Un biel disc di scoltâ, di cjalâ e di lei. Al è Com un soldat di Claudia Crabuzza, cjantante de L’Alguer/Alghero, che za di un pôcs di agns e met dongje personalitât, vôs, musiche e peraulis par talian, par sart e soredut par catalan algherês, cun risultâts simpri une vore interessants. Dal 2000 intal progjet Chichimeca e vincidore in cubie cun Claudio Gabriel Sanna, de edizion 2012 dal festival “Suns”, vie pai agns e à colaborât cun diviers musiciscj, in Sardegne e inaltrò.
Tal so album solist si pierdisi cun plasê dentri di dîs tocs plens di sostance e di caratar, cun sugjestions pop, lidrîs rock, influencis folk e tension poetiche. Al tache cun Repic e che si siere cun Arena i sal marí chest viaç inmagant e scalembri, che al tocje il cûr, lis orelis e il cerviel cu la intensitât di cjançons tant che Mare antiga e che al cjape dentri ancje un omaç a Frida Kahlo, un ricuart di Lhasa de Sela e un adatament di un toc di Bianca d’Aponte.
Un lavôr biel ancje te grafiche e che tai “credits” al dopre il catalan in chê maniere normâl aromai un tic dismenteade, pe lenghe furlane, di bande dai musiciscj nostrans. Par contats e informazions: www.claudiacrabuzza.it.
Claudia Crabuzza, Com un soldat, cd Microscopi, 2016. ❚
Marco Stolfo