La Patrie dal Friûl e je presint di timp su Facebook. Un imprest par difondi il gjornâl, ma ancje par incuintrâ e dialogâ cui letôrs e cu la int che e baline pal social network. E cussì al capite di cjatâ cualchi realtât interessante…
✽✽✽
“Aghe dal cîl – Agua del cielo” e je une pagjine che no à par cumò tantis adesions, ma la grandece e la impuartance di une robe no si misurin dome cui numars. E je stade metude sù par difondi un progjet di solidarietât une vore biel. Indi fevelìn cun Tullio Fabbro, il responsabil.
––
Mandi, prin di dut cui sêstu e di indulà, e cui fasial part dal progjet “Aghe dal cîl – Agua del cielo”?
O soi un volontari furlan di 47 agns, o lavori intun ufici par 36 oris e pal rest te piçule aziende agricule dai mei gjenitôrs. O soi a stâ tes culinis, tal mieç dai cjamps tra Colorêt, Buie e Maian, e o ai cuatri amîs di numar che mi judin tal preparâ i manuâi di costruzion, tal curâ il sît http://aghedalcil.altervista.org/home.html e la pagjine Facebook, e che a son a stâ a Muris di Ruvigne (Micjêl e Luche par internet), a Buie (Rachel pes traduzions in spagnûl) e a Dalès (Saira, pe impagjinazion dai manuâi). No sin une associazion, o soi dome jo par cumò chel che al vîf a plen il progjet, lant ator pes missions, no dome di furlans, sparniçadis in centri e sud Americhe. Soredut, dopo vê cognossût il mût di risolvi la convivence cul sut in Brasîl, mi soi sintût in dovê morâl di slargjâ cheste cognossince in atris Paîs.
––
E ce fasêso?
Il progjet al à come obietîf chel di insegnâ a la int plui interessade, volonterose e bisugnose, un sisteme par costruî in nome cinc dîs cistiernis de capacitât di 16.000 litris, par tignî cont de aghe ploiane che e cole sui cuvierts des cjasis e frontâ cussì i periodis di secje che simpri plui luncs si manifestin cun lis variazions climatichis tal mont.
La miôr maniere di judâ la int e je chê di rispuindi a une lôr sincire domande di jutori, condividint cun lôr dut il lavôr, il sacrifici, la gjonde, il mangjâ insiemi e il durmî. Tantis voltis par tiere o sore un breâr cence materàs, stant cun lôr, cirint di metisi al lôr flanc, insegnant cheste soluzion economiche cun pazience e serietât e costruint insiemi, lassant i struments, i stamps e il manuâl in mût che a puedin cjaminâ di bessôi une volte che o ai finît lis mes vacancis.
Il nestri obietîf al è chel di provâ a semenâ, e la semence e je la persone che o provìn a formâ. Se po dopo a rivin a mandânus lis fotos che nus mostrin che a àn rivât a fâ sù di bessôi, ve che la semence e je deventade pome e a son contents lôr, nô dal gruput di Aghe dal Cîl e chês personis che nus àn dât bêçs e fiducie.
––
Di dulà ti ise vignude la idee par fâ dut?
O soi convint che o scugnìn judâju a cjase lôr (soredut se tal domandin); o ven di une famee che e à barbis sparniçâts tra Australie e Americhe latine, partîts par “sant scugnî” e cence nissune volontât di lassâ la Patrie furlane, e la stesse disperazion le nasi ogni volte che o cognòs int ator pal mont che mi conte la disperazion là che a vivin e la sperance di tancj di lôr di migrâ, cui tes grandis citâts e cui in altris Stâts lontans di no crodi. Al è brut lassâ il nît che ti à cressût par lâ viers l’incognit.
Permetêtmi une sbrocade: chel che mi da plui fastidi al è che lis costruzions che o stoi fasint cognossi a son cetant cognossudis in Brasîl, stant che a fasin part dal progjet Sete Zero (là che a àn za fatis 800.000 cistiernis). Mi domandi, ce fasino lis delegazions che si cjatin te FAO, al UNICEF, al ONU ai FORUM MONDIÂI che a fevelin di dut e di nuie, se no si passin tra lôr soluzions che si stan za adotant. Mi somee assurt che al vedi di partî un dal Friûl par fâ cognossi chest progjet tant doprât in Brasîl, ma!
––
Si pues fâ tant ancje cun pôcs bêçs. Cemût si puedial contribuî?
Sì, pensait che rivant a tirâ sù 380 euro si pues garantî la costruzion di une cistierne di 16.000 litris. Si pues judâ il progjet Aghe dal cîl-Agua del cielo cuntun impuart di cualsisedi cifre. Dutis lis specifichis pal viersament lis cjatais sul nestri blog http://www.aghedalcil.blogspot.it, su la nestre pagjine Facebook “Aghe dal cîl – Agua del cielo”, o pûr o podês contatâmi: Tullio Fabbro al numar 0432.889642 (sot sere) o ae direzion di pueste eletroniche: tulliofari(chiosule)yahoo.it.
Po dopo, cui che al vûl al pues contatânus ancje par fâ une esperience di vite cun nô ator pal mont: o cirìn ancje volontaris. ❚
✒ Dree Venier
