Bojan Brezigar,
I giorni della Catalogna,
Qudulibri, Bologna, 2018
—
Giovanni Poggeschi,
La Catalogna: dalla nazione storica alla repubblica immaginata,
Editoriale Scientifica, Napoli, 2018
In ocasion dal secont inovâl dal referendum su la indipendence de Catalogne dal 1n di Otubar dal 2017, al pues jessi interessant recuperâ cualchidun dai (pôcs) libris che ator pal Stât talian a frontin la cuistion catalane cun cognossince e cun sintiment. Dongje dal volum di Marco Santopadre, za segnalât timp indaûr, a son almancul altris doi i titui che a meretin di jessi calcolâts.
Il prin al è “I giorni della Catalogna” dal gjornalist e politolic sloven di Nabresine, Bojan Brezigar. E je la version inzornade e voltade par talian dal so instant book in lenghe slovene, jessût juste ae fin di Otubar dal 2017 cul titul “Šest dni v Kataloniji” (I sîs dîs de Catalogne). Un altri libri plen di “sostance” al è “La Catalogna: dalla nazione storica alla repubblica immaginata” di Giovanni Poggeschi, docent di dirit public comparât li de Universitât dal Salent, che in plui ocasions si è interessât di Catalogne e di Stât spagnûl e al fronte la cuistion catalane cuntune impostazion multidissiplinâr, tra storie, politiche e dirit. ❚
Marco Stolfo