Interviste a Celestino Vezzi, animadôr culturâl cjargnel
che al à fat tant par valorizâ la sô tiere
Celestino Vezzi, classe 1955, al è une figure di riferiment pe culture de Cjargne. Scritôr, ideadôr e condutôr di programs radiofonics e televisîfs par Radio Stereo Carnia, Radio Studio Nord, colaboradôr di Radio Onde Furlane e Radio Spazio 103. In television al à lavorât cun Video Strega di Çurçuvint e al è la muse storiche di Video Tele Carnia. Al fâs part de Union Scritôrs Furlans, e al è cofondadôr dal Circul Culturâl «La Dalbide» di Çurçuvint, de «Clape Culturâl Cjargnele Stele di mont» de Associazion Culturâl «Luigi Candoni» di Darte. Al à vût scrit articui par tantis publicazions in Friûl. A son infinidis lis sôs colaborazions e iniziativis in cjamp culturâl, spieli di une vere passion pe Cjargne e pal Friûl.
_
Celestino, tu tu sês nassût in Cjargne, e tai agns 50-60 o imagjini che al fos un ambient dal dut furlan.
Sì, o soi nassût a Çurçuvint, un paisut che al viveve di agriculture e, magari cussì no, di emigrazion pai oms. Un paîs che nol jere dal sigûr in centri, duncje sì, si fevelave in pratiche nome par cjargnel. Par assurt, cumò che no je plui emigrazion tal forest a son restadis mancul di 700 personis di mil che a jerin in chê volte!
_
Ce scuelis âstu fat?
Jo o soi di une famee che o jerin in 11 fra fradis e sûrs. No vin mai patît la fam, ma la vite e jere chê che jere. Jo de etât di cuatri agns fin ai 15 o soi lât in coleç, prin a Lignan e dopo in seminari a San Vît e fintremai a San Bonifacio, a Verone. Vie par chest agns, o ai patît une vore la nostalgjie di cjase, e par fâi cuintri o ai tacât a studiâ la storie dal Friûl, cun chel che o rivavi a cjatâ.
_
E cuant sêstu tornât in Cjargne?
Stant che o jeri un frut avonde cjaviestri e cun ideis masse indevant pai chei timps, no ai finît lis scuelis magjistrâls e o soi tornât in Cjargne, sintintlis di gno pari. A Tumieç tes magjistrâls nol jere puest e o ai fat l’istitût tecnic par radiomontadôr. A scuele o vevi un professôr che al jere tal Moviment Friûl, Carlo Alberto Bonesi, che viodint che o vevi la passion pe nestre tiere mi à domandât di dâi une man. E cussì tal 1973 o ai fat la campagne eletorâl pal Moviment Friûl, che no jeri nancje “maggiorenne”: in chê volte si votave a 21 agns. O soi lât ator come che si faseve in chê volte, cu la machine e il megafon, daûr di Cornelia Puppini D’Agaro, une grande persone che mi à pocât ancjemò di plui tes mês convinzions. Mi somee ancjemò di viodile devant des latariis a fâ comizis par furlan, une robe che in chê volte no si usave fâ, che e jere la manìe dal talian. E ti incantesemave, cun la sô grinte e cul savê esponi ben il so pinsîr e lis rivendicazions dal Moviment.
_
Simpri in chê volte, tu ti sês cjatât cun pre Toni…
Sì, al jere intal ’74 o ’75 e o ai cognossût par câs pre Toni Beline, che al passave par Çurçuvint par vie che al stave lavorant sul libri «Siôr Santul». O vevi sintût fevelâ di lui: al jere un di chei predis che a tacavin a menâ indevant la idee di popul furlan. Personaçs tant che pre ’Sef Cjargnel e pre Laurinç Dentesano, predis de plêf di Sante Marie di Guart, che a fondarin la clape «Cjargnei cence Diu» a Davâr.
Viodint che o jeri interessât al Friûl, pre Toni mi à prestât cualchi libri, e fra chei mi visi ben «La cuintristorie dal Friûl» di pre Bepo Marchet e pre Checo Placerean: mi à dit “lei chescj, che dopo ti procuri altris”. E cussì al è tacât un rapuart che al è lât indevant e tai agns al è simpri stât un riferiment par me.
_
Tu mi âs dit che tu vevis za studiât la storie dal Friûl, ce impression ti aie fat la Cuintristorie?
Al è stât un bot. Mi à ribaltât il concet di storie dai scrits “uficiâi” che o vevi let prime: mi soi rindût cont che no te contavin propit juste. E mi visi la gjonde di rindimi cont che no jerin di mancul di chei altris. Chei altris libris no disin nuie o piç dal Patriarcjât, par dî une. Chest ti sburte a lâ plui insot aes robis e a fâ vierzi i voi a altre int.
_
Tu ti sintistu plui storic o studiôs di tradizions, o gjornalist?
Prin di dut si à di dî che o soi un autodidat. Mi soi interessât di tradizions parcè che o volevi cirî di memoreâ e di salvâ cheste storie che i libris talians no contavin. Po dopo, daûr di chel, mi àn domandât di scrivi articui e opinions su la Cjargne e o ai colaborât cun tancj – o nomeni par ducj Etelredo Pascolo che al faseve «Int Furlane», une grande persone – ma no mi soi mai interessât a deventâ gjornalist in maniere uficiâl. In chest mi à judât il fat che o vevi un lavôr che mi permeteve di vê timp par stâ daûr a cheste passion.
_
Ce lavôr âstu fat?
Eh… o ai fat il concors di sotuficiâl tal esercit. Un lavôr che al è in contrast cun dut chel che o vin fevelât prime, se tu pensis che une des bataiis plui grandis dal Moviment Friûl e jere cuintri lis servitûts militârs. E di fat o ai vût un tic di crisi di cussience, ma mi visi che mi soi confrontât propit cun pre Toni. Lui mi à vût dit che l’impuartant al è vê la sigurece, dopo se no tu ti fasis condizionâ dal lavôr, fûr di chel tu puedis batiti pe tô tiere. E cussì mi à dât il sburt par lâ indevant, e rivant fra i prins dal concors o ai vût mût di sielzi di restâ a vore chenti.
_
Cualchi personalitât che tu valutis impuartante pe Cjargne…
Un che mi ven iniment, ancje se no condividevi lis sôs ideis politichis, al jere Leo Zanier. Un altri cussì al jere Giorgio Ferigo, che o ai fat cun lui tancj lavôrs insiemi. O jerin in sintonie su tantis robis, ma no te vision politiche: par me prime e à di vignî la autonomie. Un che par esempli nol è des mês ideis ma che o ai grande amirazion al è Franceschino Barazzutti: al à il so orientament, al è di çampe estreme, ma al met prime la sô tiere rispiet a dut, e tai rapuarts personâi, cuant che al è di difindi la Cjargne, il rest al passe in secont plan. Al à une grinte e une passion di no crodi.
_
A proposit di politiche, isal un personaç che al pues jessi un riferiment autonomist e furlanist?
O scuen dî che no ’nt cjati. O ai viodût tancj di lôr pierdisi pe strade. Magari in origjin a tacavin ben, ma o ai viodût tancj cambiaments in corse. O pues nomenâ la Cornelia e vonde: dopo di jê a son stadis sflamiadis che però si son sfantadis tal timp. Ancje in Cjargne no mi ven iniment un riferiment sigûr e coerent. E al mancje ancjemò vuê: no vin une figure influente, buine di meti adun lis istancis autonomistichis de Cjargne, di pretindi chel che o vin bisugne cence fâsi condizionâ dal partît.
_
Tal cjamp de leterature, cualchi autôr par te impuartant, di lei…
Un classic tant che Bindo Chiurlo, che o ai tacât a lei parcè che mal à passât pre Toni. Gjiso Fior, di lui mi visi une biele racuelte di vilotis cjargnelis, o ancje pre Zaneto. Mi à plasût tant «Lis predicjis dal muini» di pre Bepo Marchet, che lu vin nomenât prime pe Cuintristorie. «Antigais», poesiis di Enrico Fruch. E o ai let un grum di robe di pre Meni Zannier, cumò no mi vegnin i titui, mi visi «I Dumblis Patriarcâi». La poesie di Sandro Noiaretti. Siro Angeli, che o ai vût mût di cognossilu e di fevelâ cun lui. E par fevelâ di un plui dongje di nô tal timp, un che o ai cognossût e che o soi restât in contat al jere Pierluigi Cappello.
_
E personaçs de culture impuartants par te?
Simpri pe Cjargne, Renzo Balzan. Cun lui o vin fat tantis iniziativis insiemi. Sparît lui si è pierdût un tic il contat cui Ladins, un rûl che secont me al varès di fâlu la Societât Filologjiche Furlane, che o vevin la sede in Cjargne ma cumò e je sierade. O ai la impression che, pe politiche, in Friûl la perifarie no à place.
_
Un libri o un personaç di tornâ a scuvierzi?
Un non che o ai tant gust di marcâ al è une persone no avonde celebrade, che però al à savût fâ viodi tant ben la Cjargne in cjamp teatrâl, ancje se cun oparis massime par talian, che al è Luigi Candoni. Une figure forsit masse indevant, cu la sô opare di stamp pôc popolâr. Al à scrit ancje poesiis e mi visi une li che al nomenave il Carducci, che al piturave la Cjargne cuntune vision bucoliche plene di fadis e di striis, ma nol viodeve “chê curve di femine cul zei sù pes rivis cu la cjame”. Cualchi opare impuartante che mi ven di nomenâ e je «Desiderio del sabato sera» sul drame de emigrazion, che al voltà ancje par furlan, «I fuochi sulle colline» e «L’altra diga» sul disastri dal Vaiont. ❚
………………………………………………………………………………
FOCUS. Il personaç
LUIGI CANDONI Nassût a Cedarcjis intal 1921 e muart a Udin intal 1974, al è stât publicist, animadôr culturâl, ancje romanzîr e poete, dramaturc e scritôr pe radio e pal cine. Laureât intal 1945 ae Universitât di Triest in economie e cumierç, al puarte indevant in paralêl la vocazion dramaturgjiche cun cetancj scrits, vincint intal 1953 il premi Murano cun «Un uomo da nulla». Simpri al 1953 al rimonte «Il desiderio del sabato sera» (che al voltà ancje par furlan) sul drame de emigrazion in Cjargne. Trasferît a Rome, tancj interpretis famôs a àn recitât i siei tescj, di Camillo Pilotto a Valentina Fortunato, Alberto Lupo, Corrado Pani e Paola Borboni. Al centri de sô opare e je la crisi dal om contemporani, pierdût tra il tramont dai valôrs tradizionâi e la tension spirituâl viers de ricercje de veretât e dal recupar de umanitât. Tornât in Friûl, al è stât ancje chi protagonist di tantis iniziativis e ativitâts e al à scrit la sô uniche opare in lenghe furlane «Strissant vie pe gnot» intal 1974. ❚
