NO PAR FURLAN… MA BOGNS. Senjam Beneške Piesmi Senjam Beneške Piesmi, musiche slovene zovine e fuarte | Bombis di comunicazion e vueris di propagande

Senjam Beneške Piesmi Senjam Beneške Piesmi, musiche slovene zovine e fuarte
Sabide ai 5 e domenie ai 6 di Novembar a Liesse di Grimac/Grmak si à davuelte la edizion trentesime seconde dal “Senjam Beneške Piesmi”, il festival de cjançon des Valadis dal Nadison che al clame dongje autôrs, compositôrs, cjantants e musiciscj di dute la minorance slovene dal teritori de provincie di Udin. La manifestazion, inmaneade de bande dal circul culturâl Rečan Aldo Klodič, e je compagnade de realizazion di un cd che al met adun ducj i tocs presentâts tal festival. Il disc al è za saltât fûr e al ten dongje disenûf cjançons. E je la ocasion par scoltâ formazions che a àn za une cierte innomine a nivel locâl, tant che BK Evolution, Sons of a Gun e The Preklets, e altris grups e soliscj, la plui part di lôr pardabon zovins.
De cjançon vincidore dal Festival, “Okus po mahu”, cuntun biel tîr pop-rock, a chê che e vierç la compilation, “Stari Partizan”, che e misclice folk, rock e une ande reggae, fintremai ae ruspiose “Kružic”, che e siere il cd, al è un campionari interessant di sunôrs e ritmis, tra cjançon di autôr, melodiis pop, indierock e riferiments ae tradizion e al stîl dai fradis Avsenik.
AA.VV, “XXXII Senjam Beneške Piesmi”, cd 2016. ❚
____________________________
Bombis di comunicazion e vueris di propagande
I conflits dal dì di vuê a vegnin simpri plui mediatizâts. Cussì, tra media vecjos e gnûfs, lis rapresentazions e lis descrizions de realtât a cjapin il puest de realtât stesse, tra propagande di vuere e e vueris di propagande.
Il libri “Guerre di propaganda”, par cure di Claudio Melchior e Antonella Pocecco, sociolics de Universitât dal Friûl, al fronte propit i contats, i confronts e salacor ancje i scuintris tra informazion, comunicazion e conflits armâts. Chescj argoments a vegnin frontâts di gjornaliscj de stampe, de radio e de television, tant che – par esempli – Barbara Gruden, Gad Lerner e Fausto Biloslavo, di fotografs tant che Alberto Alpozzi e Giulio Magnifico, di esperts di cuistions strategjichis e militârs tant che Gianandrea Gaiani e di ricercjadôrs tant che Paolo Parmeggiani e i doi curadôrs dal volum.
Claudio Melchior e Antonella Pocecco, “Guerra di propaganda”, Forum, Udin, 2016. ❚
par cure di Marco Stolfo