………………………………………………………..
I TRÊ PROVERBIS
Bregons di tele
e melons in Setembar no son plui bogns
❋❋❋
Se Lui e Avost
no madurin la ue, Setembar al fâs asêt
❋❋❋
Setembar o che
al puarte vie i puints
o che al secje lis risultivis
………………………………………………………..
LA CUSINE
Macarons di coce e scuete
Risot cui foncs
Risot cu lis pernîs o cul masurin
Risot cu lidric trevisan
‘Suf di coce
Blecs e taiadeis cun ragûs diferents
Mignestre di cauliflôrs
Mignestrons dal ultin Istât
Cjarsons, rafioi e paste saltade
Frico ancje cu la cevole e patatis o miluçs
Fasûi in salate
Bavacis e ovui su la gridele
Pomodoros e pevarons farsîts
Tocj in braide
Raze in umit ancje cun tocj di naranç
Picjocis tal spêt
Fasan cul ardiel e vin blanc
Masurin tal spêt
Rost di manç al tocj di cevole
Cjars e salvadi daûr di cetantis ricetis
Cieui cul limon, farsîts o su la gridele
Temui tal scartòs
Bacalà in blanc o in ros
Gjambars di mâr a la busara
Friture di pes
Pes di stagjon a rost, in umit e tal for
Fritulis dolcis di coce
Crostade di coce
Crofis cun miluçs o piruçs
Gubane
Torte di cjastinis
Ue, miluçs e piruçs
Sirop cu lis scussis di limon
………………………………………………………….
IL SANT DAL MÊS – Sant Michêl
Il cult dal arcagnul Michêl, protetôr dai Langobarts, che a introduserin in Friûl la sô devozion, si inlidrisà une vore in Friûl par vie de fortunade posizion de sô fieste tal calendari de nature e des oparis agrariis. Di fat, di là de grande impuartance che Sant Michêl al à te simbologjie religjose tant che custodi dal ecuinozi de Sierade, o ben tant che entitât angjeliche de lûs che e lote cuintri lis fuarcis scuris dal mâl che a cressin cul lâ jù dal soreli tal firmament, chest sant al è deventât ancje suee juridiche e agrarie. Cussì ae fin dal mês di Setembar, cuant che si ricuarde l’arcagnul Michêl (29-IX), in Friûl al tacave il timp des vendemis e des racueltis e si sieravin i conts de stagjon dai arments za lâts jù a val in ocasion de fieste de Nativitât de B. V. Marie (8-IX). Cu la fieste di Sant Michêl, po, si sierave la stagjon dai pascui libars tes armentarecis e tai pascui comunitaris, tacade cun Sant Zorç (23-IV). Come ducj chei altris sants metûts in ponts strategjics dal calendari, Sant Michêl al è deventât ancje un riferiment meteorologjic, tant che segnaladôr des variazions climatichis che a capitin dongje dal ecuinozi. Di fat, tor dai 29 di Setembar dispès si à un fuart burlaç (“la montane di Sant Michêl”) che al sbasse une vore la temperadure de atmosfere cjalde dal ultin Istât, puartant cun decision il timp de Sierade, plui fresc e cristalin. Sant dal ecuinozi dal Atom, Michêl al marche ancje il scurtâsi des zornadis (une detule e ricuarde che “Sant Michêl (29-IX) al impie il ferâl e Sant Josef (19.III) lu distude”) e che lis cjastinis a son prontis (“A Sant Michêl la cjastine tal fossêl”) par cjapâlis sù e jemplâ la ceste (“A Sant Michêl o vin la montane e la cjastine te tamane”). ❚
………………………………………………………….
LA FIESTE DAL MÊS – Nativitât de B.V. Marie (Madone di Setembar)
Nassude in Orient tal Cuint secul, la fieste e jentrà plui tart inte Glesie ocidentâl, li che si slargjà une vore tant di dâi la ispirazion ancje ae fieste mariane de Imaculade Concezion fissade ai 8 di Dicembar, ven a stâi a une distance juste di nûf mês, il periodi naturâl jenfri il concepiment e la nassite. La nativitât di Marie no ven contade tai Vanzelis sinotics, ma di cualchi Vanzeli apocrif, come il Vanzeli armen de infanzie, che al conte che Ane, la mari di Marie, e ve une frute ae setime ore dal vincjesim prin dì dal mês di Elul, che al corispuint ai 8 di Setembar. Cheste date e risulte po une vore simboliche par vie che, stant al Menologium Basilianum, e coincît cu la scree dal an eclesiastic e duncje, lant daûr aes alegoriis religjosis, al inizi de redenzion. Pes culturis e dutrinis astrologjichis, invezit, chei che a son nassûts sot dal segn de Vergjine, segn zodiacâl di chest periodi, a àn un fuart sens dal servizi, che al va ben adun cu la figure de Vergjine Marie di Nazaret par vê acetât la Anunziazion e pe sô vite di dedizion e fedeltât a Diu. Tal mont contadin, la fieste de nativitât di Marie e je simpri stade une zornade di fonde dal calendari jenfri la ultime part dal Istât e il prin Autun climatic, tant che ancjemò vuê e ven ricognossude come la date che si discjame la mont, ven a stâi cuant che si menin jù lis mandriis des monts intal plan, dopo l’Istât in malghe, e de fieste che ur ven fate tai paîs pal lôr tornâ intes stalis. ❚
……………………………………………………
FRIÛL CONTADIN. Lis voris dal mês
La stagjon cjalde e je par finî. In mont si sierin i cjampeis e lis mandriis a vegnin menadis a val cun flocs e galis pe fieste de Nativitât de Madone (ai 8 dal mês) o par chê di Sant Michêl (ai 29), date che par tradizion e segnale il timp just par cjapâ sù coculis e cjastinis. Prontadis lis semplis e preparâts turclis e caratei sot lis ariis, e scomence la stagjon des vendemis prin de ue blancje e dopo di chê nere, par continuâ cun chê des ultimis pomis (miluçs, piruçs, coculis, cjastinis, cocis, patatis, panolis, fasûi), tant che culinis e planis si jemplavin di cjants e di vôs legris di tante int che cun gjonde e cjapave sù il risultât di dôs stagjons di lavôr e di fadiis. Intant tal ort si semenin capûs, lidrics, cevole e spinaze e tal zardin si cambiin di vâs i flôrs autunâi, ma si traplantin ancje pestelacs, campanelis, violis, malvons e digjitâi intal zovin di lune. ❚
…………………………………………………
LA TRADIZION DAL MÊS – La lune di Setembar
Peât aes fasis dal soreli tal firmament e ai ciclis de nature, il popul furlan al dave un valôr particolâr ae meteorologjie, e in gjenerâl aes crodincis astronomichis. Di là che i moviments tal cîl dal soreli, soredut il cressi e il lâ jù de lune dilunc des fasis dal so cicli al è alc di inmagant. Stant aes cognossincis empirichis antighis dal cîl e de meteorologjie dai furlans, la lune gnove e guviernave il timp che al sarès vignût fin ae lunazion seguitive, vâl a dî pai 28 dîs dopo. Ma la lune di Setembar e veve influencis plui di dut su lis cundizions meteorologjichis, stant che e marcave parfin tes siet lunis seguitivis la sô stesse inclinazion. Propri par chest, une volte i contadins a spietavin cence padin la lune di Setembar, sedi par savê il timp che al sarès vignût vie pe delicade stagjon des vendemis, sedi par gjavâ fûr strolegaments sul timp atmosferic che al sarès vignût par dut l’Invier. ❚
