O scomencìn cheste gnove anade cu lis parabulis di pre Antoni Beline.
La sô fantasie e la sôs creativitât lis viodìn ancje in chescj cuadruts. Al so voli no i scjampave nuie, il vê rumiât di un continui la Bibie i permeteve di cjalâ dut cuntun voli di fede. A imitazion di Jesù, ogni fat, esperience al deventave figure dal Ream di Diu. Un Ream che nol è lontan, che al rivarà ae fin di dut, ma che al è za presint framieç di nô (Mc 1,15).
A son piçui scrits inedits.
pre Roman Michelot
–––
Une dì o ai stentât che mai a dî messe. Mi domandavi ce che o stevi a fâ alì, cui bancs vueits e cuatri vecjutis che a pendolavin. Savint che la disperazion e je une tentazion, o ai fat ce che o soi solit fâ in chei moments: saltâ fûr. E cussì mi soi cjatât vie pe campagne, bessôl cui miei pinsîrs.
Biel cjaminant, o soi rivât denant di un cjasâl dirocât, dut fodrât di urtiis e di baraçs. Desolazion e muart di taiâlis cul curtìs. Ma no jere ni desolazion ni muart, parcè che, dal cûr dal baraçâr, al vignive fûr un cjant cussì melodiôs, cussì vîf, cussì fantasiôs che mi veve lassât instupidît. Al jere un scriç che al berghelave la sô gole di vivi.
Mi soi dit, dut mortificât: «Viôt tu ce uciel che o soi! Mi tocje propit vignî a scuele di un uciel par imparâ a vivi!».
Parcè che chel scriç, che nol veve nissun fastidi a cjantâ framieç des maseriis ancje se nissun no lu sintive, al jere cetant plui dongje di me dal Ream di Diu.
pre Antoni Beline