Mandi nono!
Mandi frute! Ce stâstu cjalant?
Un program di politiche, nono. A barufin come simpri.
Eh sì, frute. E je la robe che a san fâ miôr. Barufâ al è plui facil che mandâ indevant un paîs. E su ce barufino vuê?
Su la flat tax!
La flât ce?
Tax, nono. Al vûl dî…
Ah. Cheste le sai: tax e je une tasse. No ur bastave di robânus bêçs par talian: si son inventâts di robânusai ancje par forest. Ma no mi frein!
Brâf, nono!
Ma parcè “flât”? Vere che nus fasin paiâ ancje l’aiar che o respirìn, ma o crodevi che al fos dome un mût di dî.
Ma no, nono…
Ma tassino il flât a ducj? O dome a chei che lu àn pesant? Se un al mangje in blanc isal esonerât? E se al guste cun broade e muset, aial di paiâ?
Ma no…
E cemût fasino a controlâ? Àno machinaris tant che l’etilometri, dome che invezit di misurâ il vin a misurin la puce?
Nono…
Ti fermino par strade, àno organizât patuliis di pueste? Sigûr si metin dongje dal confin cu la Jugoslavie, par becâ chei che a van a mangjâ cevapcici!
Scoltimi…
A àn ancje reson! No ise miôr une biele luianie, cence dut chel ai e chê cevole che i metin dentri i slâfs?
Nono, lassimi fevelâ! No si clame flât tax, ma flat tax. Flat par inglês al vûl dî plat, uniformi, dut compagn.
Duncje a tassin il flât a ducj? Che lu vedin bon o trist, nol cambie nuie?
No, nono, il flât no jentre nuie! Scoltimi ben: “flat tax” e je une tasse cuntune percentuâl compagne par ducj, cence alicuote. Le àn proponude chei dal gnûf guvier.
Ce vuelial dî? Che jo o paiarès la stesse percentuâl di un che al vuadagne un milion di francs, come Berlusconi?
Sì, nono, la flat tax e funzione propit cussì.
Ma mi soi pierdût: nol è Berlusconi al guvier, no?
No, nono, ancje se la idee e jere ancje sô.
Ben, chel no mi maravee! E ce percentuâl saressie?
Cualchidun al fevele dal 15%, ma no si metin dacuardi. E dopo no son sigûrs di fâle propit “flat”: forsit le fasin cun dôs alicuotis.
No mi maravee nancje chel: politics che no son propit politics che a fasin une flat tax che no je propit flat! Al sarès stât miôr meti une tasse sul flât: il lôr, però! Magari a varessin berghelât un pôc di mancul e fat alc di plui di sest! ❚
Bete di Spere