E covente une sburtade par rivâ a un public gnûf, slargjâsi e cjalâ indenant
Paolo, prime di dut compliments. Te spietavistu?
Sigûr che no, ma e jere une disfide che mi stiçave e o savevi di vê lis competencis justis. O crôt di vê puartât indevant un lavôr impuartant in chest setôr intai agns passâts. E po o ai a cûr il fat che in chest moment il teatri furlan al è vîf, ma in maniere individuâl. A son tantis lis esperiencis che però no àn un coordenament. In chest sens, il Teatri Stabil nol à di imponi un percors, ma al à di puartâ a un rinovament. E covente une sburtade par rivâ a un public gnûf, che nol à di jessi chel dai “furlaniscj”, ma al à di slargjâsi e cjalâ indenant.
_
Primis ideis di puartâ indenant?
Clarementri il Teatri Stabil al à di produsi e di meti in sene spetacui. La cuantitât e la cualitât a dipendaran dal budget, che nol è inmò definitîf, parcè che o stin spietant de Regjon un contribût supletîf. Dal sigûr a saran dôs produzions gnovis. Une e à di vê la capacitât di spiegâ ai furlans e no dome che il teatri furlan al à une grande tradizion, biel che chê altre e varà di mostrâ la necessitât di rinovâ cheste ereditât. Un lavôr al varà di jessi fat pai zovins e pes scuelis, parcè che lôr a son il nestri public di doman, e bisugne fâur capî che la lenghe furlane e je une risorse di no pierdi. Infin, o pontarai ancje su “Trame Ricucite”, par vie che al à un format cuntune funzion divulgative buine ancje par chei che no van simpri a viodi spetacui o che no cognossin il teatri furlan.
_
“Trame Ricucite” però al è un progjet indulà che il cast nol è fat di professioniscj.
Il Teatri Stabil al à di jessi professionâl, ma nol à di smenteâsi che e esist dute une schirie di operadôrs semiprofessioniscj o amatoriâi che a puedin puartâ il lôr contribût.
_
Duncje tu saressis par slargjâ lis colaborazions, no cate la sielte di cjapâ dentri dome ciertis realtâts par dâ vite ae associazion.
No jeri cuant che a àn fondade la associazion e no pues dî nuie su lis decisions che a son stadis fatis. O pensi dut câs che il Teatri Stabil al vedi di cirî colaborazions ancje fûr, se no al è il pericul sì di creâ un cercli sierât che al va in curt circuit. Un concet impuartant al è che si à di sostignî lis realtâts che a operin za sul teritori. Jo o soi pe viertidure, po dopo al è clâr che lis robis si fasaran biel planc.
_
Biel planc ma cuntune scjadince di un an. Isal un timp suficient par meti in pîts produzions e puartâlis indenant?
Si rive a scomençâ. O crôt che il pinsîr dal Cda al sedi stât chel di no dâ une incarghe a un diretôr artistic par trê agns e dopo chel al fâs ce che al vûl, ma di podê tignî di voli il so lavôr. Mi plâs dut câs marcâ il fat che e je stade metude une clausule indulà che si specifiche che il diretôr artistic nol à di firmâ regjiis, di mût che il so nol sedi un fâ autoreferenziâl.
_
In passât tu vevis za vude une esperience simile, cu la Farie Teatrâl. Ce no aial funzionât ta chê volte?
E je une cuistion complicade, ma o pues dî che cuant che si metin in pîts progjets dal gjenar, il travuart al à di jessi il teatri furlan, no la istituzion. Al è clâr che se si partecipe dome par privilegjâ la proprie realtât, alore al larà dut a murî. E al è propit cu la cussience di ce che al è sucedût e che nol è lât a bon che o vin di lavorâ pal avignî di un Teatri che al sedi pardabon Stabil. ❚