Il sport de identitât, il sport de libertât
Il zûc dal balon e la cusssience politiche e identitarie si poin un cun chê altre, massime tal Paîs Basc. In tancj si visin dal Athletic Bilbao e de Real Sociedad e cualchidun ancje de jentrade tal stadi Atotxa di Donostia, ai 5 di dicembar dal 1976, des scuadris de Real e dal Athletic, cui lôr doi cjapitanis, Inaxio Kortabarria e José Ángel Iribar, che a tegnin in man une ikurrina, la bandiere basche che in chê volte e jere fûr leç. Ma in pôcs a cognossin la storie secolâr di chê che a tacâ dal 2009 si clame Euskal Selekzioa. Dal 2016 si pues corezi cheste ignorance cu la leture di un biel libri talian, che al conte dute la storie de nazionâl basche di balon e si fisse plui in detai su la esperience fate di chê scuadre tra il 1937 e il 1939, par fâ cognossi ator la cause basche e la lote cuintri dal franchisim che al jere daûr a cjapâ il podê.
Marco Stolfo
E. Molinelli, ‘Euzkadi. La nazionale della libertà. LA storia mai raccontata della selezione basca di calcio: una squadra antifascista, Hellnation, Rome, 2016.
________________________________
Goulamas’k, musiche ocitane resistente
Musiche ocitane fuarte e resistente. E je chê che zaromai di disevot agns a sunin e a cjantin i Goulamas’k, formazion de regjon de Lengadoc che dal 1999 e messede cun snait e cun sentiment rock, folk, punk e ska e tescj che a palesin une clare cussience sociâl e identitarie. Ae fin dal an passât la band di Puègserguièr e à dât fûr un gnûf album, che al conferme ad implen lis sôs carateristichis di fonde, a tacâ dal titul: ‘Resisténcia’. In dut a son vot cjançons: a son ancje tocs par francês, par spagnûl e cun alc di catalan, ma la plui part a son par ocitan, a tacâ di ‘Voli Volar’, cul so biel tîr ska-core, di ‘Miseria’ e dal toc che i da il titul ae racuelte, cuntune ande in chel istès epiche e lizere. Infos: www.goulamas-k.com
Marco Stolfo
Goulamas’k, ‘Resisténcia‘, cd GK prod 2016.