✽✽ I prins dal an passât o vevin domandât di slargjâ lis pretesis par chel che al tocje la domande di autonomisim, par che no si fermàs dome a une fâ une liste di principis sacris in cont de libertât e de autodeterminazion dai popui, ma che e sburtàs par metiju in vore, almancul in part. O domandavin, in sumis, di meti adun utopie e concretece.
✽✽ O crôt che il gjornâl, la clape, i abonâts e ducj chei che a stan daûr aes iniziativis puartadis indenant vie pal 2023, a puedin confermâ i nestris sfuarçs e il fat che no si sin tirâts indaûr par nuie. Ma jessi contents dal lavôr fat, di trop che o sin rivâts a tirâ sù intal ortut de Patrie, nol covente a nuie se no podìn metilu a miezis cul stes sfuarç fat tor ator di nô.
✽✽ O vin di jessi clârs: invezit di fâ pas indenant, o podìn dî che la bataie su la cuistion furlane, par jessi bogns, si è impoçade, cun cualchi sbroc di vivarosetât dome denant di ofesis macroscopichis, tant che il dinei al Messâl par furlan.
✽✽ E je une afermazion pesant, parcè che intant i siei nemîs a àn fat progrès grancj e a son rivât a meti sù ostacui simpri plui grancj inte metude in vore dai dirits dal popul furlan.
✽✽ Se intal Zenâr dal 2023, o vevin la sensazion fuarte che concets tant che “Triveneto” e “grande Nordest” no jerin dome rivocs di grups politics e industriâi, vuê o podìn ricognossi cemût che chescj plans a sedin daûr a afermâsi cence cjatâ nissun resistence.
✽✽ O sin denant di une capitolazion cence cundizions, une bandiere blancje svintulade cun sodisfazion e compensade cun prebendis eletorâls e manageriâls sioris.
✽✽ In chest contest il Friûl al viôt lâ in mancul il so pês intes sieltis strategjichis che a contin, e al paie il cont di un declin demografic dramatic, compagnât di un disvilup che nol esistent, o che al è cence cjâf cuant che al pues gjoldi di une distribuzion a ploie di risorsis economichis mai viodudis prime inte nestre regjon. Milions di euros dâts fûr e risultâts assents, come che o podìn viodin a clâr in ducj i setôrs de vite publiche, tacant de sanitât.
✽✽ Vaìnsi intor alore, cemût che o vin fat dispès tal passât? Al è cualchidun che al dîs che no vin plui nancje lis lagrimis par fâlu.
✽✽ Alore fuarce, dismovìnsi, cence miezis peraulis “Fuarce Friûl” e nin indenant. ❚