Interviste cun Pauli Cantarut, vôs storiche di Onde Furlane e motôr di tantis des iniziativis culturâls in lenghe furlane plui inovativis dai ultims agns
Pauli Cantarut, classe 1960, al è une des vôs storichis di Radio Onde Furlane e motôr e curadôr di tantis iniziativis editoriâls e musicâls in lenghe furlane. Tra lis plui impuartantis «Usmis», la riviste che e à dât un snait gnûf ae culture furlane par argoments e tratament, la riviste leterarie «La Comugne» (pal editôr KappaVu), il Premi Friûl, che par tancj agns e à scuviert e fat cressi tantis bands furlanis e la golaine musicâl Musiche Furlane Fuarte. Par cualchi an, tai prins agns ’90, al è stât grafic e responsabil propit dal nestri mensîl: «Al è cussì che o ai tacât a jentrâ a Onde Furlane, parcè che al jere li che si faseve la Patrie».
_
Pauli, cuant ise stade la prime volte che tu sês jentrât a Onde Furlane?
Mi visi ben, une sabide dopomisdì dal 1985. La sede e jere ancjemò in plaçâl Cella, al setim plan dal condomini plui alt di Udin. O fasevi part di un grup di economie sociâl de Basse cun sede a San Zorç, e o jerin stâts invidâts di Fidrì dai Ros, che in chel moment al jere il diretôr de radio, par fâ une trasmission su chei temis. _
_
Cognossevistu la radio? Vevistu za fat alc par furlan te tô ativitât di volontariât?
O vevi sintût fevelâ, le vevi scoltade, ma no le cognossevi ben. No vevi mai fat alc par furlan in maniere specifiche: jo o fasevi la mê ativitât ma no mi jeri mai metût il probleme di fâ alc in lenghe furlane ni mi jeri mai impegnât in chest setôr e nancje no mi jeri mai cjatât cun cualchidun che si ocupàs de lenghe furlane.
_
Però tu fevelavis furlan tal to ambient…
Sì, a Cjasteons o ai simpri fevelât furlan in maniere naturâl, cun ducj e par dut il paîs. Ancje cumò, che o soi a stâ ancjemò li, cuant che o voi fûr e o cjati cualchidun la prime peraule e je simpri par furlan.
_
Daspò des primis esperiencis sburtadis de cussience ambientaliste, ce ti aial puartât a une cussience ancje furlaniste?
Mi soi rindût cont che ancje la lenghe e une culture e puedin jessi associadis al concet di organisim biologjic a risi, e duncje o ai seguît la stesse ispirazion ancje par chescj. L’ispiradôr di chel grup ecologjist che o fasevi part al jere Murray Bookchin, filosof ambientalist american. Lui, in struc, al diseve che pe soluzion de crisi ecologjiche e covente une trasformazion de societât. Al pensave che al coventàs partî des comunitâts organizadis cun democrazie direte, cuntune economie solidarie e ecologjiche e su la emancipazion des feminis.
Si pues dî che al è stât un anticipadôr des politichis pal ambient di vuê, ancje se cumò a son frontadis cu la logjiche dai podês che a guviernin il mont. Bookchin cumò al è avonde smenteât, i siei insegnaments a son sperimentâts a Kobane, tal Rojava e in dut il Kurdistan de «Union des Comunitâts dal Kurdistan» che a stan cirint di inmaneâ il confederalisim democratic, un sisteme politic alternatîf a chel statâl, fondât su ecologjisim, feminisim e democrazie direte.
_
Cui ti aial trasmetût o informât di plui su storie e culture furlanis?
Mi ven iniment Marc Tibaldi, che al jere cun me tal grup ambientalist di Sant Zorç e che fra l’altri al è stât diretôr de «La Patrie dal Friûl» par cualchi timp. Lui al leieve e al studiave cetant plui di me, che o soi plui un om di azion che di leturis, e duncje mi trasmeteve dutis chês robis. Ma plui di dut, la cussience “furlaniste” le ai supade lavorant, no leìnt. Chest fin dai timps di «Usmis», cun coleghis tant che Donato Toffoli che al contave di Achille Tellini e Felix Marchi (fondadôr dal nestri mensîl, ndr), o rivant a contat cun personaçs tant che Sergio Cecotti, famose la sô interviste tant che benandant su «Usmis», Silvana Fachin Schiavi, Franc Fari…
_
Un personaç in particolâr dal ambient?
Un incuintri impuartant lu ai vût simpri par vie dal lavôr, cuant che o jeri responsabil editoriâl e grafic di «La Patrie dal Friûl». O fasevin lis riunion di redazion cun pre Toni Beline che al jere il diretôr: cun lui ogni riunion e jere une lezion di storie, culture, vite. Al faseve citazions di int e oparis, batudis sauridis, e massime al veve une sinceritât inteletuâl e un rigôr che a varessin di jessi un esempli simpri. Mi visarai simpri di chês riunion di redazion li che si dialogave e si resonave. No vuei dismenteâ i altris predis che dispès a jerin presints tant che pre Tonin Cjapielâr e pre Roman Michelot. E dopo personaçs che a àn fat culture e impegn furlanist tant che Gianni Gubiani, che al à fat ancje lui il diretôr par un periodi, o Adrian Cescje, o Fidrì dai Ros, altri diretôr vie pai agns.
_
A proposit di musiche, disimi une figure che e à cambiât alc tal panorame furlan.
Mah… No mi plâs cjalâ tant al passât, e stant che a son tancj chei che mi son passâts devant in chescj agns al è dificil nomenâ cualchidun plui di un altri. Mi vegnin iniment i FLK, i Arbe Garbe e i Carnicats par vie che a àn rivât a tirâsi daûr dut un grant moviment di int. Lôr a àn cambiât la percezion de musiche furlane, fasintle rivâ a tante tancj di lôr. Però o pensi ancje che cumò e je une sene che forsit no je mai stade cussì di valôr, un non al pues jessi Massimo Silverio, o Laura Giavon, ma a son tantis lis produzions di gale. Si fasin robis di une cualitât che no je mai stade prime, ma par ironie cumò la musiche no à chel rûl sociâl e chel impat che e veve une volte.
_
Tal cjamp de leterature isal stât cualchi model, par te?
Come che ti disevi, no soi un om di grandis leturis, o pues dîti che o ai let bielis robis di Amedeo Giacomini, par esempli. E o torni a dî che no soi un che al cjale al passât. Par esempli dal lavôr che e fâs la Filologjiche o ai rispiet, ma mi somee la anatomie che si fâs a un cadavar: jo o soi proietât a fâ alc par furlan pal furlan dal futûr, par fâ alc che prime nol jere.
_
Un model, un santul?
Dal sigûr Pier Paolo Pasolini. Al è propit il so snait di rinovâ la culture furlane cun stimui e intuizions gnovis che mi à ispirât e che par me al è simpri valit. Al proponeve une gnove vision de culture furlane in contraposizion aes academiis vecjis e istituzionâls. Un inteletuâl che al jere un critic “insolent”, che al lave a tocjâ i gnerfs sensibii de societât. Une figure che e mancje dal dut in dì di vuê. E al è significatîf par me ancje pe fin che al à fat, parcè che al è stât copât… _
_
Ce intindistu cun “significatîf parcè copât”?
Parcè che al è stât copât l’inteletuâl plui impuartant dal dopovuere, probabilmentri si pues dî copât dal podê, e no si sa ben ancjemò cemût che e je lade. E je une parabule emblematiche de Italie, di chest Paîs plen di podês che lavorin sot vie, li che dut nol è mai clâr fin insom.
__
Un libri o un personaç di riscuvierzi?
Un libri par me rivoluzionari e che si varès di tignî simpri cont di lui al è «Il cjâf dai furlans» di Franc Fari. Il prin libri sientific par furlan. Al è nassût di une schirie di articui scrits par Usmis, po dopo integrâts e completâts in forme di libri. Cuant che al è vignût fûr al à vût sucès, ma nol è citât avonde tant che un classic de leterature furlane, come che al merte. E al merte let di ducj e tornât a lei, che al è restât simpri valit. ❚
…………………………………………………..
FOCUS. Il libri
IL CJÂF DAI FURLANS (Ed. KappaVù, 1999) Franco Fabbro/Franc Fari al è nassût a Puçui intal 1956. Si è laureât in medisine a Padue intal 1982 e specializât in neurologjie a Verone intal 1986. Il so libri «II cjâf dai furlans» al è stât il prin vêr libri sientific scrit par furlan. Il libri al presente, intun lengaç precîs ma comprensibil, i principâi risultâts de neurolinguistiche, une sience zovine (il tiermin Neurolinguistic al è dai agns Cincuante), che e je simpri plui fondamentâl par capî la umanitât. Nassude par studiâ i deficit linguistics che a vignivin fûr par vie di dams celebrâi, la neurolinguistiche cumò e je une sience interdissiplinâr che e studie in gjenerâl i mecanisims che a controlin la comprension, la produzion e la acuisizion dal lengaç tal cerviel.
◆ «Par Franc Fari lis formis culturâls umanis a àn lis lôr lidrîs ultimis te biologjie dal cerviel – l’orghin che al elabore la nestre vision dal mont – e duncje i elements essenziâi de culture furlane a puedin jessi esplicâts, tal lôr disvilup storic e critic, su la fonde de neurologjie» (Sergio Cecotti).
◆ Par Franc Fari il cerviel di ogni popul, e duncje chel dai furlans, al è diviers di chei altris parcè che al ven sculpît dal lengaç e des esperiencis, e al spieghe parcè. ❚
