Paulêt, finît un Premi internazionâl a ’nt tache un altri

Euritmia, dal sax aes percussion,
e crôt tai zovins
In graciis de esperience dai tancj concors musicâi che la associazion culturâl Euritmia e puarte indevant di ben 24 agns, e je vignude fûr une iniziative origjinâl par un premi dedicât e di respîr internazionâl: il “Grant Premi Paulêt”, une competizion vierte a musicistis e musiciscj dai 20  agns insù, talents specializâts tal strument saxofon. Un strument inventât dal belghe Adolphe Sax tor de metât dal Votcent e deventât subit un element di caratar, plui che de musiche classiche, des orchestris filarmonichis, ven a stâi des bandis, e une vore domandât ancje inte musiche jazz.
◆ Podevie Euritmia, che e à une sô orchestre di flâts, nassude de storiche Bande di Paulêt, une des plui antighis dal Friûl, fondade tal 1875, no fâ alc di speciâl a valôr e promozion de musiche saxofonistiche e dai saxofoniscj, intune dimension contemporanie? Sigûr che e podeve, e cussì e à fat, realizant cun grant sucès la prime edizion, che la sô prime part si è davuelte, dilunc dal Invier, in modalitât in rêt, pes fasis seletivis. Invezit la seconde, cuintri di ogni prevision e cun ducj i risis dal câs, dovûts aes limitazions tai spostaments par vie dal Covid, e je stade fate in presince. Une finâl che si è davuelte ai 12 di Jugn tal Auditorium Comunâl di Paulêt, biele e apassionante di gjavâ il flât, di tant che a jerin brâfs i cinc soliscj finaliscj che si son contindûts il premi. O miôr: i premis.
◆ I finaliscj, ducj tor dai vincj agns, a son stâts Arce Martinez de Spagne, Kanako Horie dal Gjapon, Mafalda Oliveira dal Portugal, Pierre Faget de France e Jacopo Taddei de Italie. Europe e Orient a Paulêt, par une rose di talents dal sax che si son formâts in scuelis, conservatoris e academiis di grant nivel, cun docents di alte nomee e za vincidôrs di diviers premis musicâi.
◆ La finâl dal concors, che al à viodût une jurie ancje cheste internazionâl, componude di siôrs mestris de musiche – o ben dal diretôr di orchestre Jo Conjaerts, di João Pedro Silva, Mario Marzi, Jérôme Laran e Massimo Mazzoni – e je stade combatude a sun di sofletadis e di grant virtuosisim. Ae fin, sedi il premi de jurie di 1500 euros sedi chel dal public di 350 euros, a son stâts ricognossûts al talian Jacopo Taddei che si puarte a cjase in Toscane 1850 euros e une scriture contratuâl par un conciert che al vignarà inserît inte prossime stagjon musicâl di Euritmia.
◆ Nus conte il diretôr artistic Franco Brusini: «Al è simpri un plasê par nô meti sù e curâ cun ducj i crismis un concors musicâl di nivel internazionâl, parcè che o volìn dâ la pussibilitât ai zovins, de Europe e dal mont, di metisi in mostre e in discussion in contescj che par lôr a son cetant cualificants. E dâ mût ae int che nus seguìs di scoltâ cualchi vêr miracul, talents che a rivin a fâ robis incredibilis e cun tant sintiment. Duncje: pussibilitâts, metisi in zûc e imparâ. Al fâs part de filosofie di dut ce che o fasìn a nivel di formazion musicâl e di ativitâts conciertistichis, che inte realtât di Euritmia si tradûs in scuele di musiche e di tancj struments musicâi par dutis lis etâts, tacant de musiche in scune par fruts a pene nassûts, fintremai ai anzians. Inmò, orchestre a flâts, cuntun centenâr di elements, e la mini bande, pensade pai plui piçui. In plui dai concors musicâi».
◆ E no si fâs in timp a sierânt un, come il fortunât e seguît “Gran premi Paulêt” pal sax, che si ’nt vierç subit un altri, a dimostrazion dal grant ativisim di chei di Paulêt che a tegnin alte la bandiere di chê musiche bandistiche che e rint cetant speciâl la lôr storie.
◆ Di fat, sul sît euritmia.it, si pues cjatâ il regolament dal gnûf concors internazionâl dedicât cheste volte aes percussions, une sezion fondamentâl intai repertoris des societâts filarmonichis. Marimbe, vibrafon, rulant, set di batarie, chestis lis sezions viertis aes garis. La prime fase, cu la propueste des prestazions musicâls che a van mandadis vie video, e previôt la esecuzion di tocs musicâi di oblic, tra riscrituris e oparis origjinâls di Bach, Tanaka, Miyosh, Deane, Panzi, Masson, Giner e altris. Dopo des eliminatoriis in rêt, cu la partecipazion di une jurie come simpri internazionâl, componude dal talian Massimo Pastore, dal spagnûl Manel Ramada, dal cec Martin Oprsal e dal austriac David Panzl, e sarà la volte de finâl, in presince, in program ai 18 di Dicembar tal Auditorium Comunâl di Paulêt. Di no pierdi. ❚