I Concierts di Sant Martin in Cjargne

Tal ricuart di Canciani
e pe promozion de alte culture
tal Friûl de Alte
Si trate di une tradizion aromai, che si spere di podê rinovâ ancje chest an cence masse fastidis. A son i Concierts di San Martin in Cjargne che di disenûf agns incà, tra Tumieç, Paulâr e Çurçuvint, a ufrissin ae comunitât une rassegne musicâl tra Atom e Invier dedicade ae musiche classiche. Propit chê musiche che il Mestri e compositôr Giovanni Canciani (1936-2018), ideadôr de manifestazion, al à doprât par dute la vite tant che mieç di trasmission di cognossincis, cu la volontât di puartâ culture alte intal Friûl de Alte.
◆ Dî Concierts di Sant Martin in Cjargne, al vûl dî dut ma no dome intratigniment. Anzit, pôc e gran. Al vûl dî, intes intenzions dal so ideadôr, stâ insiemi cui grancj creadôrs de art musicâl de storie, par capîle e par fâle esempli di un vivi virtuôs.
◆ Il Mestri Canciani, no plui cun nô fisichementri, al esist e al vîf in dut il rest e in cheste rassegne, che e ven puartade indevant – su la fonde dai siei principis – dai siei erêts materiâi e spirituâi, e fra chei ancje jo che o scrîf, tant che ultin arlêf che al à imparât cetant e che inmò al impare di lui. Simpri dongje a son la citât e la parochie di Tumieç, i Comuns di Paulâr e di Çurçuvint, indulà che si davuelzaran i concierts, par un totâl di sîs apontament tra i 8 di Novembar e i 6 di Dicembar.
◆ Il probleme seri nol è chel di atirâ l’interès de int, che di simpri e partecipe e in grant numar. Il probleme cumò al è chel di rivâ a capî – e si scombat di dì in dì – se lis disposizions sui spetacui dal vîf, in relazion ae seconde ondade di Covid, a podaran permeti une gjestion “avonde normâl” de iniziative. Za la Regjon e à scurtât a un tierç lis afluencis a pet de capience di salis e teatris, e po dopo in Cjargne a son ben pôcs i lûcs di spetacul ben furnîts e cun spazis amplis. Une cuistion pesante di simpri, e in particolâr cumò che al è frêt, e che duncje in mont no si sa indulà lâ par fâ culture.
◆ Si spere che dut al ledi ben, aromai abituâts a prenotâ i concierts, ancje chei a gratis, come che si fâs pai ristorants, che gratis no son. Pai Concierts di Sant Martin si à di scrivi une mail, dentri de dì prime dal conciert, a museolamozartina@gmail.com, metint non, cognon e numar di telefon. Par fuarce di robis. Une telefonade e visarà de prenotazion lade a bon, fin che no finissin i puescj.
◆ Chest nol covente pal conciert di viertidure, aes 16 dai 8 di Novembar tal Domo di Tumieç (jentrade libare fin che no finissin i puescj, cu lis distancis justis), cuant che la Fvg Orchestra, direzude di Paolo Paroni, cul fenomen pianistic Alexander Gadjiev, e darà vôs a Ludwig van Beethoven a 250 agns de sô nassite, cul conciert par piano e orchestre “L’Imperadôr” e la Sinfonie numar 7. Musiche sinfoniche in viertidure di rassegne, come che al à simpri volût e fat il Mestri Canciani.
◆ Ai 15 di Novembar, cuntun conciert dopli, aes 16 e aes 18 par permeti a cetante plui int pussibile di partecipâ, tal Museu Cjargnel di Tumieç al sarà protagonist il zovin doi pianistic dai fradis Luciano e Daniele Boidi, tra oparis mestris di Rachmaninov, Schubert, Debussy, Brahms, Ravel.
◆ Ai 21, aes 20.45, si sarà tal Palaç Calice di Paulâr, une altre realtât rinassude in graciis di Canciani, cu  la presince de Orchestre dal Friûl Jacopo Linussio, fondade simpri dal Mestri, par pagjinis di autôrs furlans tant che Canciani stes, Domenico Montico e Carlo Rizzi, insiemi cul compositôr de Cechie Jan Krˇtitel Vanˇhal, par un biel confront musicâl. La dì dopo, fieste de patrone de musiche Sante Cecilie, aes 17.30 si torne al Museu Cjargnel par dâi vôs, par une altre tradizion, al clavicembal dal Sietcent di costruzion vienese apartignût ae famee Linussio, e che Canciani al à risussitât. Interpretis furlans ancje in chest câs: la sopran Arabella Cortese e il clavicembalist Alberto Busettini, cuntun program plen di passion dedicât al Baroc. I Concierts di Sant Martin si trasferissin a Çurçuvint, une localitât tant cjare al Mestri Canciani, pai ultins doi apontaments che a tacaran aes 17.30. Ai 29 di Novembar un cuartet zovin furlan e speciâl di sax, i Satèn Saxophone Quartet, al darà vôs ae musiche contemporanie di stamp european. Infin, ai 6 di Dicembar e je parone la armoniche, o miôr, trê armonichis par trê armoniciscj de nestre tiere: Andrea Nassivera, Diego Borghese e Adolfo del Cont, insiemi par esplorâ il folclôr de scuele russe. ❚