Sot dal arbul di Nadâl al è rivât il gnûf disc solist di Gweltaz Adeux, che dai prins agns Otante dal secul passât al è un dai personaçs plui impuartant dal panorame musicâl de Bretagne, in gjenerâl e in particolâr inte suaze de produzion in lenghe bretone. L’album, che tal so titul (“Eyjafjallajökull”) al ricuarde il non di un vulcan islandês, al met dongje dodis tocs di rock melodic e potent, cjantâts e sunâts cun snait e cun mistîr.
L’implant des cjançons al è sempliç e di sostance, vôs e ghitaris a jemplin i spazis, la sezion ritmiche e fâs il so e ogni tant al salte fûr ancje un piano, un orghin o cualchi percussion che a insiorin la recipe che par so cont e je za sauride e svariade.
Il disc si disvilupe tra la ande pop de cjante che i da il titul ae racuelte, rivocs di hard rock e gotis di psichedelie. Une segnalazion particolâr le merete “Mil Den”, che e conte di chei tancj di lôr che ogni an a fasin la Redadeg (la maratone pe lenghe bretone) e là che si ricognòs un riferiment ae linie armoniche di “Ni a sell ouzh an heol”, classic dal repertori dai EV, la storiche band di Nantes là che Gweltaz Adeux al à cjantât e sunât dal 1981 al 2007.
Gweltaz Adeux, “Eyjafjallajökull”, Coop Breizh, 2017.
di Marco Stolfo