L’esempli al è tant clâr che no coventin coments.
pre Roman Michelot
Mi à capitât plui voltis di lâ a cjaminâ pai cjamps, in stagjons e moments diferents. E la stesse robe e à cûr di cambiâ se al cambie il voli che le cjale o il contest che e ven cjalade.
Chê altre dì, alçant i voi dal libri che o stavi leint, o ai viodude di lontan la glesie di Pocec. O jeri passât di dì sepi Diu tropis voltis, ma no le vevi mai viodude; soredut, no le vevi mai viodude cussì nete, come stampade tal cîl e cussì grande.
La reson le ai cjatade a colp. Chês altris voltis si jere te colme dal Istât, cuant che arbui e cjarandis e cisis a jemplin dut il mont cul lôr vert e no si rive a viodi nuie di là dal fis de frint. In plui, a son lis rosis dai prâts e lis vôs de int e il cjant dal uciei che ti cjapin dut e ti distrain.
Invezit, tal cûr dal Invier, cuant che no ‘nd è frint ni rosis ni int, il voli al è plui libar e il cûr mancul cjapât, e ciertis robis si viodilis miôr e di lontan.
Salacor Diu al à disponût che la glesie di Pocec e dutis lis glesiis dal mont si podès viodilis miôr te puaretât esteriôr, cuant che si sint il frêt fûr e dentri di nô. In chel moment la glesie e je grande, e je clare, e je sigure, e tu le sintis come che i poleçs a devin sintî la clocje.
Vino di preâ alore che al sedi simpri Invier, che il mont al sedi simpri spueât de sô bielece par jessi plui libars tal cjalâ la glesie e lis robis di Diu?
O disarès di no, soredut pal fat che ancje il vert e lis rosis e i uciei e la int a son mandâts di Diu e a son in cualchi maniere za une glesie. Duncje a van preseâts e gjoldûts, come dut ce che al è biel e bon in chest mont.
Domandìn dome che, cuant che al ven frêt ator di nô e il mont no nus dîs plui nuie, o podìn vê la fortune di viodi la cjase di Diu, magari di lontan, e la gracie di metisi a cjaminâ viers di jê. Za cul movisi si sclipissisi e, se si rive, si à sigurât il cjalt dal cuarp e da la anime.
Par chel o dîs che il ream di Diu al è come la glesie di Pocec: si le viôt in dut il so sflandôr cuant che ator al è pôc sflandôr. ❚
pre Antoni Beline