Daniele Puntel, comerciant, 52 agns di Udin («anzit, dai Riçs!» i ten a marcâ, ndr) al è l’autôr de pagjine Facebook “Selezion di balon dal Friûl/Selezione di calcio del Friuli”. Al sta sburtant par tirâ dongje une scuadre di balon in rapresentance dai furlans, «par comunicâ e par dâi sens di partignince a un popul». Sul esempli di chê de Catalogne che, ancje se pe Fifa no je buine, e zuie partidis cun selezions ricognossudis de federazion internazionâl. La ultime partide fate de selezion catalane, ai 26 di Mai di chest an, e je stade cuintri de Gjamaiche. Catalogne-Gjamaiche 6 a 0 cun trê goi di Gerard Deulofeu, che al zuie pal Udin.
––
Daniele, cemût mai ti sêstu impegnât te iniziative di meti sù une selezion di balon furlane?
O soi un apassionât di balon, che o ai zuiât par agns. E ancje dal Friûl, de nestre lenghe, dal nestri popul. No vin nuie di mancul di altris popui e duncje o pensi che o podìn vê une nestre rapresentance in chest sport che al è tant seguît in dut il mont.
__
Cumò o stin fevelant par furlan, ma di piçul no tu lu fevelavis: tu lu âs recuperât dopo, ise vere?
Sì, in famee i miei gjenitôrs lu fevelavin fra di lôr e cui nonos ma, come al è sucedût a tancj de mê gjenerazion, no lu fevelavin ai fîs. E cussì o ai imparât a fevelâlu dopo, bessôl, massime sui cjamps di balon li che o ai zuiât par agns e dulà che ancjemò la lenghe uficiâl, in Friûl, al è il furlan. Duncje si pues dî che cun cheste iniziative o torni indaûr chel che il balon furlan mi à dât.
__
Spieghinus il prin obietîf de tô iniziative: cuintri cui varessino di zuiâ?
L’obietîf plui fatibil al è l’Europeada 2024, torneu di balon des minorancis linguistichis europeanis organizât dal Fuen, Federal Union of European Nationalities, une organizazion internazionâl no governative fondade tal 1949 in concomitance cul Consei de Europe. Il percors al sarà dûr e plen di ostacui, ma o sin sigûrs che cun pazience o rivarìn a jessi ricognossûts de Figc e legjitimâs a rapresentâ la nestre Patrie. O ai vût la fortune di seguî Europeada 2022 organizade in mût perfet in Carinzie de minorance slovene. Une fieste dai popui, li che il balon al è dome un mieç par comunicâ identitât di popul, lenghe, culture, turisim e vie discorint. La nestre volontât e je chê di jessi presints tal 2024, ancje graciis aes peraulis dal president Uefa Ceferin, che al sdogane chestis manifestazions.
__
La Catalogne no je in chest torneu, al somee che e zui a nivel plui alt. Di cui ise ricognossude?
La selezion catalane e volarès jentrâ te federazion plui impuartante pal balon che e je apont la Fifa (la federazion che e met dongje lis scuadris di balon dai stâts dal mont), e duncje lôr a zuin dome cun chês scuadris li. No i interesse jentrâ in altris federazions plui piçulis. La Catalogne no je un stât ricognossût, ma dentri de Fifa e je ancje la Scozie – par esempli – che no je un stât, e duncje lôr a pontin a jessi ricognossûts tant che i scozês.
__
Parcè la Catalogne puedie zuiâ cuintri altris scuadris che a son dentri de Fifa?
La Fifa i da il permès aes sôs scuadris afiliadis di fâ dôs amichevulis ad an cuintri di scuadris che no son te federazion. Duncje la Catalogne e sfrute cheste regule.
__
Parcè la scuadre dal Friûl le âstu clamade “selezion dal Friûl” e no “nazionâl”?
“Nazionâl” no je une definizion corete, che e ven dal secul passât: nancje la Italie no je une nazion, parcè che par nazion si intint un teritori gjeografic cuntune stesse aministrazion e une stesse lenghe. Invezit in Italie a son talians che a son citadins talians ma no di marilenghe taliane, par esempli che a fevelin di prime lenghe todesc e sloven. Par no dî di nô furlans o dai sarts, lenghis autoctonis de aree dal Stât talian ma altris lenghis rispiet al talian. E cussì il Friûl, li che a son furlans che si sintin furlans ma di lenghe venete, todescje e slave. Tra l’altri, il tiermin “nazionâl” lu dopre la Italie e cualchi altri stât, ma par esempli in Sudameriche la scuadre dal paîs si clame “selezion”: pensìn ae Seleçao brasiliane o ae Seleccion argjentine. In sumis, o sin plui corets e internazionâi des definizions talianis (al rît, ndr). Ancje la Catalogne si clame Selecciò Catalana.
__
O sin sul imprin di un percors lunc, mi pâr di capî. Par cumò ce riscuintris âstu vût?
O ai ricevût l’interès di cualchi politic autonomist furlan, di plui di cualchi sindic e president di scuadris furlanis, e ancje cualchi orele spiçade di bande de Figc regjonâl. E ancje di bande di cualchi associazion: par partecipâ ae Europeada al covente che une associazion si iscrivi al Fuen, che al coste 3.000 euros ad an, duncje si à di cjatânt une disponibile. Chest al è il prossim obietîf.
__
Su la pagjine Facebook tu publichis tantis notiziis interessantis di altris comunitâts vie pal mont che a doprin il balon tant che element par tignîsi dongje…
Sì, chest percors al è biel ancje parcè che al à coventât a cognossi tantis realtâts di comunitâts piçulis che si tegnin dongje ancje midiant dal balon. Par esempli, il campionât plui piçul dal mont de Isulis Scilly, o la Milne Cup che si zuie di 104 agns, che e je la fra lis isulis Orcadi e lis Shetlands, une grande ocasion par fâ incuintrâ chês popolazions cussì lontanis de Europe e di une a chê altre.
__
Par finî, ti domandi la tô selezion furlane ideâl, fate di professioniscj che a zuin cumò. E ancje il “ct”…
Ognidun al varà la sô, che o sin ducj alenadôrs ancje in Friûl (al rît, ndr). La mê e je cheste: Meret; Petriccione, Berra, Cristante, Calderoni; Pontisso, Crisetig, Compagnon; Fabbro, Diaw, Cudrig. Alenadôr: Gigi Del Neri.
__
No sin tant ben metûts, mi pâr.
Cualchi an fa o jerin plui fuarts, però si à di dî une robe: se o podessin meti in scuadre dome portîrs o faressin un scuadron. Meret, Vicario, Provedel, Perisan, Scuffet, Gasparini, Franchi… ❚
::::::::::::::::::::::::::::::::::::::::::::::::::::::::::::::::::::::::::::::::::::
FOCUS. Il campionât di balon plui piçul dal mont
Al esist un campionât di balon cun dôs copis nazionâls e une charity cup contindûts di dome dôs scuadris. Al sucêt intun dai cjantons plui lontans dal Ream Unît: lis Isulis Scilly (Ynysek Syllan in lenghe kornish, lenghe che vuê nol à plui fevelants natîfs).
◆ Lis Scilly Island a son un arcipelac cuntune popolazion di mancul di 3.000 personis logât intal pont plui ocidentâl de Cornie. Lis isulis però no fasin part di cheste regjon parcè che a gjoldin di un status autonom cun podê decisionâl su lis cuistions locâls. Tante part des isulis e je disabitade e la popolazion si concentre in 5 parochiis, cun chê di St. Marys a fâ di sburt par dutis.
◆ Un puest cun paisaçs che no si puedin dismenteâ, ma dulà che la vite e je dificile, massime di Invier. La stagjon estive e puarte il lavôr stagjonâl e il turisim, ma finide la biele stagjon, a restin i isolans, bessôi cuintri des intemperiis. Duncje al è impuartant tignî dongje la comunitât cun rituâi e events in comun, e il sport al è un di chescj.
◆ Il balon intes Scilly al nas intai agns 20 dal Nûfcent cun scuadris che si contindin la cope Inter-Island, che e à durât fin ai agns ’60. I cambiaments demografics a àn puartât a fâ sorevivi dome 2 scuadris, Gunners and Wanderers, dutis dôs di St. Marys.
◆ Intal 2004 e nassè la idee dal campionât plui piçul dal mont e des copis nazionâls che e à vût tant sucès di deventâ famose in dut il mont. La robe e dismovè ancje l’interès de Adidas che e à vût zirât un piçul documentari dal titul Dream Big sul balon intes Scilly, e a rivarin su lis isulis testimonials tant che il cjapitani de Ingletiere Steven Gerrard, David Beckham e tancj altris.
◆ Il campionât si zuie la domenie aes 10:30, ogni setemane, par vignî incuintri aes esigjencis di ducj i zuiadôrs di balon – lavoradôrs – paris di famee. Sul tacâ de stagjon, i cjapitanis si metin ae taule e a butin jù i garofui, sielzint i zuiadôrs cirint di garantî. Pôcs a son i papabii, cussì la etât dai zuiadôrs e svarie dai 16 ai 40 agns. I arbitris a son doi.
◆ Tancj zuiadôrs a cambiin scuadre ogni an, movintsi di une bande a chê altre de baricade.
◆ Insume: prime il sport che la apartignince ae maie. E parsore di dut, prime lis Isulis Scilly! ❚
::::::::::::::::::::::::::::::::::::::::::::::::::::::::::::::::::::::::::::::::::::
LINK & LEAMS
Par cumò dutis lis informazions su la iniziative di Daniele si cjatin suntune pagjine Facebook, une vore ative cun tantis altris informazions di balon dal Friûl. Lait a cirî Selezion di balon dal Friûl/Selezione di calcio del Friuli. ❚
