Un an indaûr o proponevi su chest periodic une “Conference pal rilanç dal Friûl” e un “Plan pal Rilanç dal Friûl” prontâts cul impegn di dutis lis fuarcis politichis regjonâls. Il motîf? I numars inte tabele lu mostrin cun fuarce, ancje se no son stâts bogns di discjadenâ chel sens di responsabilitât e di braùre che nus à permetût, câs unic in Italie, di bati il taramot dal ’76 e di rivâ al benstâ. A son numars che a contin tantis robis. Di fat, a disin che, un, intal periodi de Grande Crisi la Italie e à cognossût la infelicitât che e ven de decressite dal redit (-4,6%) . Doi, che la infelicitât e à produsût tante frustrazion parcè che e je stade decressite “in solitarie”, ven a stâi uniche tra lis 50 economiis mondiâls plui impuartantis. Trê, che nol è vêr il sproc “mâl comun mieze gjonde” stant che la Eurozone e je cressude di cuasi il 10%. Cuatri, che il Friûl – intindût tant che ex provinciis di Gurize, Pordenon e Udin – al à vivût un tas di infelicitât identic a chê dal Meridion di Italie e ecuivalent, par ducj i doi, a un “patatrac” dal redit dal 10,7%.
◆ Cuint, che la ex provincie di Udin e à fat fintremai piês: pardabon un “patasgnachete” (rindial la idee dal bot?) dal -15,3%! Sest e ultin, che la cressite dal redit e à interessât dome la ex provincie di Triest (+5,2%): brave la classe dirigjente triestine, no mo?
◆ Al mancje ancjemò il 2020, an pandemic, che in maniere malinconiche si siere cuntun bot dal redit talian dongje dal 9% e cun risultâts piês dal nestri Friûl e de ex provincie di Udin. Tirìno lis sumis? I dâts a fevelin clâr, ma al è cui che al stime che il Friûl tra il 2008 e il 2020 al vedi pierdût plui o mancul il 20% de proprie economie e la ex provincie di Udin plui di un cuart!
◆ Se si à voie di tornâ in pîts no si po no considerâ che la Union Europeane, propit intal 2020, e à metût in cjamp la strategjie “Next Generation-UE” pal trieni 2021-2023, dotantle di 750 miliarts, e la nestre Italie e je la prime beneficiarie cul 27,8% dal totâl comunitari, vâl a dî 208,6 miliarts. La mission urgjente de RA-Fvj, duncje, e je chê di promovi progjets – soredut inte aree furlane che e je l’85% di chê regjonâl – par un impuart di 4,5 miliarts di euros tal segn de “ripartence” e de “resilience”. La Comission Europeane (CE) e domande, però, un Plan Nazionâl pe Ripartence e la Resilience dentri dal Avrîl dal 2021 che al à bisugne di Plans regjonâi, ancje se no domandâts in maniere formâl.
◆ RilanciaFriuli, duncje, al à fat une videoconference su “Il Friûl e il Plan Regjonâl pe Ripartence e la Resilience” (PRRR), disponibile sul so sît. Lu à fat parcè che la nestre autonomie e à di cjapâ la ocasion iripetibile dal inseriment lavoratîf e sociâl dai nestris fîs e nevôts dentri di un disvilup sostignibil, sedi dal pont di viste ambientâl che energjetic. Oportunitât, però, che no mostre olme inte programazion strategjiche regjonâl, che si limite a un “copie e incole” des puestis finanziariis dai agns prime. Ce si aial fat fin cumò? Une Delibare di Zonte “cjarsuline” (la n. 1849 dai 11.12.2020) dal titul “Contribût de RA-FVJ al Plan Nazionâl pe Riprese e Resilience” che, intune desene di cartelutis (definidis in maniere pompose “liniis strategjichis”) e domande al Guvier nazionâl ben 10,6 miliarts di euros. Ma cence nissun progjet concret, par caritât!
◆ La Regjon Venit, invezit, intal so PRRR e propon ben 156 progjets descrits in 460 pagjinis a justificazion dai 25 miliarts domandâts. Domande: isal clâr che nol funzione che la UE (o il Stât talian) ti da i bêçs, tu tu ju spindis cemût che tu vuelis e dopo tu ju rindicontis? Isal clâr che la strategjie NG-Fvg e covente par creâ lavôr par nestris fîs e nevôts (che di 6 agns a scjampin tal forest) e pai imigrâts economics che a coventin ae economie e aes fameis nostranis? Us ziri la domande finâl de videoconference: isal chest, il Friûl che nus plâs, chel che o volìn par nô e par chei che a vignaran?
◆ De rispueste a divegnin lis politichis di meti in vore. Che o riassum cussì: miôr stâ sù a pêl cun tancj ristôrs par un trieni, o pûr cressi cun continuitât par vê un futûr dignitôs? La sielte di RilanciaFriuli e je chê di ripartî e di cressi a benefici nestri ma, soredut, di cui che di pôc nus à dât la volte – e di cui che si prepare a fâlu – intal lavôr e inte vite. La Zonte regjonâl e stime il PRRR un libri dai siums (di no scrivi, naturâl), il Consei regjonâl, invezit, al propon un “taule di lavôr che e cjali lontan” sul argoment atîf dai 9 di Març. Par ce tegnial e ce vuelial fâ l’univiers furlanist? ❚
