Nô no sin un popul di serie B

“Il Friûl lu àn tornât a fâ sù, ma i furlans a son ancjemò disfats”: lu diseve simpri pre Duilio Corgnali, mancjât masse adore al principi di chest an bisest. I vignive dûl a viodi il Friûl che al finìs su lis primis pagjinis dai gjornâi talians dome par disgraciis o barzaletis, e che nol à cussience dal valôr de sô storie e de sô lenghe. I vignive dûl a viodi un popul che si è masse passût di un benstâ che di chestis bandis no si jere mai viodût e che no si sa trop che al podarà durâ. I vignive dûl a viodi tantis glesiis simpri plui vueidis e tantis animis che no cjatin plui une strade, intun Friûl che al veve simpri vût la fede come un rimpin sigûr dulà tacâsi.
◆ Cumò, o sin nô che o vin dûl par vê pierdude une personalitât inteletuâl di prin plan. Un om di valôr che si jere fat i vues e al veve uçadis lis ongulis tai agns dal taramot, un periodi che al tornave dispès tes sôs riflessions. Alì, di zovin plevan, al veve sperimentade la fuarce des comunitâts che a vuelin ricognossisi intune identitât ugnule, e frontâ lis dificoltâts insiemi e no ognidun par so cont. Un spirt antîc, che al ven de storie des viciniis e di une autonomie di fat che la int di chenti e à simpri esercitât ancje cuant che e viveve in miserie.
◆ L’insegnament che al vignive de esperience dal 1976 al è simpri stât un riferiment par pre Duilio, parcè che la disgregazion des comunitâts, dai valôrs, des fameis e de identitât le veve sot dai voi ogni dì. Par chest al à lavorât une vore par tignî dongje lis comunitâts dai cristians e dai furlans, deventant une vuide di impuartance fondamentâl soredut pe sô grande abilitât inte comunicazion sociâl. Metint in pîts imprescj come Radio Spazio e La Vita Cattolica al è stât un mestri par tancj gjornaliscj che di lui e cun lui a àn imparât il mistîr di fevelâ cun clarece e scletece.
◆ La sô passion pe lenghe furlane e à dât cûr a tancj par batisi fûr e dentri de glesie. Nol è un câs se in pôcs agns in Regjon si sedi aprovade la leç 15/96, in Parlament la leç 482/99 e a Rome la Cei e vedi licenziade la Bibie: tancj si son cjapâts i merits ma lis pocadis plui fuartis lis deve lui.
◆ In sumis, pre Duilio al jere un grant inovadôr. Tes sinis de tradizion, religjose e culturâl, clâr, ma un inovadôr. Al à simpri pensât che un popul al vedi di scombati a colps di ideis e peraulis di veretât par fâ viodi di esisti, e di jessi un toc fondamentâl ta chel grant mosaic che e je la creazion di Diu.
◆ Par chest par sigûr al sarès lui il prin a sostignî la sfide di un trop di sportîfs furlans, vuidâts di Daniele Puntel, che si son metûts tal cjâf di afermâ la identitât furlane midiant dal balon, fasint di dut par meti in pîts une rapresentative furlane di valôr che e partecipi ae Europeada di chest an, il campionât european des nazions cence stât: un Mundialito des minorancis che si davuelç za dal 2008 incà. A son ancje lis rapresentativis dal Sudtirôl (che al à vint za 4 edizions), dai ladins e dai slovens de nestre regjon: parcè no i furlans?
◆ Par sburtâ ae partecipazion a cheste competizion, la Associazion Sportive Furlane (poiade ancje de ACLiF) e je daûr a fâ pardabon di dut, mostrant che i furlans a vuelin jessi part dal mosaic european des minorancis cun dignitât compagne e no an voie di jessi calcolâts un popul seconde categorie. Pecjât che intant il balon professionistic al ciri di dimostrâ propit il contrari. Dopo dal faliment dal Pordenon, l’Udin al è sul ôr de retrocession in serie B dopo cuasi 30 agns. La societât, cjapade plui dai afârs che des cuistions tecnichis, e somee disorientade e chest an no i va drete une, par cumò: cun di plui, par colpe di cualchi tifôs incivîl e razist, dute une tiere e je stade bolade tant che çusse e ignorante pai insults vergognôs al portîr dal Milan Mike Maignan.
◆ E alore, po stâi che propit dal balon dai diletants che a sielzin di zuiâ cu la maie de prime Nazionâl furlane al vegni fûr un gnûf segnâl di sperance, che al covente cumò plui di simpri, par che i furlans a tornin a jevâsi in pîts, come che a àn fat dopo dal taramot. ❚