Un viaç musicâl fûr par une lenghe
che e cîr di sorevivi tra la piel e la gruse
Al à vût il privileç di presentâ in anteprime a Cividât, sul palc di “Mittelfest” pe sezion “Mittelyoung”, il so album di scree ‘Hrudja’. Noaltris però lu cognossìn za di un pôc di timp. O sin stâts daûr di chest zovin cjantautôr cjargnel di cuant che tal 2012 si è presentât pe prime volte al “Premi Friûl”. Di lui o vin vût plui di une ocasion par contâus de sô cressite artistiche. Chest an al è ancje stât un dai protagoniscj dal festival di musiche “Focus Wave 2023” che si è davuelt cualchi setemane indaûr in Gales, e ancje dal Open Payrus Jazz Festival.
◆ Di cui stino fevelant? Di Massimo Silverio. Un autôr che tra il atrat de tiere di confin e la tradizion de nestre lenghe, al cree un so lengaç cetant personâl. Un lengaç che al met dongje la musiche moderne, il cjant popolâr e la poesie. Dut fat di sperimentazion e di ricercje di sonoritâts gnovis, adun cui tescj in lenghe furlane, taliane, e inglese.
◆ Cheste espressivitât si incjarne midiant de sô colezion precedente ‘Ø’ (EP jessût tal Zenâr dal 2022, e presentât in tour tal 2022), seguît di ‘O’: doi EPs che a tegnin dongje lis cjançons di Massimo scritis tai agns passâts. Chestis dôs racueltis a son un manifest de sô ricercje che e esist fûr dal timp e di ogni scheme di gjenar. O podês lei di plui culì:
https://www.lapatriedalfriul.org/il-folk-malinconic-di-silverio-sperimentazion-e-armonie/. Intant, in chescj agns al à ancje colaborât e rangjât un singul cul grup galês Adwaith e te Vierte dal 2021 al à partecipât ae produzion dal disc ‘Adalt’ di Loris Vescovo.
◆ Chest an al è jessût il video dal singul ‘Jevâ’. Une vilote furlane, dulà che Massimo nus conte il jevâ di une mari vistide di prâts e di monts (la Cjargne) intant che e cjarece la sô code: il so frut aromai lontan ator pal mont. Toc e video che a àn vût tant sucès e par Massimo ancjetante impuartance, parcè che dopo doi agns che al jere vie de sô Tiere al à tornât a cjantâ di jê. Culì il video: https://www.youtube.com/watch?v=ZuCHV44EICM
◆ Il toc ‘Jevâ’ al cjate ancje puest tal prin album dal artist: ‘Hrudja’. Il titul di chest album al cjape il non di une peraule che e je une antenade di “gruse”, o ben par furlan la croste che si fâs cuant che une feride si torne a sanâ. L’album di esordi di Massimo al racuei il lengaç dal artist, une lenghe e espression metude insiemi midiant de musiche, des rimis e des similitudins tra il furlan e l’inglês: il furlan, come la “gruse”, al tint a sfantâsi, invezit l’inglês al cjape simpri plui pît.
◆ Chest album al è un viaç musicâl fûr par une lenghe che e cîr cun ustinazion di sorevivi tra la piel e la gruse. Lis melodiis, come simpri profondis, a son cjamadis di emozion. La musiche e jentre tal profont de anime umane, te sô desolazion, malinconie e tes sôs turbolencis.
◆ Dîs a son i tocs dal album: Schena, Jevâ, Nijò, Grim, Algò, Criùre, Scune, Grusa, Piel e Colâ . Cu la vôs maraveose di Massimo e cu la sô ghitare, violoncel, e eletroniche, al colabore il musicist piemontês Nicholas Remondino, cun batarie, percussions e i côrs.
◆ No viodìn la ore di podê finalmentri viodi la scree dal prin album di Massimo Silverio, che al jessarà tal Autun di chest an. Intant, stait daûr su lis sôs pagjinis social:
https://www.facebook.com/massimosilveriomusic/ ❚
