L’alenadôr preseât e navigât al è il tecnic
de scuadre che e zuiarà il torneu internazionâl risiervât aes minorancis linguistichis
dal continent vier
Un apontament par fâ la storie, cjalant indenant al 2028. Biadelore, chest an, il Friûl al è daûr a meti adun une scuadre par zuiâ la Europeada, il torneu risiervât ai teritoris des minorancis linguistichis in Europe. La manifestazion, rivade ae cuinte edizion, si davuelzarà intal Schleswig, une regjon storiche fra Danimarche e Gjermanie de fin dal mês di Jugn al principi di Lui. E al sarà Mauro Lizzi il “mister” dai furlans.
__Mauro Lizzi, cemût sêstu rivât su la bancjute de selezion furlane?
“Inte mê cariere, prime di zuiadôr – o fasevi il portîr – e daspò di alenadôr, o ai mateât cun cetantis scuadris, dai diletants ae serie A feminine dal Tavagnà. Cheste e je le prime volte cuntune selezion e o soi une vore braurôs di jessi il prin tecnic de scuadre dal Friûl intune manifestazion dal gjenar. La motivazion par fâ ben e je tante e no viôt la ore di scomençâ”.
__Cuâl isal il criteri pe selezion dai zuiadôrs?
“O ai iniment la liste. Ducj zuiadôrs di nivel alt, che a rivin di scuadris di serie D, il campionât interregjonâl, la Ecelence in regjon e la Promozion. Pal fat che si fevelarà par furlan, fra dutis lis situazions di alenament e partide, al è clâr che ducj a vedin di savê la marilenghe e che a rivedin a capî dut ce che si disarà e si fasarà. Dut câs, al sarà fondamentâl il spirt di grup e il sens di apartignince ae identitât furlane. Intai dîs che a vegnin o rindarìn publiche la liste dai convocâts”.
__O vês di fâ une sorte di verifiche linguistiche dal furlan pai convocâts?
“Nol covente, ancje se e sarès une idee! Dut câs, o scuen pensâ soredut aes cuistions dal cjamp: la tecniche, lis tatichis, il mût di fâ zuiâ la scuadre. Il pinsîr, prin di dut, al è chel di meti adun la clape. O soi sigûr che il spirt furlan di ducj al è salt e clâr”.
__Obietîf sportîf?
“Si partìs simpri cul obietîf di rivâ insom. Se dutis lis robis a laran inte direzion juste, o pensi che o sarìn competitîfs. O ai fevelât cun altris dirigjents, prin di ducj chel de minorance slovene in Friûl-Vignesie Julie, che e àn partecipât inte ultime edizion e mi àn confermât che il nivel al è bon e che o vin dutis lis cualitâts par fâ ben”.
__Il svant personâl di Mauro Lizzi?
“Une biele sodisfazion, par sigûr. O soi furlan, o ai spirt furlan e o soi une vore tacât ae mê tiere. Jessi un rapresentant dal Friûl intune manifestazion come la Europeada al è un svant che inte mê cariere al conte pardabon. Dopo di tancj agns di impegn intal mont dal balon, mi plâs la idee di lâ ancje fûr dai confins dal Friûl, cu la passion di simpri e la voie di puartâ cjase cualchi sodisfazion intal non de nestre int”.
__Il program di lavôr, svicinantsi al torneu?
“Fasarìn alenaments a Martignà, parcè che si sin poiâts ae locâl Union di balon. O vin in program garis amichevulis cuintri de selezion under 19 dal Friûl-Vignesie Julie, che e à fat il Torneu des Regjons in Ligurie intal mês di Març. Dopo di chê, o vin chê di zuiâ une partide di alenament cu la rapresentative de Cjargne, prime di lâ in Gjermanie”. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::
EUROPEADA: IL TORNEU DES MINORANCIS
Dai 30 di Jugn ai prins di Lui, lis partidis di cualificazion aes fasis finâls dal torneu. E al sarà ancje il derby cui slovens dal F-VJ
La pagjine web de Europeada e presente la manifestazion come “The European Football Championship of the autochthonous national minorities”. Ven a stâi, il torneu european di balon des minorancis nazionâls autoctonis. E je une grande manifestazion sportive, cun plui di mil partecipants, che e met adun une competizion leâl e il divertiment che dome un festival dal sport, cu lis sô prerogativis, al pues ufrî.
◆ Il torneu al è coordenât de FUEN, la sigle e sta par “Federal Union of European Nationalities”, ven a stâi Union Federâl des Nazionalitâts Europeanis, il plui grant organisim european che si ocupe dai popui cence stât e des minorancis linguistichis. L’obietîf al è chel di tacâ lis minorancis, meti in evidence lis identitâts e rinfuarçâ lis istancis di dutis lis Regjons cun almancul une lenghe minoritarie ricognossude.
◆ Intal 2008, la prime edizion si je zuiade intal Cjanton svuizar dai Grisons, intal 2012 in Lusazie (Gjermanie), intal 2016 intal Sudtirôl e intal 2022 in Carinzie. La scuadre di cjase, ven a stâi i zuiadôrs di Bolzan e dai dintors, e à vinçût dutis lis edizions. Intal 2022 e je stade metude sù ancje la competizion feminine e ancje in chest câs e à vinçût la rapresentance sudtirolese.
◆ Dopo des garis amichevulis, il prin impegn uficiâl de scuadre furlane al sarà domenie ai 30 di Jugn, aes 11 di matine, a Flensburg, in Gjermanie, cuintri de scuadre de minorance slovene in Friûl-Vignesie Julie. Un derby! Intes zornadis che a vignaran, il Friûl di mister Lizzi al zuiarà cuintri dai ongjarês di Romanie e dai todescs di Ongjarie cun chê di cualificâsi pai cuarts di finâl e lâ il plui indenant pussibil. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::
DANIELE PUNTEL: O PONTIN A FÂ BEN, PAR PUARTÂ IN FRIÛL LA EDIZION DAL 2028
“Graciis ae Union Martignà pe colaborazion. Un plasê rapresentâ la nestre tiere”
Daniele Puntel, il president de Associazion Sportive Furlane, la clape che e je daûr de machine de Selezion dal Friûl, in cubie cun Gabriele Violino, il responsabil pai rapuarts cu lis istituzions internazionâls, al è une vore braurôs de iniziative e des prospetivis che a stan vignint fûr.
◆ La prime, storiche partecipazion di une scuadre furlane a la Europeada e je bielzà un motîf di svant. La cubie di alenadôrs, Mauro Lizzi e Devid Trangoni, insiemi cul valôr dai zuiadôrs, a sustin ambizions impuartantis.
◆“La cubie miôr che o podìn vê – lis peraulis di Puntel – par vuidâ la Selezion dal Friûl. Un plui espert e usât a tignî il mani intes situazions plui impegnativis, chel altri plui usât a mateâ cui zovins e a tirâ fûr risultâts preseâts. O scuen dî graciis al president de Union Martignà, Daniele Cattunar, che nus è simpri stât dongje e che al à dât un supuart cetant grant ae nestre iniziative, cu la pussibilitât di poiâsi al so sodalizi par iscrivi la scuadre e rispietâ i aspiets burocratics. E graciis al president de Leghe nazionâl taliane dai Diletants dal Friûl-Vignesie Julie, Ermes Canciani, che nus à conseât il troi di bati par rivâ a fâ dut. Il fat che la nestre regjon e mandi dôs scuadris, la Selezion dal Friûl, e la Selezion dai slovens in Italie, e je une biele robe. Sperìn di fâ une vore ben, ancje parcè che mi plasarès rivâ a puartâ la edizion dal 2028 in Friûl. Cul jutori des Istituzions e dai apassionâts, al podarès vignî fûr un spetacul”. ❚
