Multis se si fume in zardin

Par vie di un acuardi juridic, i carinzians a puedin aromai fumâ intal lôr zardin dome in cierts oraris e, se no ju rispietin, a puedin cjapâ multis di centenârs di euros.
◆ Fumadôrs e no fumadôrs si pitufin di un continui. Ma chest câs nus somee propit spropositât.
◆ Intun apartament cun zardin a Clanfurt a vivin doi fumadôrs incagnîts, fat che za timp indaûr al veve inviât cetancj problemis, par vie che ogni volte che a fumavin in zardin – e lu fasevin dispès – l’apartament al plan disore si imbombave di nulôr di nicotine, creant cetant malstâ intai abitants no fumadôrs dal stes. Il fum, lant sù dal zardin, al jentrave par dret inte cjamare di chescj no fumadôrs, che par chel no podevin areâ, ni fâ di gulizion sul puiûl. Ducj i tentatîfs di conciliazion cu lis buinis a son colâts tal vueit, cu la consecuence che i no fumadôrs a àn inviât une azion legâl inibitorie cuintri dai fumadôrs. Si rive a un procès che al finìs cuntun acuardi juridic dal dut straordenari: i fumadôrs si son cjapâts sù l’oblic di fumâ intal lôr zardin dome in cierts oraris, se no a saressin stât multâts. E al è sucedût propit cussì. I fumadôrs a son lâts indenant a fumâ ancje intes oris improibidis, scugnint paiâ une multe, no cate che a fossin intal lôr zardin.
◆ Par chest, il tribunâl al à imponût par dôs voltis lis multis cuintri dai fumadôrs, e ognidun di lôr al à scugnût paiâ centenârs di euros, stant che un acuardi di cheste fate al è valit par leç a ducj i efiets, e al va rispietât come une sentence; si che duncje il mancjât rispiet dal acuardi al pues jessi denunziât. E cussì al è stât fat. Ben clâr che la mancjance e va provade cun fotos, videos o testemonis, e fâ ricors nol varès sens in presince di un acuardi juridic, stant che si larès a procès cuntune sentence scontade, che e puartarès i fumadôrs a scugnî paiâ ancje lis spesis dal procès. Dut câs al somee che di in chê volte lis parts a sedin in pâs o almancul che no sedin plui stadis denunziis.
◆ E a chest pont ognidun di nô al varà pensât: “tant che in Italie!”, là che aromai il rispiet pal prossim al è un concet plui che sorpassât, a pro de arogance e dal egocentrisim. Us disarai di plui: nol è dit che se o clamais lis fuarcis dal ordin par che a fasedin rispietâ lis regulis di une convivence civîl, chestis a rivedin. Chest – magari cussì no – al puarte cualchi citadin a lâ fûr di misure e a cirî di dâsi justizie di bessôl. Daûr di un titul di un saç resint, al ven di dî che aromai o vivìn pardabon intun mont al contrari. ❚