✽✽ Lis considerazions di Alessandro Zannier che o cjatais intes prossimis pagjinis a son une lûs di sperance intun moment, tant che chel dal dì di vuê, che no ’nd à tantis. Lis sôs considerazions su la situazion de mont furlane a meretin une leture atente no dome pes problematichis frontadis, ma parcè che si met devant di chestis cuntune impostazion divierse, cuntune disposizion che e sune sfide vierte al pessimisim che al stramonte, o piês ancjemò ae rassegnazion.
✽✽ No je la solite disanime dai mâi che a aflizin lis Tieris Altis che o cognossìn ben, e che in maniere puntuâl si manifestin partint di chei cronics: par esempli dispopolament, mancjance di servizis, colegaments carents. No, Zannier al introdûs cierts elements di valutazion che a puedin disledrosâ il nestri mût di cjalâ la realtât de mont e furnî oportunitâts gnovis di intervent.
✽✽ Se o cjalais ben, al è il mût di procedi dal pinsîr autonomist che al evite percors precostituîts, ma che si concentre invezit su ce che al covente pardabon pal ben de comunitât che si sint di jessi espression. Piçule digression personâl: se e je stade la leture di “Indenant”, libri de nestre golaine editoriâl “La machine dal timp” a sburtâ l’amì Zannier a scrivi lis sôs considerazions, al vûl dî tant par nô de Patrie e pal lavôr che o fasìn pal Friûl.
✽✽ La impuartance dal intervent che o publichìn e consist intal marcâ no dome chês che o podìn definî lis “obietivitâts” che un teritori al patìs, ma al evidence lis consecuencis, l’impat, sul plan che o olsarès definî psicologjic: al met devant dai voi, de cussience di ognidun, cuâi che a son e cemût che si palesin i sintoms di une indiference aromai difondude che e puarte a une acetazion di un “status quo”, calcolât ineludibil e par tancj di lôr fintremai avantazôs. Al scrîf, di fat: “O sin daûr, magari cussì no, a pierdi chel concet dut furlan di operâ simpri e di lâ indenant a fâlu come se la vite no ves mai fin, chel volê plantâ un arbul savint benon che magari no si cjaparan sù lis pomis”. Però, al va indevant, “E reste la valutazion che in cualchi deceni no rivarìn a cancelâ i valôrs fats sù in almancul doi milenis”.
✽✽ Ve la clamade sotintindude a une resistence che o condividìn ancje nô, invidant a no lassâle colâ intal vueit, anzit contribuint ognidun cu lis sôs opinions al dibatiment su chestis pagjinis, in viste forsit di un incuintri tra cui che al pense che al sedi pussibil ancjemò fâ, costruî, agregâ.
✽✽ Par chei, insume, che a metin sù i “Scarpets” e che no si insumiin di clamâju “Scarpetti”. ❚