L’Istât di Onde Furlane al à non “Avenâl”. Oraris e contignûts gnûfs par dute la stagjon

A ncje pal 2023 Radio Onde Furlane vie pal Istât e sta dongje dal so public cuntune programazion speciâl. Cun di fat, par dute la stagjon la “radio libare dai furlans” e fâs indenant la sô ufierte di informazion, culture e intratigniment, sui 90 Mhz inte plui part dal Friûl, sui 90.200 Mhz e sui 105.600 Mhz in Cjargne, e in dut il mont in streaming ae direzion web www.radioondefurlane.eu, cuntun palinsest estîf, che al à gnûfs oraris, gnûfs formâts e gnûfs contignûts.
◆ La informazion in direte si scree aes 9 a buinore cul prin “Gjornâl Radio” e cu la rassegne stampe internazionâl di “In dì di vuê”. Il spazi cui aprofondiments di atualitât e di culture, che al cjape il puest di “Ator Ator”, dal lunis al vinars, e di “Dret & Ledrôs”, la sabide, al scomence a 10 mancul un cuart e al va dilunc fin 11. Cemût che al sclarìs il diretôr di Onde Furlane, Mauro Missana, in particolâr inte edizion de sabide (in programazion in repliche ancje la domenie aes 8 a buinore e il miercus aes 3 dopomisdì), chel apontament «al è la ocasion par tirâ dongje ideis e riflessions in cont dal presint e dal avignî». L’intindiment al è propit chel di fâ saltâ fûr gnovis visions e gnovis propuestis e «juste par chel – al zonte Missana – chel spazi al è stât batiât “Avenâl”».
◆ Chê stesse peraule, dongje di jessi il titul dal contignidôr de matine, e marcje plui in gjenerâl la programazion estive di Radio Onde Furlane, che e je caraterizade ancje dal slargjament dai spazis di “Musiche cence cunfins”, dal inviament de serie di aprofondiments dedicâts ae produzion teatrâl furlane “TeatrisFurlan. Il stât da la art” (aes 11 a buinore de sabide e aes 2 dopomisdì de domenie), e de version “in cuince estive” dal classic apontament dal lunis dedicât al sport, che cumò al tache aes 10 a buinore e il so titul stagjonâl al è “Schiribicilu! Sot de lobie”.
◆ Impen a son in continuitât cul palinsest tradizionâl chês altris edizions dal “Gjornâl Radio”, a misdì e dîs e aes 6 sot sere, lis rubrichis proponudis in prime difusion aes 11 di matine, dal lunis al vinars, e il “Ce fâ?”, la agjende cuotidiane dai apontaments, in onde aes 11 e mieze e po in repliche prime di sere aes 6 e mieze, che vie pal Istât e je ancjemò plui siore di contignûts e di segnalazions. ❚