Messâl: de pazience ae resilience

Al fâs ben, dopo cualchi mês, tornâ a dâ un voli ai articui, intervistis e riflessions metudis sui gjornâi in ocasion dal “no” de Conference episcopâl taliane ae aprovazion dal Messâl par furlan. Chê sentence e je stade une doce glaçade. La int dal Friûl, incassât il colp, e à rispuindût cun sintiment ae provocazion. Pre Roman Michelot, te messe fate pe ocasion te gleseute di Sant Jacum a Vilegnove di San Denêl, presints 400 di lôr, al à dit:
“È questo un modo per ringraziare chi ha lavorato e pregare per chi è stato contrario all’approvazione del Messâl. Mai celebrerei una messa per fini rivendicativi o per vendetta. Si benedice, non si maledice”.
◆ Il Vescul al à dât lis sôs promessis e istituzions civîls, Comuns e associazions a àn fat sintî limpie e clare la lôr vôs a favôr dal Messâl.
Si pues dî: int di ogni fate, cristians e no cristians, si son cjatâts unîts tune proteste corâl sore di un “no” che nus à fats sintî ancjemò une volte umiliâts, tibiâts, bandonâts. E chest si strissine di passe vincj agns incà.
◆ O ricuardi ancjemò il gardenâl Pietro Parolin, segretari di stât dal Vatican, cuant che al prin di Fevrâr dal 2018, tal presentâ la gnove edizion de Bibie te sale de Vite Catoliche a Udin, al à fate une lezion magjistrâl sul valôr de peraule di Diu incjarnade te lenghe di un popul.
Dut ben, ma ae domande: “A quando il Messale?” il gardenâl, no lu à dit ma al à fat capî, che i timps a saressin stâts luncs e al à racomandât a ducj: “Pazienza. Dovete avere pazienza”.
◆ La peraule “pazience” mi fâs ricuardâ la riflession di Walter Tomada su chest gjornâl tal Dicembar dal 2023: “Par nô al continue a jessi il timp de limuesine, dal scugnî domandâ ben planc e par plasê ce che al varès di jessi un dirit e un vantaç pe stesse glesie”.
A chest pont mi domandi se la pazience dai furlans e sedi une virtût o une rassegnazion.
In cheste situazion balarine, mi à fat une vore di ben la leture dal libri “La pedagogia degli oppressi” di Paulo Freire, un scrit che al cîr la risultive e la soluzion dai nestris problemis te cussience / cussientizazion dal popul, tune scuele popolâr li che la int cu la sô vite e culture e fâs di mestre e li che un sglavin di nozions e di informazions a vegnin sostituidis di clâfs di leture de realtât.
◆ O vin di convincisi che al è rivât il moment di impegnâsi di plui pe presince de lenghe furlane tes glesiis. O vin di passâ de pazience ae resilience, di un tignî dûr passîf a un atîf, dal spietâ il Messâl al meti jù lis cundizions par che il Messâl nol rivi come un forest a cjase nestre.
Se di une bande ducj o savìn che e je necessarie e indispensabil la vidimazion di Rome, di chê altre o vin di fâsi la domande: “Come comunitâts cristianis, sino o sarìno pronts a doprâ il Messâl?”
In Friûl la int che e partecipe ae messe de domenie e je une minorance: cemût mai chest bandon? Ise dome ae int che no i interesse la religjon o isal il mût e il lengaç de messe che nol comuniche cu la int? E dopo: trops predis si impegnino tune messe par furlan? In tropis glesiis di domenie vegnie fate une leture par furlan? Ancjemò in dì di vuê e vâl la regule che a messe si pues fâle se lis cundizions lu permetin. A àn di sedi dacuardi ducj i predis de zone; in plui, se dome un fedêl su cent nol capìs il furlan, par rispiet di chel fedêl bisugne fâle par talian.
◆ Volêi ben al Messâl par furlan al vûl dî rindisi cont di cheste realtât. Chei che a frecuentin la glesie a àn di capî che l’avignî dal Messâl nol è tes mans di Rome, ni dai predis che indi è simpri mancul e simpri plui forescj, ma tes mans di feminis e oms, personis responsabilis e impegnadis par une pastorâl gnove, fra vanzeli e puars tes nestris comunitâts e colaborazions pastorâls.
I grancj moments dal Friûl no comencin mai des istituzions ma de volontât e de partecipazion popolâr. La esperience de ricostruzion dopo dal taramot dal 1976 e de istituzion de universitât lu dimostrin.
◆ In Friûl i timps epics a son simpri vignûts e vivûts dal popul, de int tune spiritualitât dulà che il sfortunât, il disabil, il pierdût, l’escludût a tegnin il prin puest.
Par che il Messâl par furlan, vût il benstâ di Rome, un doman nol ledi di mufe bandonât tes sagristiis, i cristians furlans, feminis e oms, a àn di tirâ sù lis maniis de cjamese, dâsi da fâ, sintîsi personis responsabilis in cheste situazion di glesie. O scugnìn passâ de pazience ae resilience. ❚