Lis urnis di Fevrâr e di Avrîl: pocje fortune pal Friûl

Nol covente par sigûr jessi drâcs par visâsi che lis elezions dai 24 e 25 di Fevrâr si son lassadis daûr une situazion imberdeade: ducj si son inacuarts che la int e à pandût intes urnis la sô volontât di rignuvî il panorame politic. E la voie di parâ vie i sorestants de Seconde Republiche e à sburtât un numar une vore penç di eletôrs, ancje furlans, a sielzi la propueste di Beppe Grillo e dal Moviment des Cinc Stelis, prin partît ae Cjamare dai Deputâts. La afermazion di cheste formazion e je la uniche sigurece jessude des cabinis eletorâls: pal rest la Italie no à dât al centri-çampe di Bersani chê maiorance che e covente a dâ un guvier salt al Stât. Chest parcè che oltri a Grillo ancje Berlusconi, che pur al à metût il cjavut fûr de tane dome tai ultims doi mês di campagne eletorâl, al à rivât a convinci un tierç dai eletôrs talians a dâi credit. Grande delusion invezit pal president dal consei Mario Monti: la stime de int viers dal “tecnic” no je coventade a tirâ dongje plui dal 10 par cent dai consens. Il sucès di Grillo al è stât cussì penç che i croniscj a doprin il tiermin “tsunami”: peraule che e pant il savoltament dal tradizionâl bipolarisim che cheste fuarce politiche e à puartât, soredut se si cjale ai risultâts dai zovins dai 18 ai 25 agns. A Udin, juste par fâ un esempli, il 52 par cent di lôr al à votât 5 Stelis: e in 61 comuns de provincie i grilins a àn vût la maiorance tes urnis. La rapresentance politiche furlane dut câs e à assegnât 11 parlamentârs su 18 al centri-çampe: di chescj dome cinc a son i furlans, Gianna Malisani, Paolo Coppola e Serena Pellegrino di Udin ae Cjamare e Isabella De Monte di Pontebe e Carlo Pegorer di Tavagnà al Senât. E dome la De Monte e fevele par furlan. Altris furlans elets a son il grilin Walter Rizzetto di Tresesin e il montian Gian Luigi Gigli di Udin. Nissune olme di Friûl si cjate plui te Leghe (l’unic parlamentâr, Massimiliano Fedriga, al è di Triest dulà che il partît al è ridot al 3 par cent), e ancje Manuela di Centa dal Pdl e je restade fûr dal Parlament. La campione cjargnele e fasarà ricors, ma ore che e sepi se al vignarà acetât, e riscje di viodi prin tornâ il Paîs a votâ di gnûf: e sarà chê di fat la uniche soluzion se a la svelte no si cjatarà une soluzion che e dedi governabilitât al sisteme.
In spiete che la Italie si dedi un guvier, achì di nô, cence nancje un moment di polse, si torne a scomençâ cuntune altre campagne eletorâl, anzit trê. Parcè che chê pes regjonâls si zontarà a chê pes aministrativis di Udin e – par no fâsi mancjâ nuie – ancje cu lis elezions pe Provincie. E in ducj chescj câs, la situazion no je definide e si scugnarà spietâ fin tal ultim par savê l’esit des urnis. Cui che al pensave a un duel pe Regjon jenfri Renzo Tondo e Debora Serracchiani di fat al varà di ricrodisi. Lis indicazions a nivel regjonâl dai consens di Grillo a imponin cumò di considerâ pe presidence de Regjon ancje la alternative di Saverio Galluccio dal Moviment 5 Stelis: pôc cognossût ma sburtât dal “tsunami”, al podarès jessi un fastidi pes dôs coalizions plui grandis, soredut se i eletôrs a tignaran cont de storie des spesis rimborsadis ai conseîrs regjonâi cui nestris bêçs. Un brut episodi che al à mostrât come a son jentradis ad implen ancje in Friûl la disinvolture e la facilonerie tal impleiâ i fonts publics. E nol è biel scuvierzi che i stes politics furlans che a àn criticât lis straçariis di int come Lusi o Fiorito cumò si rivelin come lôr.
La Serracchiani e Tondo a àn spesseât a dî che a vuelin listis netis e cence nissune magle etiche a sporcjâlis. Intun moment di grande atenzion de opinion publiche pe cuistion morâl nol sarà possibil lâ cuintri il principi de fedine penâl nete. Ma il dam che i plui grancj partîts, dal Pdl ae Leghe, dal Pdl al Udc, a podaressin vê di cheste vicende al è dut câs grandonon. I sfuarçs di meti a puest la imagjin dai partîts daspò che i lôr rapresentants si son lassâts cjapâ la man des spesis matis a podaressin jessi masse tardîfs rispiet ae percezion di tante int che e je stufe di scandui e robariis, e justementri e cove dentri la rabie di cui che al paie la crisi intant che altris a van a gnocis.
Viodarìn se chescj episodis di male politiche a sburtaran i eletôrs a sielzi la proteste o – stufs di lâ a votâ ogni moment – se a restaran a cjase refudant di dâ fiducie a une o a chê altre liste che a varan di rapresentânus a Triest o a Udin. La int aes politichis e je lade a votâ: al è stât, al è vêr, un câl di afluence dal 5 par cent, ma si pensave di viodi i eletôrs scjampâ des urnis e invezit la nestre comunitât e à tignût bot. La sperance e je che ancje a Avrîl ognidun al ledi a pandi lis sôs ideis e segnant chest o chel o chel altri simbul su la schede, ancje parcè che in Regjon e in Comun si pues ancje sielzi i conseîrs cuntune preference e dal sigûr i furlans a sielzaran il miôr a disposizion. Purtrop, par une sielte legjitime, ancje cheste volte i autonomiscj furlans no rivaran a candidâsi unîts sot di une propueste politiche fuarte intal interès de nestre tiere. No nus al à ordenât il miedi di vê il cûr, la passion e la fuarce par puartâ indevant une idee di autonomie che e rivi a esprimisi fintremai su la schede eletorâl. Ma al è un particolâr no di pôc che forsit la disafezion viers de politiche e je peade ancje al pôc leam che lis fuarcis politichis talianis (Grillo comprendût) a àn cul lôr teritori.
Fin a pôcs agns indaûr la politiche furlaniste e jere di atualitât ancje tes coalizions plui grandis: no covente lâ ai timps di aur dal Moviment Friûl, ma bastarès torna indaûr di cualchi an ai timps di Sergio Cecotti e Marzio Strassoldo. Invezit cumò, ancje se il teme de Autonomie al è un dai plui ricorents ta cheste campagne eletorâl, a Rome se o fevelìn dai nestris interès, par devant magari nus disin di sì ma par daûr nus cjolin vie. Al sarès un dovê imbastî une propueste fuarte, parcè che al è dibant lamentâsi se no si rive a valorizâ fuarte cui fats e cu lis sieltis concretis la uniche arme che fin cumò nus lassin chei altris, ven a stâi la specialitât che e à juste juste finît 50 agns. Une arme cussì fuarte che fin cumò no le à copade nissun. Ma se no le doprìn, e no le doprìn ben, al è il pericul che o le copedin noaltris, e pal Friûl al sarès pardabon un suicidi.
Lu à capît ancje Grillo che altris voltis al veve coionât il Friul e la lenghe furlane, ma prin dal so comizi in Place Venerio al à vude une “iluminazion furlaniste” saludant su twitter i siei fans cuntun elocuent “Mandi Udin”. Ma intant che lui si convertive ae marilenghe, Tondo al colave intune espression pôc elegante su la tutele dal furlan che par sigûr i puartarà fortune eletorâl a Triest, ma che no ten cont dal fat che la maiorance des fameis di chenti e à sielzût in libertât che ai lôr fîs ur sedi insegnade cheste lenghe. Su chescj temis la Serracchiani di resint e à declarât la impuartance de difese dal patrimoni linguistic ancje se al zire inmò su Youtube un so video dulà che lontan dal Friûl e fâs une cierte antipatiche ironie su la lenghe furlane, e par cumò tal centri-çampe l’unic che i è vignût tal cjâf di difindi in maniere clare la lenghe furlane al è stât Furio Honsell: ancje se la sô aministrazion no somee vê vût masse determinazion in chest argoment, tal moment de polemiche il sindic al à cjapât part a pro dal furlan, fasint une scomesse su la identitât furlane di Udin. Al è cuasi un paradòs dut câs che intun moment dulà che ducj si jemplin la bocje di autonomie, a son pardabon pôcs chei che a mostrin di no considerâ l’investiment su la lenghe furlane pôc plui che une matetât.
Par sigûr nol è di spietâsi grancj investiments in tiermins di identitât de candidature triestine di Franco Bandelli di “Un’Altra Regione”, ancje se il Front Furlan e altris siglis autonomistis a son orientadis a poiâ il so progjet. E nancje se in Regjon al ves di presentâsi di bessôl il partît di Monti a saressin masse sperancis di une azion decise a pro de lenghe furlane. Par capîlu baste dî che in cheste formazion politiche al à cjase il plui grant nemì de tutele de marilenghe, il neosenatôr Maran. Il furlan a voli nol varà duncje un avignî masse florit: e al conven che noaltris che o volìn ben a cheste lenghe si metedin il cûr in pâs. Cence vê masse Grîs tal cjâf.
✒ Walter Tomada