Indulà puedie rivâ la passion pal pugjilât di un zovin di Paulâr? A lâ daûr di Marco Sollero, il percors al è une vore lunc. Al è partît de Cjargne e, par tant timp, al à fat ogni dì, fis, sù e jù di cjase fin a Udin, par alenâsi inte palestre de Pugjilistiche Udinese dal president Leonardo Zalateu, intal palaç dal sport “Manlio Benedetti”, il vecjo templi dal sport furlan in citât.
◆ Une costance e un slanç che no ducj a puedin tignî sù, massime se si scuen ancje lâ a vore e cori ducj chei chilometris, no dome di Istât, ma ancje di Invier, cul frêt e cu la ploie, fintremai cu la nêf, che in mont a son simpri.
◆ “O vevi cuindis agns – al conte Sollero – e mi soi apassionât di colp al pugjilât, viodint cualchi video su YouTube. Di bot, al è stât un claut fis intal cjâf. O vevi bielzà voie di segnâmi in palestre: chê plui dongje e jere a Udin e jo no vevi pussibilitât di cjapâ une coriere, parcè che la sere no jerin coincidencis. Cuant che o ai fat disevot agns, o ai finide scuele, o ai cjapade la patente par vuidâ le machine e o ai cjatât un lavôr. Daspò metût a puest dutis chês robis, o ai decidût di tacâ a alenâmi pardabon. E cussì o ai scomençât”.
__
Il sorenon “Cret” di indulà vegnial fûr?
“Alessandro Zuliani, che al è stât un grant pugjil (agns indaûr, dôs voltis campion talian dai pês massims, ndr) e che cumò al è un dai alenadôrs, mi à clamât cussì une volte, in Gjermanie, dopo di un incuintri indulà che o ai vinçût ai ponts. Al jere il 2019, il mês di Lui, e o ai rivât a bati il todesc Abdul Sahil, intune competizion indulà che i zovins dal Friûl-Vignesie Julie a àn combatût cuintri dai atletis di chê regjon de Gjermanie. Chel al jere il gno secont incuintri. Sandro al à viodût il gno snait, la mê durece e, cjalantmi intai voi, mi à dit: “Di cumò indenant, tu tu sês ‘il cret’”. E, di chê volte, ducj mi clamin cussì”.
__
Continus de prime volte che tu sês jentrât in palestre a Udin.
“Mi soi sintût subit a cjase. Metût il pît dentri te palestre, o ai vude la sensazion di jessi in famee. In curt, o ai cjatade armonie cul mestri Gianluca Calligaro, cun Alessandro Zuliani, Gianni Stroppolo e dute la scuadre, come jessi simpri stât cun lôr. Cun di plui, di cuant che, cualchi mês indaûr, a àn viert un implant par alenâsi a Tumieç, o ai la pussibilitât di vê une palestre plui dongje di cjase e o rivi a lavorâ miôr. Vê la palestre in Cjargne al sburte e al incoragje la pratiche dal pugjilât ancje des mês bandis: o soi une vore braurôs di chest”.
__
Restìn su chest cantin. Le sintistu tant che une cjame o isal un onôr chel di jessi un pont di riferiment pai zovins de Cjargne che a àn voie di misurâsi in cualchi ativitât sportive, in prin il pugjilât?
“La boxe e je un sport cetant dificil: al domande une vore di sacrificis e di dedizion. Jo o soi fidançôs che cualchidun dai zovins cjargnei al vegni daûr di me. Cumò, al è un frut di Paulâr che al à tacât a fâ pugjilât in palestre a Tumieç: sperìn ben che al vedi voie di lâ indenant cussì”.
__
Sêstu cambiât in alc cul fâ pugjilât?
“No cuissà ce. Cuant che o soi a torzeon, la int mi ferme e mi domande dispès lis datis dai incuintris, o cemût che e va la ativitât: tancj mi fasin i compliments, ma come persone o soi restât chel di simpri. Morosis? No, no… nuie: cumò o ai voie di concentrâ lis fuarcis dome sul pugjilât. O ai l’obietîf di rivâ a vinci il campionât talian di chest an e o pensi dome a chel: cjase, lavôr, palestre, cjase, alenaments e polsâ un tic par jessi fresc. Nuie altri”.
__
La strade par cjapâ il titul tricolôr?
“Fin cumò o vin fat tancj incuintris di preparazion par rivâ a jessi pronts pal mês di Dicembar, cuant che al sarà il Campionât talian. Ducj i incuintris che o ai fat fin cumò a son fûr de mê categorie, parcè che al è dibot impussibil cjatâ aversaris dal gno pês. Intai ultins timps, o ai viodût atletis di dôs o trê categoriis plui altis de mê e o soi stât une vore disvantazât. Tantis voltis o soi rivât a vinci, altris voltis o ai patât, cualchi volte o ai pierdût. Dut câs, nol è impuartant tant il risultât, ma l’alenament e il fâ esperience. Il Mestri Calligaro al vûl usâmi a sostignî un incuintri cuintri aversaris disavuâi e a jessi pront a dut. O ai bielzà tacât la preparazion, chê penze: almancul un mês di tirâ sù pês, di lavorâ sul fisic, in palestre a Tumieç. O scuen incressi la velocitât, la fuarce esplosive e la potence in gjenerâl. Daspò, intai mês di Otubar e di Novembar, o varìn di lavorâ su lis rifiniduris, e o fasarai cualchi incuintri di preparazion, ducj cuintri aversaris di dome une categorie plui alte, fin ai 51 chilos. Tal ultin moment, al sarà di bacilâ par tornâ dentri tal gno pês, al limit dai 48 chilos”.
__
Isal tant dificil lâ cuintri un plui grues?
“Vê denant un plui alt e plui grues al cambie dut: velocitât, durece dai pugns, lungjece dai colps. Intal ultin incuintri, il gno aversari al pesave 55 chilos e al jere plui alt. O ai pierdût, dut câs o ai rivât a sostignî la diference di fisic”.
__
Pensistu di deventâ professionist?
“Par cumò, no. O ai voie di fâ un pas a la volte. L’unic obietîf cumò al è cjapâ il titul talian e o scuen vincilu par fuarce. Daspò di chel, viodarìn. No pensi a nuie dopo dal mês di Dicembar, ancje parcè che al pues capitâ di dut. Se o rivarai a vinci? Cuissà, a podaressin clamâmi in nazionâl par cualchi incuintri internazionâl. O ancje no. Al è dibant pensâi cumò. In Americhe a fevelin di “tunnel vision”: cjalâ dome une robe par volte”.
__
Il non di un pugjil che tu âs voie di frontâ?
“Dal sigûr Leonardo Esposito, chel che mi à batût l’an passât inte finâl dai Campionâts talians: o ai cetante voie di cjatâlu ancjemò sul ring e, la prossime volte, di batilu. Al è un carûl, par me”. ❚
::::::::::::::::::::::::::::::::::::::::::::::::::::::::::::::::::::::::::::::::
La braùre di jessi un simbul pai zovins di dute la Cjargne
“O sint fuart l’orgoi di pandi il non de mê valade e de nestre mont”
Lant indaûr intai archivis di dutis lis ativitâts sportivis, almancul indulà che al è un archivi, no si lei il non di nissun atlete di Paulâr che al sedi deventât campion talian. Un stimul in plui par Marco Sollero a rivâ a cjapâ il titul tricolôr dal 2022. Ancjemò plui, il zovin pugjil al sint une vore la braùre di jessi un simbul pe sô int e par dut il teritori de mont cjargnele.
◆ “Lu sint fuart pardabon. O soi braurôs di jessi di Paulâr: al è il gno paîs e o ai cetante voie di lâ ator a fâ incuintris, par incjarnâ il spirt de mê int. Chest an, o ponti dret al titul ancje pe Cjargne, par fâ viodi che o sin bogns di rivâ a risultâts preseâts. O vuei puartâ il titul ca sù”.
◆ Tant ben l’impegn e la determinazion, ma isal cualchi fatarel di contâ, vignût fûr in tancj agns di ativitât cu la Pugjilistiche Udinese?
◆ “A son tantis robis che no si puedin contâ. Se pardabon si scuen, mi ven iniment di ce che al contave Alessandro Zuliani. Prime di un incuintri, lui nol veve bisugne di lâ jù di pês, anzit, al scugnive cjamâ pês. E al mangjave paste e pize cui pevarons e il salam picant. Di no crodi”. ❚
::::::::::::::::::::::::::::::::::::::::::::::::::::::::::::::::::::::::::::::::::
LA SCHEDE DAL PUGJIL DI PAULÂR
Marco Sollero al è nassût a Tumieç ai 17 di Dicembar dal 1997 e, di simpri, al è a stâ a Paulâr. Intal 2015 al à tacât a alenâsi inte palestre “Mario Vecchiatto”, cjase de Pugjilistiche Udinese, tal palaç dal sport “Manlio Benedetti”, in vie Marangoni, a Udin. Fin cumò, al à sostignût 32 incuintris, cun 15 vitoriis, 5 paritâts e 12 sconfitis. La prime volte, ai Campionâts talians, intal 2020/21, al à subit pierdût ai ponts, in cualificazion, cuintri Patrick Cappai. L’an passât, in Toscane, daspò vê batût il campion in cjarie e atlete de nazionâl Nicola Cordella, al è rivât in finâl, indulà che al à pierdût ai ponts cuintri Leonardo Esposito. Chest an, al à voie di lâ sù ancjemò di un scjalin tal podi tricolôr.
◆ Fûr de palestre, al lavore a Tumieç come mistirant in volte. La pussibilitât di jessi a turni i permet di alenâsi ogni dì, sedi che al lavori vie pe gnot, sedi vie pal dì. ❚
