plui lizêr di chel che za nol rispiete, a son scritis o di personis dal dut cence competence inte materie o di chês cun interès particolârs. Al sarès interessant fâ un resonament tirant in bal l’om, par viodi se al fos acetât che, tal câs di une muart no provocade in maniere volontarie, al colpevul no i fos contestât nuie o, ancjemò, tal câs di volontarietât intun omicidi, viodi il “presit” che al sarès calcolât par ogni vite umane, e duncje la sanzion che e vignarès dade al sassin. Resonant cussì, forsit, si rivarès a capî cun plui precision cun ce che si à a ce fâ. Se o aplicassin al om ce che o vin viodût intai esemplis di prin, si podarès distruzi par divertiment paîs, citâts e, in gjenerâl, insediaments umans – cun dentri lis personis – parcè che chest, al è evident, nol puartarès menacis par dute la specie, ven a stai ae umanitât tal so complès.
◆ Stabilî che intervents cuntun impat fuart sul ecosisteme e sul om a sedin di “utilitât publiche” al è alc di irazionâl, soredut se a vegnin dâts incentîfs par realizâju.
Ancje l’interès di fâ simpri lis robis in “emergjence”, cemût che dispès nus ven contât, al à un obietîf une vore precîs: podê fâ intervents grancj cun pôc control, che a permetin di movi bêçs là che i va ben a cualchidun (v. La Patrie dal Friûl di Jugn dal 2022).
◆ Dopo al è dibant meti dentri ambient, biodiversitât e ecosistemis tai principis fondamentâi de Republiche, dome par che i politics a puedin dî di vêlu fat e par che i ambientaliscj si puedin svantâ des azions fatis a sostegn di dut chest, se dopo chest no si invere tai fats. Cun di plui, il fat di vê zontât il rispiet pe vite di chei altris vivents e, in fin dai conts, de Nature e dal om stes, dome doi agns indaûr intune Costituzion che, stant dai talians, e je fra chês plui, se no la plui avanzade dal mont, e spie trope considerazion che si à pe vite, che e je la fonde di dut il rest.
◆ Chest mût di fâ al met simpri plui in dificoltât l’ecosisteme. Inte situazion che e je vuê su la Tiere, là che si zuie ancje su la sorevivence de nestre specie, no si pues plui permeti a cui che nol cognòs la materie e a individuis cun interès personâi o di part, di scrivi leçs che intes intenzions declaradis a coventin par protezi, ma che inte realtât a coventin par podê fâ di dut. Sì, parcè ciertis normis a metin in moviment mecanisims là che i intervents permetûts a incidin in maniere pesante sul ambient, dut par podê dopo clamâ dongje altris intervents par comedâ i dams che chê stesse normative e àn permetût di fâ.
Di chest, la necessitât che lis leçs a sedin scritis di int competente inte materie tratade, e che si adatin di corse ai cambiaments che a capitin tal mont naturâl.
Cui che al scrîf lis leçs al à di jessi responsabil des consecuencis te stesse maniere di cui che al decît la “utilitât publiche” o la “urgjence” di une opare o di un intervent.
◆ Al è clâr che intune societât come la nestre, là che robis di pôc cont a son metudis devant di chês che a àn un impat reâl su di nô e su cui che al vignarà dopo di nô, al è dificil che si rivi a fâ cambiâ il mût di resonâ prin di intervents “spetacolârs” – stant al valôr che i ven dât ai “spetacui”, simpri plui impuartants de Nature, par esempli dutis chês manifestazions permetudis in areis naturâls, magari sot tutele. Chest al condane l’om a vê a ce fâ cun simpri plui problemis ambientâi.
◆ Tignint in considerazion i diviers aspiets soredits, cuant che cui che al à la funzion legjislative al organize o al da il patrocini par cors, cunvignis, incuintris e via disint par promovi lis “buinis pratichis” par fâ ativitâts in Nature o par mostrâ la sô sensibilitât sui problemis ambientâi, bisugne simpri impensâsi che, fin tant che no si fasin azions concretis, a son dutis dome peraulis di propagande, cun di plui paiade cui bêçs di ducj.
◆ Un concet fondamentâl che al pues judâ il cambiament intal svicinâsi in maniere juste a dute la cuistion, al è chest: lis leçs umanis, che a son convenzions, no àn di lâ cuintri di chês de Nature, se no si vûl vê problemis simpri plui grancj che, cul lâ dal timp, a deventaran cence soluzion. Di fat, cuant che un al pense di podê fâ ce che al vûl cence consecuencis, ancje in barbe aes leçs, chest al pues jessi fat cuintri dal om ma no cuintri de Nature, parcè che ducj a fasin part di jê, e a jê no si scjampe. Duncje, par lâ inte direzion juste, al covente che l’om al capîsi che nol è dome lui su la Tiere.
◆ Par ultin, se une leç e je pôc plui che un esercizi leterari, e devente un intric che nol covente plui a nuie di pratic, ma dome a fâ dam. E il dam nol pues jessi paiât di ducj, ma dome di cui che lu à provocât.
In cheste zone, timp indaûr, a jerin sîts doprâts di diviersis speciis di faune par riprodusisi, che cuntune metodiche divierse si saressin podûts salvâ. ❚
