Ai prins di Jugn, la sesule tal pugn
❋❋❋
Frescure di Jugn, il rap in cuar e la ruvine dal mulinâr
❋❋❋
Alt o bas il fen, in Jugn seâlu si scuen
………………………………………………………..
LA CUSINE DAL MÊS
Risot cui sparcs
Paste, pastiç e amblets cui sparcs
Involtins di persut di San Denêl cui sparcs e selino
Mignestrons cu lis gnovis verduris dal ort
Patatis e cevole in fersorie
Fasûi in padiele
Salatis di stagjon
Cunin riplen
Cjastrât in padiele
Ûfs in fonghet
Vuaìnis in padiele
Tocj in braide
Spinaze in umit
Ostiis di frico crustulin e verduris cuetis al vapôr
Plats cun cjars des bestiis dal curtîl
Jeur o cunin con verduris dal ort
Gjaline faraone farside
Plats cun colomps e altris salvadis
Rost cul pestât
Polpetis ancje in umit
Linguâl
Polpeton
Pitine
Sopis di crots o di cais
Risot cu la granceule
Boret di romp
Friture di pes
Filets di brancin marinâts
Sope di fasûi cun gjambars
di mâr e mussui
Pes di mâr su la gridele
Sgombri in umit
Crostade di freulis o di cjariesis
Zavaion ancje cul vin
Marmeladis di baraecocui
e estrat di flôrs di saût
………………………………………………………..
IL SANT DAL MÊS. Sant Pieri
La devozion di chest sant une volte e jere une vore pandude in Friûl e ancjemò in dì di vuê in tancj paîs, li che la glesie e je intitulade al prin dai apuestui, e je zornade di sagre e di marcjât. La fieste di Sant Pieri, celebrade ai 29 di Jugn, e cjapà su di se, come chê dai sants plui impuartants logâts tai ponts di fonde dal calendari, ancje contignûts e alegoriis de tradizion popolâr. Tant che tiermin meteorologjic (la burascje di Sant Pieri) e segnaladôr dal cicli agrari (A Sant Pieri il sorc al tapone il puieri), Sant Pieri al deventà ancje indicadôr calendariâl, tant che une volte al segnave che e jere passade la metât de stagjon pai fornasîrs furlans sparniçâts tai stabiliments di mieze Europe (A Sant Pieri il fornasîr al è vieri). Cussì, te domenie plui dongje dai 29 di Jugn, i nestris vons, in chê volte zovins lavoradôrs tal forest, a fasevin fieste tes ostariis de Europe centrâl e a scrivevin a cjase pensant za ai progjets fats dopo tornâts. ❚
………………………………………………………..
LA FIESTE DAL MÊS. IL CORPUS DOMINI
Il Corpus Domini e je la solenitât cristiane che e ricuarde la istituzion de Eucaristie te ultime cene di Jesù, cun chel caratar maestôs che te Joibe Sante nol jere pussibil sigurâ ae memorie, e che partant si torne a proponi 60 dîs dopo Pasche. La solenitât e je mobile, e cussì e pues colâ dai 25 di Mai ai 28 di Jugn di ogni an. La liturgjie catoliche e previodeve une grande procession intant de Messe grande pes stradis dai paîs, dulà che il Santissim si menave ancje sot di arcs fats di frascjis di vert preparadis pe fieste. Daûr, lis frutinis vistudis di blanc o cul vistît de Prime comunion a sparniçavin flôrs e jerbis pe strade intant che bugadis di incens jessudis dal turibul a jentravin pai barcons des cjasis insiorâts di mantîi e di vâs di rosis e lis cjampanis a sunavin a fieste. Dutis lis fameis a partecipavin ae biele solenitât cristiane, vielis e canaie, oms e feminis, e ducj a metevin i vistîts di fieste. Cun di fat, il Corpus Domini al rapresentave une sorte di “sume” des fiestis de Vierte dopo Pasche, Sense e Pentecostis, coronantint la fin midiant di une concentrazion di significâts sacris e simbolics metûts adun in chest moment di “passaç stagjonâl”. Cun di plui, come che si è dit, la fieste e cjapave in se i elements arboris dal “Mai”, che lis infloradis, lis sgjarnetis, lis frascjis e i ramaçs metûts dilunc lis stradis pal passaç dal Santissim ’ndi jerin il simbul evident. Se al sierave la Vierte, il Corpus Domini al anunziave aromai l’Istât, colant tantis voltis dongje dal solstizi di Jugn par vie de Pasche “alte”. In cheste maniere, al cjapave ancje la funzion di “puarte” o fieste di viertidure dal Istât, in pratiche cemût che a jerin stâts il Nadâl pal Invier e la Pasche pe Vierte. ❚
………………………………………………………..
FRIÛL CONTADIN. Lis voris dal mês
A van indenant i grancj lavôrs come seselâ il forment e la batidure, il secont tai des jerbis e des mangjaduris, i trataments cuintri la peronospore intai vignâi, il control de fermentazion dal vin inte cjanive che al pues patî pai prins cjalts. Intant la blave e va indenant a cressi (A Sant Pieri il sorc al tapone il puieri). Ancje vuê jenfri lis fiestis di Sant Antoni di Padue (13.VI) e Sant Pieri (29.VI) lis mandriis a vegnin puartadis sù intai pascui di mont alte, dulà che lis malghis a restaran viertis par dut l’Istât, ven a stâi fintremai in Setembar cuant che lis bestiis a vegnin tornadis a puartâ intes stalis de plane. Sul mâr e va indenant la grande stagjon de pescje. Intai orts lis feminis a semenin o a rimplantin jerbucis, bledis, puar e carotis e a semenin salatis, lidric di tai, latuiis, cudumars, brocui, cauliflôrs, râfs, selino, fasûi e vuaìnis, ma ancje coçuts, carotis e fenoi che vegnin adore. ❚
………………………………………………………..
LA TRADIZION DAL MÊS. La rosade e lis jerbis di Sant Zuan
Daûr de tradizion popolâr, la rosade dai 24 di Jugn, fieste di Sant Zuan, e je miracolose parcè che e puarte dutis lis maraveis dal solstizi dal Istât. Par chest, ancje in Friûl si fasevin divinazions e strolegaments (il plui famôs al jere chel dal blanc dal ûf o dal plomp fondût metûts te aghe) par cognossi l’avignî tal amôr e tal lavôr. Tal jevâ dal soreli, lis feminis si rodolavin sui prâts bagnâts de rosade cun chê di favorî la feconditât e a cjapavin sù rosis e jerbis, simpri bagnadis de rosade miracolose, par tignîlis di cont in forme di mac (“il mac di Sant Zuan”) e doprâlis cuintri il brut timp e lis negativitâts. E jere tradizion antighe ancje chê di cjapâ sù jerbis aromatichis, medisinâls e cun podês magjics jenfri la miezegnot e il cricâ dal dì di Sant Zuan. La racuelte e veve di jessi fate cu la man çampe e iluminade cuntune lum. Lis jerbis aromatichis si conservavin par doprâlis in cusine e, chês cun valôr terapeutic, par curâ ciertis malatiis o fâ magjiis midiant di onzints, decots, infûs, segnaduris e vie indevant. Stant ae superstizion e ae sapience segrete dal Friûl, lis plantis cun virtûts magjichis a fasevin scjampâ vie diaui e striis (doprant par esempli ai, sinç, rude, iperic o jerbe di Sant Zuan), o a coventavin par fâ cuintri ai striaments (rose, salugjee, colat, catapucis), o a judavin in amôr (amorin, belom, zi, lupàs), o a podevin butâ jù i stimui de passion (cimbar e latuie), intant che ciertis jerbis a jerin magjichis par ecelence (betoniche, celidonie, flôr di passion, frassin e coriandul salvadi). ❚
