MUSICHE. Manu Chao al sune furlan cui Playa Desnuda

Dificil rivâ a sierâ la sô musiche sot di une ‘etichete’: i concierts di Manu Chao a son un grande fieste popolâr e chel che si divertìs plui di ducj al somee propit chest incredibil musicist franc basc galizian che ai 27 di Jugn al à inflamât i 12.000 che si son dâts dongje sul Cjars pe date dal tour ‘La Ventura’, organizade de associazion Culturâl Drugamuzika, za famose par puartâ in Italie il plui grant event di musiche balcaniche ‘Gucˇa na Krasu’.
Intun contest cussì multietnic nol podeve mancjâ il Friûl ancje “on stage”: a scomençâ de fondamentâl colaborazion organizative de Azalea Promotion, ma soredut pe partecipazion musicâl dai Playa Desnuda che a àn viert la serade scjaldant par ben il public. E tra il lôr repertori passât e chel gnûf cul singul dal disc a pene realizât “Caminar Sobre Las Nubes” (lait su youtube par viodi il video www.youtube.com/playadesnuda), a àn proponût ancje un omaç ancje ae band dai Prorastar “Premi Friûl jodût dal underground” fasint cussì svolâ la lenghe furlane sui prâts dal Cjars. No podìn duncje no complimentâsi sedi cul grup sedi cu la organizazion par chest biel esempli di tornâ a proponi: il moviment musicâl furlan al merete di jessi valorizât e bisugnarès impensâsi plui dispès cuant che a rivin grancj artiscj internazionâls che lis bands, come i Playa Desnuda, a puedin jessi ambassadôrs privilezâts ancje de nestre identitât.
Ma la sorprese plui grande no je stade dome chê di vierzi il conciert di Manu Chao, che za e sarès stade une biele sodisfazion: la lôr sezion di flâts (Leo Virgili cul trombon, Nico Rinaldi cul sax e Mirko Cisilino cu la trombe) a son stâts clamâts sul palc propit grazie ae grande gjenerositât di Manu Chao, che tor 8 di sere, juste une orute prime di scomençâ a sunâ, al à volût provâ i tocs cui trê musiciscj furlan tal back stage, dut documentât di un video postât su Facebook.
Di chei moments nus conte alc Leo Virgili “E je stade une esperience ecezionâl, ma no us dîs ce che o ai passât prime di sunâ sul palc: o jeri nervoson e o ai passât il timp a riviodimi su youtube lis cjançons che o varès vût di sunâ”!
Al telefon, dopo dal conciert si sint che la adrenaline e je inmò alte “Al è stât incredibil e Manu Chao si è dimostrât une persone di une umanitât fûr dal normâl” al continue il trombonist di Playa Desnuda “Cuant che o vin finide la esibizion cun lui, no mi visi tropis voltis che nus à ringraziât”!
Ma cemût ise che o vês cumbinât di sunâ cun lui? “La produzion nus à contatât parcè che e saveve che i Playa Desnuda a vevin une sezion di flâts e o sin plasût” al conte cun braure Leo “Cuant che al è rivât Manu Chao o vin vût juste il timp di provâ chei tocs che dopo o vin sunât insiemit… il rest e je stade une fiestone”!
E la gjenerositât dal ex leader dai Mano Negra e je stade confermade ancje di ce che nus dîs Leo prime di saludâsi “Za cussì al sarès stât plui che avonde, ma ae fin nus à ancje domandât i nestris contats: forsit nol sucedarà nuie, ma parcè meti limits ae providence”? ❚
Christian Romanini