Veso mai cjatât sul cjast o intun scansel une vecje letare di un dai vuestris nonos? Vêso mai provât a leile cjatant dentri cussì tancj elements in comun cul dì di vuê che e somee scrite îr? Une sensazion compagne si à leint lis “Letaris ai furlans” di pre Bepo Marchet, scritis su “La Patrie dal Friûl” fra il 1949 e il 1950. A jerin agns là che la pulsion fuarte bande de autonomie e jere daûr cuietâsi e il predi inteletuâl di Glemone al voleve invezit sburtâ i furlans a no pierdi la lôr identitât e a cjapâ in man il lôr destin.
◆ Par chest al veve sielt di fevelâur traviers di une schirie di letaris indreçadis a interlocutôrs imagjinaris, cjapant a model lis letaris che Sant Pauli al scriveve aes primis comunitâts cristianis folpeadis e talpassadis des persecuzions, par che si tignissin dongje e par che a fossin buinis di tignî bot e no pierdi i lôr valôrs. Par pre Bepo, i furlans di chei agns a vevin la stesse necessitât: resisti ae italianizazion sfuarçade che cun dôs vueris e vincj agns di ditature e veve ridusût la int di chenti a une fantasime di ce che e jere.
◆ Il messaç di chê volte al sune atuâl ancje in dì di vuê: i furlans che a cirin di resisti ae omologazion a son pardabon pôcs, ma a esistin e a resistin, e ur covente ispirazion. Un di lôr, un zovin studiôs furlan di valôr, Davide Turello, al à lavorât suntune edizion dal test curade e comentade di lui cun grande atenzion ai aspiets linguistics e lessicâi e la “Patrie” e à volût proponii al Comun di Glemone (lûc di divignince di Pre Bepo) di metisi adun par publicâle intun progjet culturâl di valôr. In cheste maniere, cul contribût de ARLeF e cu la colaborazion de Comunitât di Mont di Glemone e dal Comun di Dartigne, cuntun biel lavôr di scuadre, si è rivâts al obietîf finâl: cumò Marchet al torne di gnûf a scrivinus, a fevelânus, a dânus fuarce e sperance. Ancje parcè che, se un si met a lei lis sôs peraulis, a somein scritis îr, e no 75 agns indaûr.
◆ Il Friûl di vuê al sta cetant miôr di chel jessût di dôs vueris, al è mancul puar, ma la sô anime e je malade, salacor di plui di cuant che la societât di chenti e viveve inte miserie. Coventaraial tornâ puars par tornâ a scuvierzi i valôrs di une identitât vierte ma sclete come chê che al proponeve di conservâ pre Bepo? I furlans no rivino a jessi siôrs cence dismenteâsi di jessi furlans? I popui che no son bogns di scoltâ i lôr profetis, a van a distudâ la lum de lôr storie.
◆ Dispès, si dopre come scuse che il lengaç dai profetis al è vecjo, e no si capìs. In gracie dal lavôr di Turello, che al vîf e al lavore inte universitât a Bamberghe, in Gjermanie, cumò lis “Letaris” di pre Bepo si puedin lei in grafie uficiâl e, cuntun glossari une vore precîs, ogni tiermin che il timp nus puarte a doprâ di mancul al ven spiegât pardabon. No son plui scusis: cumò, al dipent di nô scoltâ la vôs di Marchet come se al fos il nono che nus scrîf pal nestri ben, e nus consee pal miôr. ❚