Interviste a Andrea Valcic, gjornalist di une vite,
cun tantis colaborazions fatis tal setôr de informazion dal Friûl. Al è stât ancje diretôr dal nestri gjornâl
Andrea “Dree” Valcic, classe 1949, nassût a Udin, al è il president de Clape di Culture Patrie dal Friûl che e publiche «La Patrie dal Friûl». Gjornalist di une vite, al è stât diretôr dal mensîl «Il Punto», colaboradôr de riviste «In Vuaite», al à lavorât par agns a Telefriuli e al Gazzettino, e tai ultins timps tant che editorialist dal Messaggero Veneto cu la rubriche «Place Sant Jacum». Al è stât ancje diretôr dal nestri gjornâl.
_
Dree, in ce famee e ambient sêstu cressût di frut?
Gno pari al jere polac, nassût a Leopoli. Polac cuant che al è nassût: la definizion di citadinance e je dificile parcè che al à vivût il moment li che la sô citât e je passade di jessi austroongjarese a polache, russe, todescje, di gnûf russe e cumò ucraine. Di fat al è rivât chenti di dispatriât intal 1943 a Triest. Mê mari e jere furlane, cun vons che a vignivin di Gardiscje e di Cividât. O stavin a Udin e la famee e jere di chês rapresentativis di chei agns, de borghesie piçule, li che a jerin presints ancje i nonos. I miei fra di lôr e fevelavin par furlan, gno pari lu veve imparât subit, ancje par fâ il so lavôr di rapresentant di cumierç. Cun me, però, daûr di chê ande des fameis furlanis tacade cul boom economic e che e va indevant ancje in dì di vuê, a fevelavin par talian.
_
E a Udin fra i tiei amîs si fevelavial furlan?
No, a Udin i zovins e fevelavin par talian. Ma almancul no ai imparât chel “temibil idioma” che al è l’udinês (al rît, ndr). Ancje a scuele, jo o ai fat il classic, il Stellini, no si fevelave.
_
E cuant âstu tacât a fevelâlu?
Tor dai disenûf / vincj agns, cuant che, tal gno periodi “rivoluzionari”, o lavi a fâ ativitât politiche fûr des fabrichis, e se no tu fevelavis par furlan, i operaris no ti cjolevin sù nancje il volantin.
_
Ve, a proposit di politiche e di furlan, jo o vevi gust di intervistâti parcè che il to percors mi somee di un impegn in politiche “tal sisteme talian” e che dopo tu âs vût une sorte di conversion “furlaniste”. Isal cussì?
No, e je une impression falade: jo o ai tacât a fâ politiche daûr dal impegn par vê une universitât furlane. E pense che jo o soi stât un dai fondadôrs dal Moviment Friûl e dal so moviment di zovins. In chei agns o ai tacât a vê cussience che i furlans a jerin considerâts di serie B e al coventave un riscat. Chest in gracie di gno nono, il gno prin mestri di chel pont di viste. No mi impensi di ce che si fevelave, o jerin in taule, e a un ciert pont mi à cjalât tai voi e mi à dit «Visiti simpri che il furlan al è une lenghe». Un ricuart indelebil.
_
Però dopo tu ti sês ocupât di politiche “taliane”, no furlaniste…
Vere. Al è stât un erôr strategjic di chel moment, o sin stâts cjapâts di une vision che e someave plui globâl. La “onde” dal moment, la idee dai inteletuâi, e jere che ciertis bataiis a jerin une robe provinciâl e localistiche. Robe che par esempli no je stade cussì in Catalogne e tal Paîs Basc.
_
E ce ti aial tornât a puartâ a un impegn furlanist?
A son stâts doi passaçs fondamentâi. Jo a un ciert pont o ai decidût di molâ la scuele e di impegnâmi a “realizâ la rivoluzion”. La mê vite e jere dedicade a creâ lis cundizions pe rivoluzion, che in chê volte o crodevi che e podès vignî. Cul timp mi soi rindût cont che no jere une robe pussibile, une sorte di “libri dai siums”. La seconde tape fondamentâl e je stade il taramot. Par scuasit ducj chei de mê aree politiche di chenti al è stât jentrâ intune altre concezion dal mont: l’incuintri cui predis di Glesie Furlane, cu lis comunitâts de int, cui comitâts dai taramotâts… Il rindisi cont de impuartance dal confront, che no tu âs tu la veretât inte sachete, ma che ogni decision che dopo e je destinade a funzionâ e ven fûr di une comunitât di ideis. E lant daûr di chestis esperiencis o ai cjatât chel che par me al è stât un grant mestri “politic”: Sergio Salvi, toscan, l’autôr dal libri “Le lingue tagliate” e di “Nazioni senza stato”, li che si fevelave des minorancis in Italie intun mût che nol jere mai stât prime.
_
Ti sêstu cjatât cun lui tant che letôr, o ancje di persone?
Prime leìntlu e dopo di persone. Dopo dal taramot in gracie di incuintris che si organizavin e in gracie de riviste “In Vuaite”, che si à di dâi merit a Mauro Tosoni par vêle inmaneade. Si invidavin personis par fevelâ di autonomie, o vin tacât a “slargjade la tende”. Fra di chei, Sergio Salvi e Aureli Argemì a son stâts chei che nus àn viert lis puartis bande chei altris popui in Europe.
_
Aureli Argemì, il segretari dal abât di Monserrat…
Aureli, che nus à lassâts chest an, al jere il segretari dal abât di Montserrat Aureli Maria Escarré che al fo esiliât di Franco. Prime a Milan, e dopo de muart dal abât al è lât a stâ te badie di Cuixà, te Catalogne francese. Aureli nus à viert i voi sui dirits dai popui europeans: a Cuixà si davuelzeve un incuintri internazionâl ogni an fra membris des minorancis europeanis. Une robe che no si fâs plui. Tancj zovins si formavin li. Un di chei al è stât Puigdemont, il leader catalan.
_
A nivel politic, ce figuris ti sono restadis iniment tai agns?
Dôs personis e esperiencis che di lôr no si fevele plui, a dimostrazion che i furlaniscj e la intellighenzia di çampe a studiin pôc e che si fasarès ben a tornâ a studiâ. Un al è Connolly cu la cuistion irlandese e la classe operarie, e chel altri al è Otto Bauer e l’austromarxisim.
_
Al liceu tu vevis di insegnant pre Checo Placerean…
Mi à dât la dimostrazion che e pues esisti une altre storie e che al è impuartant resonâ cul nestri cjâf. Lui al jere un conservadôr, rispiet aes mês ideis, ma une vore viert. Une volte, a scuele, i ai domandât ce che al pensave des manifestazions che o fasevin, mi disè «Tu ti rindarâs cont che us stan doprant, ma o sês zovins, e alore o fasês ben a fâ la vuestre strade». Pense un pôc.
_
E un inteletuâl furlan impuartant par te?
Gilberto Pressacco e il so «Forum di Aquilee», une socie che e veve la premesse di vê une vision strategjiche pal popul furlan. O soi convint che o vin di decidi ce rûl che al à di vê il popul furlan te storie, se no o sin destinâts a sparî, a deventâ une altre robe. Tirâ fûr de nestre storie i elements par determinâ l’avignî. In particolâr, propit de storie di Aquilee che, se si va a viodi, cumò e je plui atuâl che mai. Invezit dispès dal pont di viste politic o vin resonât come talians.
_
O sai che tu âs il balin de storie furlane, saressial alore plui impuartant insegnâ chê, che no la lenghe? Ise cualchi figure di storic che ti à colpît in particolâr?
Tant che libri di storie, i inteletuâi ti disaran «I senza storia» di Maniacco, un libri impuartant e biel, ma che al à une vision di part. Secont me invezit e je impuartante la opare che al sta fasint Walter Tomada, cui libris su la storie dal Friûl. Al partìs di une vision furlaniste, ma nol è dogmatic, l’erôr di Maniacco: al da i elements par podê lei la storie in maniere diferente.
_
In leterature isal alc in particolâr che ti à restât?
Dal sigûr Pasolini, ma plui che poesie, cine e libris, i scrits che al faseve a man par fâ critiche politiche che al tacave sot de loze di Sant Zuan di Cjasarse; lui dute la comunicazion politiche le faseve par furlan. Doprâ la lenghe furlane par rivâ miôr al popul. Po dopo mi visi di un test che mi impressionà di zovin, a 15 o 16 agns: «I fuochi sulle colline» di Luigi Candoni. Nol jere par furlan, ma al veve une vision dai furlans une vore vive.
_
E cualchi esperience o moviment culturâl impuartant?
Par me une robe impuartante e je stade il fenomen de musiche furlane tai agns ‘90: i Mitili FLK, i Zûf de Zur… E il rûl tai agns da «La Patrie dal Friûl»: nol è un sfuei che al rive a jessi cussì popolâr, però e je une bandiere che i da tant fastidi ai antifurlans. E ancje Onde Furlane.
__
Ultime domande, un autôr o opare che par te al varès di jessi valutât di plui.
Prin ti fâs il non di une esperience che no je stade valutade avonde: il «Forum di Aquileia» che si diseve prime. Po dopo «I FRIULANI. Storia, ambiente, tradizioni» (ed. Ribis) di Natalia Archipovna Krasnovskaja: un libri par talian di une autore russe, ma che e à savût descrivi pardabon ben il popul furlan e la sô storie. Di ultin, «El scuviarzimi furlan» di pre Guido Maghet: leiêtlu!
…………………………………………………..
FOCUS. Il personaç
Otto Bauer (Viene, 1881 – Parîs,1938)
Al studià te Universitât di Viene, laureantsi in leç intal 1906. Al è stât il leader assolût de socialdemocrazie austriache. Dopo il svolt autoritari dal 1934 in Austrie al lassà il Paîs, fissantsi prime in Cecoslovachie, a Brno, e dopo a Parîs. Al fo de corint politiche dal austromarxisim, che al sosten tant che principi la autonomie nazionâl culturâl, teme disvilupât di Bauer inte opare «La cuistion des nazionalitâts e la socialdemocrazie».
