Viva Onde Furlan ancje chest an, ma il prossim?

Ai 21 di Jugn lì dal Parc dal Cormôr a Udin si è davuelte Viva Onde Furlane, la fieste di autofinanziament de emitente radiofoniche. Sul palc, Gabriellina e un trop di rappers tant che Dj Tubet, il grup strumentâl Daisy Chain, vuidât de ghitarone eletriche di Leo Virgili e, par finî, il colaudât Dj set rock di Abrasive, il dut presentât e animât cul solit snait dai Cjastrons. Cheste e je stade par nô ancje la ocasion di incuintrâ Pauli Cantuart, president de societât cooperative Informazione Friuliana, e fâ cun lui il pont su la situazion di Onde Furlane. Lis rispuestis no sunin nuie ben.
Cemût vadie la radio?
«La situazion no je nuie buine. Dopo un an dal insediament, si pues dî che la gnove Zonte Regjonâl e à mostrât une bassissime atenzion pe politiche de lenghe furlane, sedi tal cjamp de istruzion che ta chel dai media par esempli. Dopo il nuie, plui o mancul assolût, de gjestion precedent si spietavin un pas indenant e invezit, cun grande ipocrisie, i nestris rapresentants si jemplin la bocje di proclamis su furlan e sloven dome cuant che i comude, par esempli par justificâ la specialitât de Regjon, cence dopo investî un boro su chestis diviersitâts linguistichis che costituissin la nestre specialitât primarie».
La leç finanziarie dal 2014 però e a tornât a introdusi dai fonts pal setôr radiotelevisîf…
«Sì, dopo un vueit di 3 agns, che al è stât un tentatîf di sierâ la bocje a cui che no si à mai adevuât a creâ consens cumò a son previodûts 100mil euros par dutis lis radio e lis televisions. A part che mi ven di ridi, no pôc, su la entitât di cheste cifre par cuvierzi dutis lis realtâts, pecjât dome che il 90% al sedi pes televisions e dome il 10% pes radio. In cheste maniere no si sosten cui che al prodûs tramissions par furlan cun continuitât e cualitât, formant e impleant personâl cualificât, ma si premie cui che si môf dome cuant che a son i bêçs e par creâ chel consens che o disevi prime».
Ce significhie in concret par voaltris cheste mancjance di risorsis?
«Par esempli che chest an il Premi Friûl no lu fasìn. L’an passât o sin rivâts a realizâ une biele edizion, inovative, partecipade, sparniçade sul teritori, parcè che o vevin vinçût un bant de ARLeF, ma chest an il bant al è diferent e alore nuie. Sperìn che al sedi dome un an di polse parcè che si sa trop che e je impuartante la continuitât de azion, soredut cuant che si rivolzisi ai zovins. Ma al è un brut segnâl ancje pensant a la farie che cheste manifestazion e je stade pal panorame musicâl furlane. Di sigûr, se nol fos stât il Premi Friûl, prime dal conciert di Manu Chao a Triest i Playa Desnuda insieme a Dek ill Ceesa no varessin sunât e cjantât il toc “Premi Friûl viodût dal underground”, denant di plui di 12 mil personis. Un toc dai mitics Prorastar, vincidôrs tai agns ’90».
Chest an duncje no organizarês nissun concors pe musiche in marilenghe?
«Veramentri o sperìn che il gnûf bant de ARLeF nus permeti di tornâ a puartâ in Friûl Suns, il festival pe cjançon in lenghe minoritarie vierts a lis minorancis dal Sud da la Europe, che l’an passât o vevin espuartât cun sucès a Moena te Ladinie. Chest al darès un minim di continuitât al setôr musicâl in marilenghe, che al tire simpri dongje une vôre di zovins, e che al rapresente un esempli positîf di cemût doprâ una lenghe minoritarie».
Intant che o spietìn Suns, ce gnovis podìno scoltâ in radio cheste Istât?
«Cul 23 di Jugn, Radio Onde Furlane e à inviât la programazion estive che e larà indenant fint a Setembar. Biei radiodrams e leturis radiofonichis fatis cul jutori di atôrs di teatri che a àn decidût di dânus une man e la riproposizion, ogni dì a lis 11 di “Friûl Parade” cun Mojra Bearzot, la nestre vôs da la Istât.
E par ce che al rivuarde la produzion musicâl da la etichete Musiche Furlane Fuarte?
«O rivarìn juste adore a publicâ il cd dai vincidôrs de ultime edizion dal Premi Friûl, Aldo Sbadiglio e la Famiglia Ananas in vacanza a Dresda. Come al solit podês spietâsi une altre sorprese, musiche furlane sureâl cu la partecipazion di ospits inspietâts. A son in vore a regjistrâlu e mixâlu e al sarà presentât dopo l’Istât intune altre fieste-conciert di autofinanziament…». ❚
✒ Natascia Gargano