Massimo Silverio, di Çurçuvint al mont cu la braùre des lidrîs

Al è stât fra i finaliscj dal Premi Tenco, e al è finît cul so “Hrudja” ancje inte programazion de BBC tes sieltis musicâls di un grant dal rock come Iggy Pop. Massimo Silverio al è simpri plui inviât viers di une cariere di nivel cetant alt. Ma pe “Patrie” e i siei letôrs al cjate simpri un fregul di timp…
_
La prime domande che ti fasìn e je simpri: cemût nassie la tô musiche, e di dulà rivie la sielte de lenghe furlane pai tescj des tôs cjançons? Cul timp ise mudade la tô maniere di rispuindi?
“No. La musiche e je stade simpri une mê grande passion: za de prime infanzie o ai amât scoltâ une vore di discs; la idee di scrivi e componi alc di gno e nas vie pe mê adolessence. Cuant che o scrîf une cjançon, o cîr di fâ alc che, cun semplicitât, mi plâs. O voi daûr di un gno gust personâl, o il gno intuit. O sielç lis peraulis e lis dopri tant che simbul di alc che clamât fûr di dentri di me, cirint di rivâ a imagjins interiôrs. In principi al somee dome une sielte estetiche des peraulis, ma dopo un pôc par volte si forme la essence reâl di ce che o sint e che o vuei trasmeti. No mi ispiri a nissun musicist specific: o pues però dî di vê cjapât tante plui ispirazion dal mont dal cine che no di chel de musiche, soredut di regjiscj tant che David Lynch e Werner Herzog. Da pont di viste musicâl, invezit, o soi stât influençât in part di artiscj tant che David Sylvian e Mark Hollis. Pes mês primis cjançons o ai sielt di doprâ la lenghe taliane, parcè che mi permet di cjapâ dentri i miei coetanis in maniere plui facile; plui tart però o ai scomençât a sperimentâ l’ûs dal furlan, e il risultât al è stât la publicazion dal gno prin EP. Po dopo o soi lât indevant a doprâ simpri il furlan: lis cjançons che a componin “Hrudja”, il gno prin album publicât tal Novembar dal 2023, a son dutis dome in cheste lenghe. O crôt che il furlan al vedi un incjant, une sô musicalitât particolâr che par me e risulte pardabon ideâl par acompagnâ lis sensazions e lis particolaritâts carateristichis de mê musiche. Il fat di mantignî vive cheste lenghe cussì uniche, di fâle sintî traviers chel mieç di comunicazion magnific che e je la musiche, di puartâle ancje fûr regjon e fâle cognossi a cui no le veve mai sintude prime, al è un alc di grant valôr e significât par me, alc che o soi pardabon braurôs di fâ.”
_
“Cemût ise stade acetade dal public la tô sielte di doprâ il furlan?”
“Mi à un pôc maraveât ma soredut fat un grant plasê viodi tropis personis, ancje int che e vîf in regjons ancje lontanis de nestre, dopo vê assistût a un gno conciert a son vignudis dongje manifestant grant interès e curiositât par lenghe maraveose che no cognossevin e che a vevin scoltât pe prime volte. Chi in Friûl, invezit, o ai podût osservâ che dispès tantis personis a tornin a svicinâsi e a manifestâ un gnûf interès bande il furlan, che magari cussì no al ven dispès sotvalutât o ignorât, soredut des gnovis gjenerazions. Cun di plui, par incoragjâ une plui grande cognossince di cheste lenghe (sedi in regjon che fûr), o ai decidût di dâ la pussibilitât al public, in ocasion dai concierts, di cuistâ librets cui tescj des cjançons par furlan voltâts sedi par talian che par inglês.”
_
“Dopo de publicazion di “Hrudja” tu âs scomençât un lunc tour in Italie. cuâlis sono stadis lis tôs impressions dilunc dal tour, e cualis tapis ti sono plasudis di plui?”
“E je stade une esperience che no mi spietavi e che e je stade plene di emozions. No varès mai previodût un acet tant calorôs de mê musiche. Al è stât alc che o ai podût sperimentâ ancje in lûcs tant lontans e diviers dal Friûl. Il tour lu ai screât tal principi dal 2024 cun trê datis in Friûl: a Soclêf, Pordenon e a Udin. Dopo di chestis e je lade daûr di une schirie di datis in tancj clubs musicâi une vore varis dal Nord Italie (cualchidun ancje famôs, tant che il “Magazzino sul Po” di Turin e l’“Arcibellezza” di Milan): e jere la prime volte che o puartavi la mê musiche tant lontan de mê regjon. Une des datis plui impuartantis che mi visi e je stade chê dal Festival musicâl “Jazz is dead” di Turin, cuntun public di centenârs di personis. Po dopo, cul Istât, a son scomençâts i concierts tal viert. Tra chescj mi ricuardi cun tant plasê di chel di Alberobello (Pulie), là che o ai viodût un interès particolâr de int dal lûc bande la lenghe furlane. Pensant aes datis dal tour che o ai amât di plui, no pues no citâ chê leade a “Paesaggi Sonori”, là che o ai vût la ocasion di sunâ sul altiplan dal Voltigno, tal mieç di monts di no crodi trop bielis: o ai podût viodi cemût che la mê musiche e chest lûc splendit a fossin pardabon in sintonie, e al è stât emozionant tant che mai. Sensazions similis mes à dismovudis ancje il conciert sul lât di Fusinis pal “No Borders Music Festival”, e chel dongje il sît archeologjic “Rudiae” di Lecce. O vin fat dome une tape tal forest, a Munic. Tacant di chest an o ai scomençât a esibîmi pe prime volte in trê, in compagnie dai musiciscj Nicholas Remondino e Manuel Volpe.”
_
“Cumò cuâi sono i tiei progjets?”
“Al moment il tour di “Hrudja” al va indenant, e intant o stin lavorant a materiâl gnûf: dilunc dai concierts che o tignarìn di chi indenant o integrarìn cualchi cjançon gnove, in viste di un probabil album gnûf che la sô date di publicazion e je però ancjemò di definî. Par ce che al tocje il stîl musicâl, no saran trasformazions sostanziâls o cambiaments. Il gno obietîf intal prossim futûr al è chel di fâ in cualchi maniere une musiche che si slontani ancjemò di plui dai schemis “standard”, plui spontanie, cence barieris e introspetive dal profont. In cont invezit dal ûs des lenghis, di là di cualchi test in lenghe inglese, o ai intenzion di mantignî simpri il furlan tant che lenghe di base.” ❚