Andrea Miccichè, La Sicilia degli anni Cinquanta. Il decennio dell’autonomia, Franco Angeli, Milano, 2017
La Sicilie, pes competencis e pes risorsis economichis e finanziariis che e à a disposizion, e ven calcolade tant che la Regjon autonome “plui autonome” dal Stât talian. Cun di plui, zaromai di tant timp, chê siciliane e je la autonomie preferide di chei che a son cuintri di cualsisedi forme di autoguvier teritoriâl diferenziât, stant che, par vie di straçariis e clientelisim, a àn plui di un motîf par definî chê (e cun chê, dutis chês altris) un “privileç” che al fâs dome che dams.
Tai agns Cincuante dal secul stât, ancje se no mancjavin lis contradizions, la situazion e jere une vore diferente. Lu sclarìs in maniere atente e documentade il storic de Universitât di Enna Andrea Miccichè, che tal so libri, saltât fûr ae fin dal 2017, al da cont de esistence, in chei timps, al guvier e ae oposizion, di une classe dirigjente che e crodeve pardabon te autonomie tant che imprest par creâ progrès e disvilup. Cuant che la Sicilie cul so Statût e jere un model ancje pai bascs, a nord e a sud dai Pireneus. ❚
Marco Stolfo