Nadison tant che il Missisippi
Il Judri o il Nadison tant che il Missisipi? I cjamps di coton tant che i vignâi sui roncs? La sclavitût dal popul neri tant che la alienazion dai operaris de cjadree? Forsit chest ultin paragon al è un pôc esagjerât, ma il paisaç di chenti nol à dal sigûr nuie ce invidiâ a chel dal delte dal Mississipi dulà che tai prins dal 900 al è nassût e si è disvilupât il blues.
Il scjafoiaç des zonis paludosis dal delte al è dal dut difarent rispiet al nestri simpri plui stramp clime prealpin, ma la omogjenitât dal teritori e lis monoculturis intensivis a stiçin in maniere alternative (come te iconografie dai vecjos Bluesman) la sensazion di une vite rurâl che e cor lente e cuiete, ma ancje la opression par un paisaç ripetitîf in maniere ossessive.
“Fra plagnis psichedelichis di otobar, cori cul Benellin, sintî l’ajar ta muse, e i corvats scazzâts che sgarfin fra i prâts…” (F.Riz – Plagnis di Otobar).
“Dôs di dopomisdì dentri un labirint… mi cjali atôr no viodi altri che vîts blave e vîts blave e vîts blave e vîts…” (Pantan – Blave e Vits).
Ma lis afinitâts cu la musiche nere, mari dal Jazz e dal Rock & Roll, no son dome tal paisaç.
Il sintiment malinconic dai tescj dai tocs plui rapresentatîfs dai “bluesoms” di chenti, al esprim un evident spleen esistenziâl e al fronte une serie di tematichis che a àn afinitâts cetant fuartis cul blues rurâl dal inizi dal secul passât.
Dongje l’unfiâr al sangane el miò cûr crevât, tal freit tal cjalt cence poure di no ve plui nuje, une identitât une cjase une femine un nom, parcè che o soi vêr e o ‘nd ai dute la me poesie (Raff BB Lazzara – Talkandombluus)
E ancje il teme di un cicli produtîf ripetitîf e spersonalizant al torne spes, metint dongje il lavôr dal coton a chel intai vignâi e tes fabrichis di cjadreis.
“Dute le vite a cirì une midisine par guarì dal mâl che mi vês fat… la midisine juste par un pipinot a suste” (Pit Ryan & Madman Blues – La midisine juste).
Il Friûl al è chest ca, bevi tajs e lavorâ… Si lavore si lavore e tal ultim craaak, finît dut (Pit Ryan & Madman Blues – Si lavore si lavore).
Chescj a son dome pôcs esemplis di artiscj che no vuelin imitâ un gjenar, ma che, cjapant spont e ispirazion dal lôr vivi di ogni dì, a sbrochin intune poetiche sorprendentementri simile a lis lirichis di int come Robert Johnson o John Lee Hooker jenfri i tancj che a podaressin citâ.
Dree Gardenâl, filolic e promotôr di chest moviment musicâl, al teorize che la cause principâl di chest sintiment malinconic e sedi il confin, che dilunc dai cuei e tor ator dai flums al à taiât par agnorums chest teritori. Un confin che al à stiçât, no dome in maniere simboliche, un sintiment di incomunicabilitât e al à influenzât a fuart cheste corint musicâl/poetiche.
“Omp sul cunfin, frontat in tai crets, par cirì un ecuilibri… e lis tos cjartis no tu lis as mai giuadis ben” (F.Riz – Omp sul cunfin).
Podìno duncje afermâ di jessi la seconde patrie dal Blues? No pues jessi dome une coincidence che jenfri piçui paîs tant che Cuar di Rosacis, Cormons o Brazan si sedin concentrâts cetancj musiciscj e cjantautôrs furlans cussì dongje a la estetiche e a la poetiche dal Blues. Forsit no varessin di jessi masse braurôs des nestris tindincis depressivis. Purtrop se o din par buine la ecuazion che no esist art cence patiment alore nus tocje propit fâ i conts cun cheste inclasificabile “saudade furlane”.
Personalmentri no soi mai stât di cheste scuele di pinsîr e, tant che braurôs autocton di cheste zone dal Friûl, o preferìs continuâ a pensâ che daûr de nestre endemiche riservatece e dal nestri spirit contemplatîf si platedi dome une fuarte e preziose sensibilitât.
_________________________________________________
La storie di une gjernazie rock nassude chenti
Aromai al è già jentrât te storie il megaconciert di Zenâr tal circul Arci ZOO di Udin: un spetaculon dal vîf cun protagoniscj une clape di personaçs une vore cognossûts tal zîr dal underground furlan, ven a stâi Fabian Riz Trio di Brazan, Pit Ryan & Mad Men Blues di Cuar di Rosacis, i Pantan di Gurize, Raff BB Lazzara di Cormons e Loris Vescul di Trivignan, ducj artiscj sponsorizâts de etichete “Musiche Furlane Fuarte”.
Un conciert ripetût un mês dopo te Vecje Ostarie di Spesse di Cividât, cheste volte dome cul Riz Trio, Mad Men Blues e ospits preseâts come Max Felcar, Manu Casarot e Lussie di Uanis… E mertarès propit une medaie cheste ostarie, un dai prins ambients a proponi rock e blues dal vîf, une sorte di cjase vierte e spazi di sperimentazion libertarie: no par nuie e je di agnoruns la sede uficiose dal Bluesclub 356, une bande zingare che e sburte indenant i bluesoms des culinis e de plane.
Chescj doi spetacui si puedin considerâ la ponte di un moviment musicâl e culturâl nassût tal mieç dai Cuei Orientâi, plui o mancul fra Cuar e Cormons, cun ramificazions che a rivin fint a Orsarie, Udin e Gurize e che a cjapin dentri cuissà trops cjantons sparniçats ca e là pal Friûl.
Lis origins dal moviment che cumò o clamìn (forsit cence masse originalitât) “Blues dai Cuei” si puedin cjatâ te ativitât pionieristiche tai prins agns 80 dal Circul Culturâl di Cuar di Rosacis; dute int apasionade di discs rock-blues che e organizave i prins concierts in zone, e che par chest e jere un pont di riferiment naturâl pai zovins alternatîfs di chenti.
Tai paisuts di in chê volte no jerin masse robis par divertîsi, ma par fortune si cjatave simpri un amì o un cusin plui grant che ti menave ator pai rarissins concierts dal circondari e che ti faseve scoltâ robe mitiche in vinîl, come Neil Young e Cream, Hendrix e Muddy Waters, Ramones e Pink Floyd, S.R.Vaughan e Genesis, Buddy Guy e Rory Gallagher, Hot Tuna e Led Zeppelin.
Insome, dut chest al jere une maniere creative par metisi dongje tal disorientament dai agns post taramot, une buine rispueste pai dubis adolescenziâi e un stimul ecezionâl par imparâ a sunâ cualchi strument.
Cui che al imparave alc lu insegnave ai siei amîs e si faseve musiche improvisade tes cantinis, tes fiestis e in altris lûcs di Cuar come il vecjo CSO e soredut il legjendari MEETING di place Julia, che al è stât par agns un laboratori creatîf frecuentât di musiciscj, artiscj e ogni sorte di int sclopade…cussì forsit al è nassut il blues dai Cuei.
Musiciscj di lusso come Peter Sammonds, Lucky Gherghetta e Frank De Colle, Pit Ryan e Stiv Odorico, Fabio Drusin e Mauro Bon a son saltâts fûr ducj di chei agns stranis e maraveôs.
In realtât il blues furlan nol è dut ca, plui indenant une altre generazion di rockers, punketârs e metalârs e sarès cressude par dut il Friul e altris celulis di blues rivoluzionari si saressin svilupadis par lôr cont a Triest o Pordenon, lontanis agns lûs dai Cuei ma destinadis in avignî a ricjatâsi e a colaborâ cu la int dal confin, e a messedâsi simpri di plui tra di lôr. Chest moviment, te sô dimension locâl di “Blues dai Cuei”, ‘al è cumò jenfri une scune regionâl che a ten dentri une stele di prime grandece come i W.I.N.D. e grups storics come MAD MEN BLUES, IATITATIA BLUES BAND, 4WD e MR. LUCKY BAND; realtâts consolidadis come PANTAN, OFF LIMITS e i SOUNDMACHINE dal grant FLAVIO PALUDETTI; soliscj transgjenics come LORIS VESCUL, IVAN MODA, PIT RYAN, MANU“O pazzo”CASAROT, FABIAN RIZ, STIEFIN FEDEL, LINO STRAULINO e la mine vagante dai TRASTOLONS (in particolâr RAFF. “BB” LAZZARA, LUSSIE di UANIS e l’ex F.L.K. GUIDO “CHE” CARRARA); talents emergjents come ELY SRV e ANTHONY BASSO, vecjos triestins come FRANCO TORO, JIMMY JOE e la gnovisime BLUE ROOTS BAND, par no cjacarâ di bielis bands aromai sparidis (ONE WAY OUT, RABBIT, RED HOUSE) o de vivarose sene rock-blues dai cuei slovens, cun dôs bands di ponte ben cognussudis in Europe come ANA PUPEDAN e ELVIS JACKSON…e cheste no je nancje une liste complete!
E tra ducj no podarìn mai dismenteâ la mitiche figure di RENATO RUSSIAN, cjantautôr maladet e gjeniâl di Cormons svolât vie masse zovin di cheste tiare.
No si sa ce destin che al spietarâ tal avignî a ducj chei sunadôrs che ancjemò no molin, a dispiet de indifarence dai mieçs di informazion (cun pocjis ecezions ben cugnussudis, soredut Radio Onde Furlane e Andrea Ioime), de inerzie de politiche e de croniche mancjance di bêçs e spazis par sunâ e par di plui, cjapâts pal cuel di leçs asurdis e controi che nancje i camoriscj! Tancj no àn ancjemò capît che dute la musiche furlane e che dai nestris bluesmen in particolâr e podarès jessi une impuartante risorse economiche e fintremai turistiche, oltri che mutîf di braure par ducj, pa la cuâl i din un piçul consei: provait a fâ un zîr par Dublin o par Memphis o par Austin e cjalait cemût che e ven valorizade la musiche là vie e dopo o podìn discuti.
Noatris no sin otimiscj par un slavin di resons, magari cussì no, ma une robe e je sigure: par trops berdeis e tramais che si puedin tirâ fûr dal cjapiel, nissun al rivarâ mai a studâ l’amôr par la musiche “che al môf il soreli e lis altris stelis” (forsit ancje Dante al jere un bluesman, cence savêlu).
That’s all, folks!
Dree Gardenâl
