………………………………………………………..
I TRÊ PROVERBIS
Otubar burascjôs, Invier estrôs
❋❋❋
O soi Otubar strac,
o cjapi il jeur e il corvat
❋❋❋
Sant Luche (18-X), puarte vie la mirindute
………………………………………………………..
LA CUSINE
Vuardi e fasûi
Risot cun fasûi e lidrîs amaris
Rîs e cesarons, o cun puar
o cun selino
Macarons di patatis
o di coce cuinçâts
Mignestre di rîs e patatis e savôrs
Mignestre di foncs e cjastinis
Taiadeis, rîs, omblets e pastiçs cui foncs
Mignestron dal Autun
Viludadis o passadis di Autun
Cjarsons e blecs cun ragù
di cjavrûl, cjamoç, cierf e cenglâr
Meste e panade
Polente cuinçade
Misture di foncs in padiele
Verduris sot vapôr o lessadis
e passadis te fersorie
Torte di patatis
Frico crustulin o cun cevole
o patatis
Cjar lesse cul kren o morcjis
di verduris dal ort
Salvadi in salmì
Cenglâr rustît o in umit
Cjars di salvadi e di uciei
di passaç
Canocjis in umit o sul stec
o lessis cul limon
Calamârs cul plen
Friture di pes
Tencjis cu la sanaf
Faraone in rost o in umit
Altris plats cun cjastinis,
nolis e coculis
Cjastinis lessis e rustidis
Tortis e dolçs cu lis cjastinis
Strucui cun miluçs o piruçs
Frapis cu la marmelade
Piruçs in morcje di vin Merlot
………………………………………………………….
IL SANT DAL MÊS – Madone dal Rosari (Madone di Otubar)
La fieste de Madone dal Rosari, ai 7 di Otubar, e rimonte a une fonde di celebrazions precristianis, ancje peadis aes ativitâts agrariis dal inizi de Sierade (Oscoforiis e Pianepsiis); là che tant plui tart si è zontade ancje la memoreazion de bataie vitoriose di Lepanto (domenie ai 7 di Otubar dai 1571) de Leghe Sante cuintri dai Turcs. Ancje in Friûl cheste fieste e à cjatât une difusion slargjade come che a testemonein lis glesiis, lis capelis e i altârs che a puartin chest non, dispès peâts ae pratiche religjose dal “Perdon dal Rosari”. Cheste pratiche e jere une preparazion cun azions liturgjichis (novenis, tridui vie pe sere e confessions), cu la messe grande de prime domenie di Otubar e la seguitive procession dai jespui cu la statue de Madone ator pes stradis dai paîs. Daûr dal calendari popolâr, chel dal Perdon dal Rosari al jere tignût tant che l’ultin dai “perdons” dal an, stant che si podeve fâ ancjemò tal viert dopo ducj chei che a jerin stâts fats vie pal Istât. ❚
………………………………………………………….
LA FIESTE DAL MÊS – Sant Simon
Inte tradizion furlane e jere la fieste dal apuestul Simon (clamât Zelote o Cananeu par diferenziâlu di Sant Pieri) che e sierave dal dut la anade agrarie (par chel la stagjon si clame Sierade) cu la racuelte dai râfs e la metude in bande dai imprescj di lavôr. Ancje i proverbis a confermavin il moment e la vore: par Sant Simon si gjave il râf e il raviçon e Sant Simon i imprescj tal cason. Cussì la fieste di Sant Simon e meteve il sigjîl operatîf a un cicli agrari e e vierzeve il timp de polse dal Invier, tant che in cualchi vile si faseve sagre e si tignive marcjât dulà che si vendevin i plui biei prodots de tiere e i imprescj di lavôr pe anade seguitive (vuê e je restade dome la sagre di Codroip). Cu la fieste di Sant Simon dut al veve di jessi finît e sistemât parcè che ae fin di Otubar dabon al començave il frêt. Ancjemò une volte i proverbis meteorologjics furlans cu la lôr antighe sapience a confermavin il particolâr moment: Sant Simon, manie e scufon, par Sant Simon si tire sù la cjalce e il scufon e S. Simon passât, Invier jentrât. ❚
……………………………………………………
FRIÛL CONTADIN. Lis voris dal mês
Prin mês dal Autun, Otubar al siere lis vendemis de ue e di ducj i prodots de tiere che a àn puartât davoi e ligrie sui cueis e su la plane e po dopo intai curtîi dulà che une volte a rivavin i cjars, tirâts dai cjavai e dai bûs, plens di ue, panolis e patatis e di miluçs, piruçs, coculis e cjastinis e pardut si sintive il bonodôr dai moscj e des trapis intant che borcs e andronis a jerin profumâts di polente fate cu la farine gnove. La fieste de Madone dal Rosari (ai 7 di Otubar) e segnave dapardut la colme des vendemis. Puartâts a cjase i prodots de tiere, dopo vê semenât pe gnove anade, il cicli agrari si sierave. La fieste di Sant Simon (ai 28 di Otubar) e jere chê che e meteve il sigjîl su ogni vore de campagne. Al jere rivât il timp umit dai foncs e dai gnespui, dai uciei di pas che une volte si butavin jù su lis bressanis e sui rocui intant che a svualavin ad alt viers lis tieris cjaldis dal meridion. ❚
…………………………………………………
LA TRADIZION DAL MÊS – I musons
La Sierade (Atom, Autun, Soreunvier) e je il timp des vendemis di cualsisei prodot de tiere, ancje chê des cocis. Fin tai agns Sessante dal Nûfcent e jere tradizion fate dai canais di disvuedâ dal dut une coce taronde, di fâi bocje e voi cuntun curtìs e sot sere di metii dentri une cjandele impiade. Po dopo a sistemavin la coce iluminade in cualchi puest dulà che e podeve fâ scjas e pôre a chei che passavin dongje. Cheste usance e vignive fate jenfri i mês di Setembar e di Otubar. La tradizion, che e jere colade cul disvilup economic dai agns Setante, e tornà di bot de matarane Americhe sul nassi dal tierç mileni midiant de introduzion de fieste di Halloween. Come che si sa, cheste strane fieste e ven fate te signestre gnot dai 31 di Otubar, vilie de solenitât di Ducj i Sants e dai Muarts, cun cocis di plastiche e lusutis a led, mascaraments dai frutins (che a van sul lis puartis des cjasis in spiete di un regalut disint la frase “dolçut o scherçut”, cenis in cjase cui amîs o in locâi publics cun ecès no dome di mangjâ e di bevi, baldorie e matetâts variis (intune specie di Carnevâl dal Autun). In cheste maniere lis cocis di vuê no àn nuie a ce fâ cun chês di une volte e ancje il riferiment ae grande celebrazion celtiche dal Samhain e à pocje fonde, cence zontâ che la penose fieste “americane” di vuê e urte cu la atmosfere de nestre antighe devozion ai Sants e ai Muarts. ❚
