La lidrîs romane? Doprade par dumiesteâ un miscliç di tantis identitâts diferentis
“C ividât no je uno vilo, ma uno ponto di citât”, a cjantavin i vecjos cramârs che a vignivin jù de Cjargne e che a restavin incantesemâts devant de sô bielece. Che al volarès dî: “nol è un paîs, ma bielzà une piçule citât”. E in efiets e pues svantâsi di jessi considerade la capitâl des valadis dal Nadison, chel labirint straordenari là che nature, storie, culture, art, antropologjie e lenghis si son cjatadis a strenzi un grop misteriôs e bielonon, ancjemò dut di scuvierzi e di capî.
◆ Ancjemò vuê la statue di Iulius Caesar, su la place devant dal domo, e je stade metude par ricuardâ a ducj che la sô origjin e je dome latine, romane, e duncje e condivît la lidrîs di chê “porche Italie” – come che al cjantave Giorgio Ferigo – che e veve sglonfade chê ete dome par visâ che un tic plui in là al tacave un confin impuartant, definitîf parcè che gjenetic e morâl prime che politic, zontant chel “Forum Iulii”. O ben, il non che Rome e veve imponût a chel incjampament di soldâts deventât “Civitas”, e duncje marcjât, che al varès tignût a batisim dute une Regjon. La nestre!
◆ Semper fidelis, duncje. Atenzion: nissun si pues insumiâ di scancelâle, dal sigûr, chê storie li, e al mancjarès altri. Dome i cjapemoscjis a cirin di dismenteâsi de veretât. Ma bisugne pûr contâ che cualchidun le à doprade par dumiesteâ cheste tiere nassude par jessi dificile di omologâ, un miscliç di tantis identitâts diferentis che insiemi a fasin la Slavie furlane, o come che le clame la int di chenti, la “Benecìe”. E invezit la man dal gjenerâl roman e pâr che e invidi ancjemò lis sôs legjons a sburtâ inlà dut ce che nol jentre in cheste proiezion latinocentriche delirante. Propit come la liende dai soldâts bravonons che a vignivin arolâts di chestis bandis, e che a saressin stâts tra i plui ardimentôs, leâi, ubidients “fanti di sua maestà Vittorio Emanuele III di Savoia” vie pe prime vuere mondiâl.
◆ Sigûr: bisugnave fâur gloti ce che al jere capitât tal doman di chel 1866, cuant che “il Regno” al è rivât fin ca sù, scjafoiant lenghe e culture identitarie, sedi chê furlane che chê slovene, stiçant la resistence di une glesie che, al contrari, in forme clandestine, e continuave a soflâ su lis boris cence mai pensâ di rindisi e di pleâsi al gnûf paron.
◆ Sarà forsit par chest che, sù par ca, “resistence” e somee jessi la peraule plui doprade. Si resist al dispopolament, magari inventantsi formis gnovis di art, di musiche, di teatri che ogni an a clamin tante int di dut il mont. Soredut zovins – ma no dome! – che a pretindin simpri di plui une ufierte culturâl che e sedi ae altece dai lôr siums. E chi le cjatin, in lûcs che no àn bisugne de marche di Mittelfest (ben passût di contribûts) par fâ sunâ lis cuardis de creativitât. Tiere barbariche plui che no latine, langobarde ancje tal profîl dai crets che il Nadison al à sgarfât e mastiât intai secui, spieli di chê maravee che nus lasse a bocje vierte cuant che o cjalìn il vert de sô aghe dal alt, miscliç di colôrs che a àn alc dal cîl e alc de tiere. Come che ogni frontiere nus insegne, lis storiis a rivin fin achì di lontan. In plui di cualchi canoniche des valadis si puedin cjatâ messâi antîcs scrits par glagolitic, l’alfabet inventât di Ciril e Metodi intal munistîr bizantin di Polychron, par insegnâ il Vanzeli a chei popui che si sparniçavin de Macedonie insù, par ducj i Balcans, la Dalmazie, la Boemie, la Moravie, la Polonie e la planure infinide de Russie.
◆ Al sarà ancje par chest che al Imperadôr Carli IV, che al veve sielzût di stabilî la sô sente a Praghe parcè che al cjalave plui bande Orient che no bande Rome, i plaseve tant Cividât, pensant che e fos une piçule Praghe in tiere patriarcjâl. Chê biele Vergjine nere, che e je su la spice di Madone di Mont, e à la stesse muse des iconis che a pandin sapience e lusôr intes grotis di piere sul mont Sinai. No esist famee furlane, nancje la plui anarchiche, radicâl, anticlericâl e atee, che no vedi in cualchi scansel di cjase la medaiute sante, concuistade dopo vê fate la strade a pît, de rive sù, pal vôt di cualchi mari, pe promesse di cualchi von, o basavon.
◆ E ce buinis lis balotis vuadagnadis come premi! O il mandolât vendût tai barachins, a dimostrâ che il sacri al à il savôr dolç dal diaul, chel stes che nus jemplave il cûr di pôre, sot dai pîts dal Agnul. E ce golose la gubane inventade dai pancôrs par celebrâ chel Concili di Cividât dal 1409! Cuant che un antipape, Gregori XII, si insumiave une Glesie rinovade, umanistiche, tant lontane sedi de curie di Rome che di chê altre, tignude inte scjaipule di aur di Avignon. Un dolç, la gubane, che al cjape la forme di chel grop di Salomon dai mosaics di Aquilee, simbul tal timp che si intortee su di se, dal soreli che nol mûr mai parcè che al torne simpri, sfantant l’orôr de gnot intal cjant des albadis. Tiere misteriose, là che si pues ancjemò sintî la potence di chel grim ancestrâl de Mari Antighe, divine e pagane, esplorant il budiel di piere che al puarte il pas dal iniziât a cerçâ la maravee di une muart simboliche e rituâl, prime di tornâ a viodi la lûs, e respirâ la resurezion dal aiar fresc de vite che si scree ancjemò une volte: baste meti il pît tal ipogjeu “celtic” e lassâ che la vôs e fasi risonance, batint su la piere rude di chê bocje nere tant che l’Infier. O pûr, esplorâ San Zuan dal Landri, e sperâ che il miracul de nassite si ripeti, tignint taponade tal cûr dute la nostalgjie pe vite. Che ae fin e à simpri reson.
◆ Regjon antighe, duncje, braurose de sô diference, pandude di un biel setemanâl identitari, il “Novi Matajur”, e dal periodic catolic zimul, il “Dom”, e spiegade in clâf cetant moderne tal percors di chel museu che si clame SMO, a San Pieri dai Sclavons: là che il paisaç al devente narazion, storie, cussience di popul. Ma ancjemò une volte plurâl, dal moment che SMO par sloven al vûl dî: “o sin”. “Mi SMO tu”: noaltris o sin te. Alc di plui complès e di plui vêr di ce che si pues rispuindi cuntun prepotent e semplificatîf “jo o soi!”. Come che al insegnave il vecjo Liso Iussa, di Ponteà, fondadôr di grups folcloristics che a àn fat la storie e che a son deventâts liende, mestri di tancj che ancjemò a crodin te culture popolâr e te sô impuartance. Muart tal 2020, a 97 agns batûts. Provait a domandâ di lui, fûr pes valadis. Si gjavin il cjapiel e ti ufrissin un tai te ostarie. La sô “Napoleonova” e je la metafore plui biele di dut ce che si sin contâts fin cumò. E vâl tant che un sugjeriment: no stait a preocupâsi masse. Dut al passe a sun di valzer. Fintremai Napoleon.❚
