Ogni patrie e à la sô fieste, o cuasi. Sù par jù dutis lis nazionalitâts de Europe a àn cualchi zornade che vie pal an e à une impuartance identitarie specifiche. Par solit a son inovâi di fats storics o ben ricorencis che a son leadis aes fiestis religjosis – la Madone Imacolade in Corsiche – e aes celebrazions di cualchi sant particolâr, tant che Sant Andree in Scozie, Sant David in Gales, Sant Peran in Cornualie e Sant Jacum in Galizie. Ma a ‘nd è ancje altris che a àn lidrîs storichis e culturâls plui antighis, a tacâ dal Newroz dai curdis e dal Ullortunek dai inuit de Groenlande. E a son altris ancjemò che no àn dome un valôr simbolic, ma a fasin riferiment a fats specifics, ancje avonde dongje tal timp, tant che la Fieste dai Sami, che e ricuarde le prime sentade dal Congrès nazionâl ai 6 di Fevrâr dal 1917 e che e je stade uficializade tal 1993.
Avonde dispès, chestis fiestis, cundut che a fasin riferiment a events di un passât plui o mancul lontan, a esistin dome di cualchi desene di agns. Al è esemplâr il câs de Fieste de Patrie dal Friûl. E je la celebrazion dal inovâl de invistidure dal patriarcje di Aquilee Siart ai 3 di Avrîl dal 1077, ma si le fâs dome dal 1977, daûr dal sburt des rivendicazions culturâls e politichis saltadis fûr cuntune fuarce gnove in chei agns, e e esist in forme uficiâl dome di doi agns incà, cu la aprovazion di une leç regjonâl di pueste. Storie, «invenzion de tradizion» (che al vûl tornâ a discuvierzi la storie e no inventâsi di plante fûr alc che nol esist) e ricognossiment par leç a son lis carataristichis di fonde ancje de Sa Die de sa Sardigna, che daûr di une leç fate buine a Casteddu/Cagliari tal 1993 e ven memoreade ai 28 di Avrîl, tal inovâl dal riviel popolâr che tal 1794 al veve parât vie il vicerè piemontês Vincenzo Balbiano. Il ricuart di chei fats e di chei timps, massime cun riferiment aes lotis anitifeudâls e cuntune cjaladure viers de contemporanitât, al è avonde vîf tra la int de Sardegne, ancje in graciis de poesie/cjançon di Francesco Ignazio Mannu: Su patriotu sardu a sos feudatoarios.
Une des fiestis nazionâls che la sô celebrazion e je une vore popolâr e je la «Diada Nacional» de Catalogne, che e cole ai 11 di Setembar. Ancje in chest câs si tegnin dongje un fat storic, une rivendicazion identitarie e politiche e une formalizazion uficiâl, cu la leç 1/11980 fate buine dal Parlament de Generalitat, cundut che si à tacât a memoreâle ancjemò tal 1886. Il caratar specific de fieste nazionâl catalane al è il fat che e ricuarde une sconfite – la concuiste di Barcelone de bande dal duche di Berwick, in chê dì dal 1714, dopo cutuardis mês di assedi – cun chê di memoreâ chê lungje resistence de int e di rilançâ la lote a pro dai dirits dai catalans, ricuardant la abolizion des libertâts civîls che e rivà dopo de vitorie de vuere di sucession de bande di Filip V di Borbon.
Une altre fieste une vore sintude e je chê dal Aberri Eguna, la Fieste de Patrie basche, che e cole te Domenie di Pasche. E je une ricorence ad in plen politiche, che e partìs di une esperience personâl di Luis Arana Goiri tal 1882 e di un dialic tra chel e so fradi Sabino, ricognossût tant che l’ideolic dal nazionalisim basc e il fondadôr dal EAJ/PNV, che i de un significât identitari e rivendicatîf. Memoreade in maniere uficiâl tai agns de Seconde Republiche dal Stât spagnûl, a tacâ dal 1932, intant dal regjim franchist e à vût celebrazions che a son stadis ocasions di disfide de ditature, vie pai agns Sessante dal secul XX si à tacât a fâle ancje tal Paîs Basc francês e tal mont de emigrazion e di sù par jù cuarante agns incà e ven memoreade cun continuitât. ❚
✒ Marco Stolfo