Interviste a Franco Clementin, gnûf president de Cia F-VJ Agricultôrs Talians
Franco Clementin al è il gnûf president regjonâl di Cia – Agricultôrs talians. Lu à elet, ae unanimitât, la Assemblee dai delegâts dal sindicât agricul furlan che si è dât adun di resint a Palme. Clementin, 63 agns, al è un imprenditôr vitivinicul di Aquilee e, in chê vieste, par un mandât al à vude ancje la cjarie di president dal Consorzi di tutele dai vins de Doc Friûl Aquilee. Lu vin incuintrât par cognossi lis liniis vuide dal so gnûf impegn.
_
President Clementin, di ce bande aie di cjalâ la agriculture regjonâl in cheste fase globâl une vore dificile?
La gnove agriculture regjonâl e à di vê lis capacitâts di acetâ e di frontâ lis sfidis de digjitalizazion (e o sin une vore in ritart…), de inovazion e de modernizazion in sens larc. Lis produzions di cualitât a varan di jessi tal centri des politichis di valorizazion e de lote ai cambiaments climatics (lis aziendis agriculis a son “fabrichis a cîl viert”), integrantsi cul turisim, cul artesanât, cu la ristorazion, cu la ospitalitât e cu la ricercje.
_
Isal chel che lui al clame “sisteme imprenditoriâl teritoriâl”?
Sì. Di fat mi riferìs propit a chê che o pensi che e sedi la dibisugne di ampliâ lis relazions classichis di funzionament des filieris agroalimentârs, stimolant la creazion di rêts e di sistemis produtîfs a vocazion teritoriâl fuarte che a cjapin dentri i agricultôrs, dal sigûr, ma ancje i artesans; i comerciants (de piçule o grande distribuzion); i operadôrs de logjistiche e chei dal turisim; i Ents locâi; lis Universitâts. Salacor si trate di inviâ une sperimentazion di gnûfs modei organizatîfs cuntune vocazion fuarte e inovative al marcjât, ma intune logjiche di rêt sostignibile.
_
Spazi, duncje, ae formazion, ai zovins e aes lôr ideis?
I zovins e la lôr formazion e istruzion a restin un element fondamentâl pe vitalitât des areis rurâls. Al covente, duncje, un progjet regjonâl di integrazion cui Istitûts agraris par acompagnâ, in maniere adate, i students dal nestri setôr bande il mont dal lavôr. Di chê altre bande, lis misuris di formazion e lavôr (Cia F-VJ – Agricultôrs Talians, par altri, al è soci fondadôr dal Cefap), garzonât, tirocini, no puedin no tignî cont de specificitât proprie dal lavôr agricul leât ae stagjonalitât.
_
Un dai temis di atualitât al è chel de crisi energjetiche. L’agrovoltaic al ven tirât in bal simpri plui dispès tant che soluzion pussibile. Lui ce pensial?
Il disvilup des energjiis rinovabilis al pues jessi part de soluzion dal probleme, intal medi lunc periodi. Cia F-VJ, dut câs, al è e al sarà simpri contrari al agrovoltaic a tiere che al prodûs un consum di teren che no si pues plui tolerâ. In chest sens, la transizion energjetiche e à di indreçâsi prin di dut bande l’ûs a fins energjetics des cuviertiduris, civîls e industriâls, e des areis margjinâls o dismetudis. Dome tant che ultime ipotesi si valutaran i implants sui terens agricui.
_
Cemût vivie la agriculture la sfide de transizion ecologjiche?
Sparagn di aghe, di inputs chimics, di teren e di energjie a saran simpri plui pussibii ancje adotant lis soluzions smart e lis tecnologjiis “inteligjents”. Lis filieris agroenergjetichis, intune otiche di economie circolâr, a cjataran simpri plui spazi. Ma nol è dubi che la transizion ecologjiche e rapresente une sfide plui complesse che no si pues gjavâsi fûr. I imprenditôrs agricui a àn di jessi dal dut cussients che i consumadôrs (talians e europeans) a domandin un cambiament intai lôr compuartaments produtîfs. Si à di jessi bogns di trasformâ chescj gnûfs compuartaments (plui green, plui ecosostignibii, plui juscj di un pont di viste sociâl) in valôr, e rivâ a fâsai compensâ. ❚