Novembar: riflessions sui nestris muarts

Une volte, cuant che o jeri canai, il mês di Novembar al jere il mês dai Muarts. Al començave il prin cu la solenitât dai Sants e al continuave tal doman cu la comemorazion di ducj i defonts. Lis celebrazions religjosis solenis, lis tradizions, lis processions e daspò chel sunâ des cjampanis par dute la gnot ti cjolevin il flât e ti devin un sgrisul tal cuarp. Gnot di incuintris di muarts e di vîfs, intant che i nestris defonts a tornavin ognidun te sô cjase a distudâ la lôr sêt di presince e di afiets cu la aghe parecjade tai seglots e il cop par bevi. Il sacri e trement misteri di chês zornadis e gnot al è ben rivivût te poesie di pre Antoni Beline “La gnot dai Sants”.
◆ Dut chest al è cumò lât a mont, e se il ricuart al mene une ponte di nostalgjie te int cui cjavei blancs, lis gnovis gjenerazions che a navighin in Facebook e Twitter, in X e in Tik Tok dut chest nancje no san ce che al è. A restin l’Infier, Purgatori, Paradîs dal massim poete, Dante Alighieri, ma a son aromai plui leterature che religjon. Mi diseve un om: “L’infier al è za in chest mont, e tal mont di là al è dome il paradîs dai farcs”.
◆ I vecjos te lôr sapience nus àn lassade une grande benedizion: il cimitieri, la cjase di ducj, il lûc des memoriis, de riflession coletive, dal cidinôr li che ognidun, vaìnt il so muart, al rivîf la storie di dut il paîs e al done une lagrime a ogni defont. E dîs la sapience popolâr: la civiltât di un popul si le viôt ancje sul cemût che a son tignudis lis tombis tai cimitieris.
◆ Dut chest al sta scomparint parcè che il principi dominant di vuê nol è plui la persone in relazion a une comunitât concrete, ma la libertât individuâl de proprie sielte: come che o ai dirit di sielzi la mê vite, cussì o ai dirit di decidi circostancis e lûc de mê muart. La muart e sta jentrant te “privacy”, e chest, ducj lu capìn, nol è progrès ma regrès. I grancj events de vite a son masse impegnatîfs, a passin lis nestris fuarcis, a àn dibisugne de famee, dai amîs, di relazions, di un paîs.
◆ Che al sedi come che al sedi, o podìn sierâ i cimitieris e cancelâ la zornade dai defonts, ma la muart si presente vuê plui di simpri denant di noaltris, e nus terorize tes imagjins dai camions militârs cu lis cassis di muart dal Covid-19, dai ecidis di Bucha in Ucraine, dai gjenocidis di Hamas, dai glotûts vîfs tal Mediterani, dai feminicidis e infortunis, de zoventût che e comence la gnot sunant e balant, e le finìs a buinore tor di un guardrail.
◆ Chestis fantasimis che la television nus presente, chescj bombardaments psicologjics nus strissinin cence savê bande cuistions eternis: “Ce sens aie la vite se e finìs inte muart? La muart, ise conclusion o passaç?”.
Lis rispuestis a son tantis, daûr des culturis. Si pues partî di Eraclit, tal secul IV p.d.C., e passâ fra i grancj pensadôrs di ogni timp fin al post teisim-dopo Diu di vuê, ma dal “aial sens vivi par murî?” no si salte fûr.
◆ Personalmentri, par cjatâ une spere di lûs, no cîr lis rispuestis te filosofie o te sience: o cjapi il troi li che la int e cjamine puartant ognidun la sô crôs tal amôr e tal dolôr.
La muart no je prime di dut un probleme filosofic ma un fat esistenziâl che al tocje ognidun di nô, parcè che ducj o vin di murî, puartant cun nô gjondis e afiets cence fin, grandis sconfitis ma ancje domandis di une justizie che chest mont, tes disparitâts, freadis e pachis cjapadis, nus à dineât.
◆ Mi diseve un om: “O ven di râr a messe, e a messe o spieti dome chês peraulis che il predi al dîs: ‘Ricuarditi Signôr dai nestri muarts’. Li mi ven ancjemò la sperance di tornâ a cjatâ la mê femine e di continuâ a vivi cun jê.”
Jo o resti cun Dostojeski cuant che al dîs: “E scuen jessi la vite eterne, parcè che Diu nol pues cometi la inicuitât di distudâ chel fûc di amôr che al art dentri di nô”. Dutis lis religjons a son dacuardi cun Jesù di Nazaret in chês peraulis: “O soi jessût di Diu e o soi vignût in chest mont; cumò o lassi chest mont e o torni a Diu”.
◆ Vite eterne: ilusion o realtât? Pal filosofâ e pues jessi ancje ilusion, ma la sapience dal cûr e bat pe realtât. ❚