Il campion paraolimpic di Roncjis, cumò impegnât cu la Cope dal Mont di ciclisim, al à l’obietîf di jentrâ te scuadre taliane a Parîs, intal mês di Avost
Si puedial insumiâsi di lâ a lis Olimpiadis a 54 agns, par cori intune gare di ciclisim cun aversariis cetant plui zovins e vê la aspirazion di vinci une medaie? Sì, ma dome se tu ti clamis Michele Pittacolo e tu âs bielzà vinçût cincuante titui talians, in diviersis specialitâts, su strade e fûr strade, une medaie di bronç olimpiche a Londre intal 2012 e un biel numar di corsis internazionâls.
_
Michele, cemût isal cori cuintri int cetant plui zovine?
“Al è di cuant che o vevi 13 agns che o soi impegnât a cori. Intal 2006, o ai vinçût il titul talian dai masters, su strade. Dopo di un incident che al podeve copâmi, intal 2007, o ai tacât a cori intes categoriis paraolimpichis e mi soi cjapât une vore di sodisfazions corint par dut il mont. I agns a passin, a son vignûts fûr tancj zovins e jo o cîr di jessi simpri competitîf. A 54 agns nol è simpri facil tignî il colp: dut câs o ai la passion di simpri, il snait, la voie di alenâmi e obietîfs simpri prestigjôs”.
_
Cemût âstu tacât?
“O soi nassût intal 1970 e o ai tacât a cori in biciclete intal 1983 cul Velo Club di Tisane, dongje cjase. Intal 1989 o soi passât a cori inte categorie dai diletants e intai agns fin al 1995 o soi rivât a vinci siet voltis. O jeri competitîf ancje a nivel internazionâl, tant che o ai vinçût une corse in Cravuazie, cuintri professioniscj. Il moment plui alt de gno prime cariere su strade al è stât il titul talian dai masters, i amadôrs, intal 2006. Intant, o vevi ancje scomençât a cori fûr strade, cu la mountain bike: une specialitât che mi è simpri plasude e dulà che o ai vinçût tresinte corsis, di bot”.
_
Une prime cariere preseade.
E la seconde “Ai 12 di Setembar dal 2007 o corevi in alenament su lis mês stradis di simpri. Un incident, une machine di traviers e il bot. Di li, terapie intensive, par setemanis o jeri sul ôr fra la vite e la muart. Un periodi cetant lunc, là che o ai tirât a ciment no dome il gno fisic, ma ancje dutis lis sigurecis che o vevi, massime chê di vivi une vite regolâr. Di chê volte, o ai intal cjâf une plache e dut il vues a man drete al è fat di resine. O fâs fature a fevelâ e a fâmi intindi, no controli ben la man diestre e o ai la spale çampe mal metude. Dut câs, no ai mai pensât di molâ. E l’ambient paraolimpic mi à dât cetantis sodisfazions.”
_
Cemût âstu fat a deventâ atlete paraolimpic?
“Intal 2009 o ai fat lis visitis di classificazion e o soi jentrât te categorie MC4. O ai vinçût di bot doi titui talians in piste e mi àn clamât inte nazionâl taliane, par cori il campionât mondiâl a Bogogno, in Piemont. Daurman, o ai metût in sachete doi titui mondiâi, a cronometri e su strade, e di li, o soi lât indenant. Intal stes an o ai vinçût ancje il titul mondiâl su piste, a Manchester, inte dissipline dal inseguiment individuâl, fasint ancje il record dal mont. Disìn che o ai tacât cetant ben”.
_
Doi moments: lis Olimpiadis di Londre intal 2012, e i Mondiâi a Manià intal 2018. Emozions?
“Ai 6 di Setembar, a Londre, la zornade dopo dal gno complean, e je stade une des sodisfazions plui bielis par me: la medaie di bronç a Londre. Un ricognossiment di dut il lavôr, dut il mateâ, i alenaments, la preparazion, il sburtâ simpri indenant. Intes cundizions che o jeri, un premi pardabon. Intal 2018 o rivavi di stagjons di alts e bas, parcè che no dut al jere lât come che al veve. Intal 2016 no mi àn clamât pes Olimpiadis di Rio de Janeiro e e je state une delusion. Cualchi incident mecanic, sfortune, problemis: mi soi ancje fermât di colp. Intal 2017 ai Mondiâi in Sudafriche no rivavi a lâ indenant. O ai scugnût tornâ a scomençâ dal principi par jessi pront pal 2018 e il sucès di chel an, intal mieç de mê int, intal gno Friûl, che mi à dât une emozion di no crodi. Il titul mondiâl numar 6”.
_
Cumò, simpri in ativitât, il sium al è chel di tornâ aes Olimpiadis a Parîs, dodis agns dopo di chês di Londre.
“O lavorìn par restâ competitîfs: ogni an che al passe, i aversaris a son simpri plui zovins e il nivel al è simpri plui alt. Cumò, prime di pensâ a ce che al sarà intal mês di Avost, o ai l’obietîf di fâ ben intes tapis de Cope dal Mont, a Ostenda e a Manià, intal mês di Mai. E, ancjemò prime, o ai la gare di Cope Europeane a Verolanuova e i campionâts talians. O voi a cirî il titul talian numar 50. Daspò di chês, viodarìn”. ❚
:::::::::::::::::::::::::::::::::::::::::::::::::::::::::::::::::::::::::::::::::::
Pitta Bike, in trê agns, bielzà une scuadre di nivel
Pôcs, ma bogns! Intal zîr di trê agns, la Associazion Pitta Bike e je rivade a rimpinâsi sù pes classifichis talianis di rindiment fin aes primis posizions. Trê tesserâts, Michele Pittacolo, che al è ancje brand ambassador de Regjon Friûl-Vignesie Julie, Pierluigi Sclip e Emanuele Pestrin, i ultins doi impegnâts sul tandem par ipovedents, cun Emanuele tant che vuide par Pierluigi, e risultâts preseâts, cun medaiis une daûr di chê altre a nivel talian. Propit Michele, che al à vût il so esordi chest an cu la nazionâl taliane in Australie, al à decidût di lassâ la piste par pontâ dome su la strade e fâ ben alì. Intal mês di Març, Emanuele al è lât ancje ai Mondiâi su piste, in Brasîl, clamât dal comissari tecnic talian Silvano Perusini, di Sedean. Une nazionâl taliane sburtade dai furlans!
◆ E no dome competizion. La Pitta Bike e à tacât a meti sù ancje events: il prin trofeu Citât di Roncjis, ai prins di Otubar dal 2023, al è stât un sucès organizatîf: une gare di mandâ indenant. ❚
::::::::::::::::::::::::::::::::::::::::::::::::::::::::::::::::::::::::::::::::::::
MANIÀ CAPITÂL DAL CICLISIM PARAOLIMPIC. A MAI, E TORNE LA COPE DAL MONT
Dai 16 ai 19 dal mês di Mai, Manià e tornarà a jessi la capitâl dal ciclisim paraolimpic. La tape di Cope dal Mont, dedeade a Mauro Valentini, si corarà propit inte citât dal curtis, cun dute la int furlane che e à fintremai adotât i atletis, che a rivaran di dut il Mont. Une biele ocasion di sport, di inclusivitât e di competizion. E une cetant preseade oportunitât par viodi i miôr campions in Friûl. ❚
