La leç di stabilitât 2018 dal Stât (leç dai 27 di Dicembar dal 2017, n. 205) e previôt la istituzion di un sisteme struturât a nivel nazionâl par rinfuarçâ e par razionalizâ la azion intai setôrs de meteorologjie e de climatologjie, potenziant la competitivitât taliane e la strategjie nazionâl in materie, in plui che par sigurâ la rapresentance unitarie intes organizazions internazionâls di setôr. Par chest, a vegnin istituîts un Comitât di direzion pe meteorologjie e pe climatologjie, componût di tredis esperts dal setôr, siet di nomine statâl e sîs regjonâl, e la Agjenzie nazionâl pe meteorologjie e climatologjie, clamade ItaliaMeteo, cun funzions e compits cognossitîfs, tecnics sientifics e di responsabilitât operative intal cjamp de meteorologjie e de climatologjie. Si trate di compits che a integnin la prevision e il monitorament meteorologjic e meteo marin, la informazion ae popolazion, lis ativitâts di ricercje e disvilup aplicadis intal cjamp des previsions globâls e a aree limitade, la realizazion, il disvilup e la gjestion di rêts di misure, i prodots e servizis climatics. In chest dissen, la gnove leç e rimet al Comitât di direzion i podês di direzion e di vigjilance su ItaliaMeteo, formulant lis liniis vuide strategjichis, e cun di plui la predisposizion dal Statût, che al individuarà i orghins e la dotazion organiche.
Di resint, la Conference des Regjons e des Provinciis autonomis e à indicât i nons dai sîs esperts che i spietave a jê di segnalâ; fra di lôr, si cjate ancje il diretôr dal Osservatori meteorologjic regjonâl Osmer de Arpa Friûl-Vignesie Julie, Stefano Micheletti.
(r.p.)