Prime part – Aspiets introdutîfs e specifics
La biodiversitât e je menaçade globalmentri, in mût sostanziâl, par vie des mutazions ambientâls provocadis dal om. La azion dal om e à causât cambiaments dal clime, pierdite e framentazion dai habitats, incuinament, difusion di malatiis e v.i. Anfibis e retii a son une vore sensibii a chestis mutazions parcè che la grande part dai aspiets de lôr vite e dipent in maniere critiche de temperadure e de aghe. Chest al è plui evident pai anfibis, parcè che i retii a àn svilupât adataments par fâ front ae scjarsetât di aghe; invezit ducj i anfibis europeans a àn la necessitât di habitats “umits” e, a part pocjis ecezions, aghis libaris par riprodusisi.
◆ La pierdite e la framentazion dai habitats e l’incuinament a ridusin la disponibilitât di ambients dulà vivi, di sîts idoniis aes necessitâts riprodutivis, e a calin lis pussibilitâts di spostament e la capacitât di vignî in contat cun altris individuis o altris popolazions. Dut chest – par speciis che, come i anfibis e i retii, a àn une basse capacitât di dispersion – al prodûs un impat fuart che al pues jessi deleteri.
◆ Ancje in mont i ambients a son stâts modelâts su la fonde des esigjencis dal om. Chest intal timp al à compuartât une modifiche sostanziâl des carateristichis origjinariis e duncje un impat su lis speciis vegjetâls e animâls.
◆ Par fâ studis sui animâi che a vedin une buine corispondence cu la realtât e che a tegnin in considerazion la grande part dai aspiets biologjics e ecologjics, si à di lavorâ soredut sul teren. Diviers lavôrs publicâts sui argoments e su la aree culì tratâts a son une vore aprossimâts e a son stâts metûts adun di personis che no vivin intes zonis consideradis dal studi, e che a rifletin lis lôr crodincis, dispès anedotichis. Se si va daûr di chei lavôrs al salte fûr un cuadri no corispondent cu la realtât e che al pues puartâ a erôrs di valutazion che si rifletin in varis mûts su la vite dai animâi.
◆ Tignint cont di dut ce che al è ripuartât parsore, cui che al scrîf al à metût adun un studi che al sintetizàs lis cognossincis sui anfibis e sui retii in Cjargne, Cjanâl dal Fier e Valcjanâl considerant ancje aspiets che dispès no vegnin tratâts tant che impats, menacis e conservazion.
◆ Inte aree esaminade, par motîfs di continuitât ecologjiche e teritoriâl, a son stadis cjapadis dentri ancje lis zonis dal Lât di Cjavaç, de basse Val dal Tiliment e de alte Val de Tor (Comuns di Trasaghis, Bordan, Glemone, Lusevare, Taipane) intun grant interval altitudinâl (180-2780 m s.l.m.). Chest, insiemi cu la variabilitât ambientâl e cul grant numar di dâts cjapâts sù in desenis di agns, al à compuartât un grant sfuarç di ricercje.
◆ Intal setôr setentrionâl dal Friûl a son stadis cjatadis 14 speciis di anfibis e 16 speciis di retii.
◆ Par ogni specie e je stade definide la distribuzion cun tant di mapis basadis sui cuadrants UTM (10×10 km), ripuartâts i ambients principâi dulà che e vîf e i limits altitudinâi dulà che e je stade cjatade.
◆ La maiorance des speciis e je in diminuzion e, in confront cul passât, e à ristret la aree frecuentade.
◆ Fra i anfibis a son speciis ben distribuidis tant che la salamandrie Salamandra salamandra, il ‘sâf Bufo bufo e il crot di rosade Rana temporaria, e altris che a vivin dome in zonis ristretis, par esempli la mandraule de creste Triturus carnifex e lis craçulis Hyla spp.
◆ La specie cjatade plui adalt e je la salamandrie nere Salamandra atra (2210 m s.l.m., Crostis, Rigulât). Par cuintri, dôs speciis di crot (Rana dalmatina e Rana latastei) che inte aree di studi a son al limit setentrionâl dal lôr areâl furlan, a son stadis cjatadis dome sot dai 300 m s.l.m.
◆ Il crot di rosade al vîf dai pidivals ai passons e cenglis di mont, intun interval altitudinâl di cuasi doi mil metris.
◆ Il retil plui comun al è la lisierte Podarcis muralis, chel plui râr la copasse di rosade Emys orbicularis, segnalade dome te estremitât meridionâl de aree di studi, dongje Trasaghis.
◆ La specie cjatade plui adalt e je la lipare rosse Vipera berus (2250 m s.l.m., Spiç Cjadin, For Davôtri).
◆ A part la copasse di rosade segnalade dome sot dai 200 m s.l.m., la specie che e vîf a altitudins plui bassis e je la lipare Vipera aspis: dome disot dai 500 m s.l.m.
◆ E je stade rilevade ancje une specie esotiche, la copasse di palût americane Trachemys scripta che e ven comprade e dopo liberade, e cussì si cjate in varis sîts.
◆ Il Friûl par dôs speciis di retii al rapresente la grande part dal areâl talian: la lisierte di Horvath Iberolacerta horvathi e la lipare dal riçûl Vipera ammodytes. Considerant la distribuzion in Friûl, cheste, soredut pe prime specie, e à la plui grande estension propit in Cjargne, Cjanâl dal Fier e Valcjanâl.
◆ Te estremitât nordorientâl de aree di studi a son lis unichis popolazions, insiemi cun chês de provincie di Triest, dentri dai confins dal atuâl stât talian de craçule europeane Hyla arborea. Ancje une sotspecie di mandraule (Lissotriton vulgaris vulgaris) in Italie si cjate dome inte estremitât nordorientâl de aree di studi. La Valcjanâl e je une des dôs zonis (chê altre e je in Piemont) dulà che e vîf in Italie la lisierte grande Lacerta agilis.
◆ A part la craçule europeane, inte aree cjapade in considerazion cuatri speciis a rivin ai lôr limits altitudinâi:
– muc Bombina variegata: limit superiôr in Italie (1910 m s.l.m.; Zoufplan, Paluce);
– lisierte di Horvath: limit superiôr de specie (2000 m s.l.m.; Ponza, Tarvis);
– lisierte grande: limit inferiôr in Italie (770 m s.l.m.; Fusinis, Tarvis);
– lipare dal riçûl: limit superiôr in Italie (1980 m s.l.m.; Veltri, Dimpeç).
Par ultin, par ciertis speciis (par esempli ‘sâf cu la vieste o campanel Bufotes viridis, cjarbon Hierophis carbonarius, magne Zamenis longissimus) i dâts cjapâts sù inte aree di studi a son fra i plui setentrionâi in Italie. ❚
La seconde part al è publicade sul numar di Dicembar.
