Nissun sa a cui che i tocje al è di fat une racuelte di gnovis cjançons dal “cjantautôr cowboy”, Dino Piu, ma ancje un album di ricuarts di 50 agns di musiche.
Publicât e presentât pe prime volte pe Fieste dai Rondons a Gonârs pai 2 di Avrîl di chest an, il disc si compon di 21 tocs realizâts di Dino e rangjâts di Omar Malisan. Doi di chescj a son cjançons contignudis in vecjis cassetis dal artist.
Il titul Nissun sa a cui che i tocje al è cjapât de cjançon La Filastrocje. Come che nus conte il grup «in principi si pensave di meti “la filastrocje” come titul dal album parcè che, plui di ducj i tocs, chest al rapresente il paîs e la int di Gonârs. Daspò, nus è restade la frase “nissun sa a cui che i tocje”. Chest viers al fevele dal passâ dal timp e de vite. O sin dome di passaç, e no podìn savê ce che nus sucedarà, tal ben e tal mâl. La sorprese e je simpri daûr de svolte.»
Par rivâ a meti dongje chest album dai ricuarts de e pe int di Gonârs, la Dino Piu Band (cun ghitare, bas, percussions, violin, trombe e armoniche) e à simpri vût tant aiût e disponibilitât, sedi dai musiciscj che des associazions dal paîs. In prin Fûr Timp, cul president Riccardo Schiff, Omar Malisan, Gina Maddalena Schiff e Luciano Bonomo.
La Dino Piu Band e à za vût sucès a nivel internazionâl. Si è esibide a Londre tal 2016 e in Cornovalie pôc plui di un mês fa, e a Setembar e sarà al Fogolâr Furlan di Viene.
Un biel ricuart dal grup al è che «intant che a sunavin intune fieste a Gonârs, il sindic di Vrhnika (paisut sloven zimulât cun Gonârs), divertît e incantesemât de musiche e de vivarosetât di Dino, nus à invidâts a sunâ tal lôr paîs pe fieste plui impuartante che a organizin: la fieste dai “argonautis”. Cun chest apontament si cjatìn ogni Istât a Vrhnika, dulà che si divertìn a cjantâ par furlan a un public sloven.»
La Band e sta programant di inviâ une copie dal album ai Fogolârs Furlans tal Mont.
Sul sît internet www.dinopiu.com si puedin za cjatâ imagjins che a fasin di curnîs a chest album di memoriis. In plui, sui canâi Youtube e Facebook la band e inzorne la pagjine cun videos e fotos dai concierts.
«Al moment, o doprìn i social network pe divulgazion des cjançons. La distribuzion dal CD si limite invezit ai bar dal paîs e di chei vicins, in plui che a ogni conciert». Il rigjavât de vendite dal CD, che al è a ufierte libare, al sarà dât in beneficence al paîs di Gonârs e soredut ae scuele dal infanzie de parochie.
Tra un pôc o rivarìn a gjoldi di cualchi toc di Nissun sa a cui che i tocje intun video, che il grup al à in program di realizâ. Chest al cjaparà dentri no dome i ricuarts e la vite musicâl di Dino Piu ma lis tradizions e lis musis de Int di Gonârs. Une “filastrocje”, come che e conte la cjançon, di un piçul paîs dal Friûl, dulà che il “cjantautôr cowboy” Dino al e nassût, là di Piu, tal 1948. ❚
✒ Moira Pezzetta