MUSICHE. La musiche furlane inte vôs dai fruts

Gnove jessude cu “La conte dal colibrì”
dal côr VocinVolo.
Interviste ae diretore Lucia Follador
Nassût tal 2006 dentri de scuele di musiche Ritmea di Udin, il côr VocinVolo direzût di Lucia Follador, al à l’anime salte, oneste, lavoradore, e furlane! Al è un côr di vôs blancjis e zovinis che al si è vuadagnât une fuarte nomee no dome in tiere furlane, ma ancje tal nazionâl e internazionâl, di gracie des tantis e interessantis iniziativis musicâls, conciertistichis e educativis che si valorizin soredut a partî di une declarade e orgoiose identitât.
◆ Ultime “fadie”, riprove e declarazion di chest alt sintiment di apartignince, e je la cjantose “La conte dal Colibrì”, scrite di bande di Bruno Fritsch, musicade da Alessio Domini, cjantade dal côr cul supuart di diviers musiciscj, e regjistrade tai studis Artesuono di Stefano Amerio a Cjavalì. Un biel toc musicâl che si puès scoltâ, e viodi, lant su YouTube e scrivint il so titul. Al merete di faul: lait, viodêt e scoltait. E prime di contâ la storie di VocinVolo a traviers une interviste ae diretore Lucia Follador, dôs notiziis sul côr al va ben di anticipâlis, ancje par invidâ furlanutis e furlanuts, ma no dome, a jentrâ dentri di chest biel mont.
◆ Si pues fâ part de famee di VocinVolo a partî dai cuatri agns e fint ai disevot, par un percors condividût di cressite artistiche e umane di grande cualitât e sintiment (vocinvolo.ritmea.it). Cumò il côr al è componût di une cincuantine di frutis, fruts, fantatis e fantats, che a vegnin soredut di Udin e dai comuns vicins, ma no mancjin coriscj origjinaris dal Brasîl, da Romanie, da l’Albanie, par un lûc di musiche e di fâ musiche di largjis viodudis, culturis e condivisions. Furlans a son ancje i musiciscj, oltri ae diretore Lucia Follador, l’assistente Valeria D’Angelo, il baterist Giorgio Fritsch, il pianist e compositôr Alessio Domini, l’armonicist Sebastiano Zorza, invezit al ven da Slovenie il ghitarist Marko Feri e da Serbie il bassist Aleksandar Paunovich. Une vision Mitteleuropeane. Nin alore dentri la so storie e domandin a Lucia Follador.
__
Continus diretore dal rapuart tra VocinVolo e la lenghe, la musiche e la culture furlane.
«IL Friûl al è un leitmotiv, un motîf no dome ricorint, ma imanent, dentri la storie e ancje il futûr dal côr. Friûl come: lenghe furlane, che e je la nestre lenghe, musiche furlane, che e je la nestre musiche, culture furlane, che e je la nestre identitât. O crôt che al seti ce tant impuartant che i fruts e i zovins ai cressigne imparant a cognossi lis lôr lidrîs par lâ benon indevant. No ducj i coriscj ai fevele par furlan, e chest al è un stimul ulteriôr par difondi e condividi la nestre storie dentri dai sunôrs de nestre lenghe. Lenghe che tai nestris concierts – che no viodin l’ore di tornâ a cjapâ –, a dialoghe cun altris lenghis dal mont, come fatôr di insiorament personâl e coletîf. No stin a dismenteâ, in tai contescj da l’educazion e da l’istruzion, là che il nestri côr al è atent e atîf, che tabaiâ e cjantâ in diviersis lenghis al stimole ce tant il nestri cerviel, e inmò plui a partî de infanzie, creant conessions neuronâls, potenziant diviersis areis da percezion, da l’aprendiment, da comunicazion».
__
A partî di cuant e cun ce frecuence cjantaiso par furlan?
Di tant e dispès, mi ven di dî. Une des plui bielis esperiencis e je stade cuant tal 2013 o vin partecipât al Prin Festival dai Fruts Furlans, e o vin vint!, cun tun biel toc di Mauro Vidoni dal titul “Il Troi de vite”, e daspò cemût dismenteâ “Sacheburache” scrite di Ennio Zampa, par ricuardâ un pâr di esperiencis. Di pôc o vin presentât la cjantose “La conte dal Colibrì” su test di Bruno Fritsch e musiche di Alessio Domini, dute di viodi e di scoltâ. Cumò o stin lavorant su “Elegia friulana”, componude di Nicola Milan su la poesie “Dal cucuc” di Vittorio Cadel, une cjançon-poesie che ben a conte il leam cu la tiere furlane e lis esperiencis di cuant ca si è fruts.
__
Cjants pai fruts, ma no dome, ancje cjants di respîr universâl, simpri in marilenghe. Ce altri vêso in repertori?
Oltri a ce che o ai za dit, o eseguìn l’imni uficiâl de Patrie dal Friûl: “Incuintri al doman” di Valter Sivilotti e Renato Stroili Gurisatti. “Cjargne e nêf”, “Il Nestri mistîr” di Ennio Zampa. Tal cuarantesim dal Taramot o vin cjantât e regjistrât “Par no smenteâ” di Guido Covazzi, Roberto Piuzzo, cun rangjaments di bande di Marko Feri e Giovanni Molaro.  O tegnin simpri di cont ancje i classics: “O staimi atents”, “Ai preât la biele stele”, “Suspîr da l’anime”…
__
Inte vuestre volontât di educâ ae musiche i piçui e i zovins ancje di gracie da fortune di vê une nestre lenghe, no mancjin impuartantis colaborazion cun diviersis istituzions leadis ae culture e lenghe furlane, just?
Un grant ringraciament al va a l’”Ente Friuli nel Mondo” e al president Loris Basso par l’entusiasim tal sostignî chestis nestris iniziativis. L’è di pôc che o vin partecipât a un event on-line dal titul “Discovering VocinVolo”, organizât da Famee Furlane di Hamilton e da presidente Monica De Paoli, in virtût di un leam di stime cun Guido Covazzi. Il furlan al è une grande famee, in Friûl e ator pal mont. La vôs dai fruts in chest sens e à la potence e la magjie di dâ inmò plui risonance a dutis lis bielecis dal furlan e dal Friûl. ❚