Oltri il sun: Paolo Forte e la armoniche come lengaç universâl

Paolo Forte, che za o vin cognossût in chescj agns, ancje midiant des sôs intervistis su la Patrie, al è une figure uniche tal panorame musicâl contemporani: armonicist, compositôr e ricercjadôr dal sun.
◆ La sô cariere e je une celebrazion de art come une esplorazion continue, un viaç che al sfide i confins de tradizion par imerzisi in monts sonôrs ancjemò mai sintûts. Cu la sô musiche, Paolo Fote al invide il public a scuvierzi la bielece de armoniche come strument no dome de tradizion, ma ancje de inovazion. Un dai aspiets plui distintîfs dal lavôr dal artist, oltri ae sô bravure a puartâ la musiche e la tradizion furlane ator pal mont, e je la sô ricercje acustiche, un progjet che lu à puartât a esibîsi in lûcs inusuâi e sugjestîfs.
◆ Dopo vê lavorat in Scozie su regjistrazions ispiradis ai paisaçs naturâi, Paolo al va indenant cu la sô ricercje in Austrie te AKW Zwentendorf, une vecje centrâl nucleâr mai jentrade in funzion. Vuê l’edifici al rapresente un esempli straordenari di “faliment funzionâl”, che al ven doprât come sît di formazion pe sigurece nucleâr, set cinematografic e lûc par events culturâi e artistics. Paolo Forte al esplore il potenziâl acustic di chescj spazis doprant il so strument e trasformant chescj lûcs in vêrs teatris sonôrs.
◆ Chescj progjets a dimostrin la capacitât dal artist di meti dongje la tecniche musicâl cu la vision artistiche che e ten dongje spazi, nature e tecnologjie. Lu àn clamât a presentâ chestis sôs ricercjis ancje dal Fogolâr Furlan di Viene, par un conciert organizât te zornade di Sante Luzie te sede dal Istitût di Culture Taliane de capitâl austriache. Chest conciert al à rapresentât un moment di riflession sul rapuart tra musiche, spazi e risonance, ma ancje une ocasion par presentâ la tradizion furlane in musiche.
◆ Paolo Forte al à publicat diviers albums in chescj ultins agns, che a rapresentin lis tapis fondamentâls dal so percors artistic. Tacant tal 2021 cun “Aga”, une racuelte di tocs de tradizion furlane, rangjâts insiemi cun Emma Montanari e Flavio Bortuzzo. Daspò, tal 2023, al incît doi albums di solist e autoprodusûts: “al Buio“, che e je une racuelte di tocs origjinâi par armoniche, scrits, sunâts e dedicâts al scûr stes, che tal so cidin al permet al artist di esprimisi in dute la sô art. Pôc plui tart, te Sierade dal 2023, al è jessût ancje “Tempo“, un album esperiment di ricercje acustiche dai lûcs, regjistrât intun bunker soterani enormi in Scozie, ricognossût come il lûc cul rivoc plui lunc tal mont. Chescj albums a son a disposizion su lis plateformis digjitâls principâls e a rapresentin une puarte di jentrade perfete par scuvierzi la profonditât artistiche di Paolo Forte.
◆ La dedizion di chest artist pe musiche i à fat concuistâ cetancj ricognossiments in concors internazionâi. Al à partecipat a festivai prestigjôs come il Spring Festival di Spoleto e il Lonato Festival, là che al à inmagât il public cu lis sôs esibizions. Il 2024 lu à viodût protagonist ancje tal Festival di Tramonç Disot, un event che al celebre la musiche come esperience comunitarie e inmagante. Cun di plui, Forte al è ancje atîf come mestri: il progjet “Sementi”, une masterclass pai zovins armoniciscj, al à ufiert ai partecipants la pussibilitât di lavorâ adun cun lui, culminant intun conciert emozionant tal Cuei.
◆ Paolo Forte nol è dome un musiciscj, ma un naratôr dal sun. La sô musiche e cumbine tradizion e inovazion, esplorant temis universâi cuntune sensibilitât rare. I siei concierts no son dome esibizions, ma esperiencis che a coinvolzin il public intune dimension emotive e inteletuâl.
◆ Cul so impegn costant te ricercje e te creazion, Forte al è daûr a ridefinî ce che la armoniche e pues rapresentâ tal mont musicâl. Stait daûr dai siei progjets futûrs midiant dai siei canâi uficiâi (www.paolofisa.it) e lassaitsi ispirâ dal so straordenari viaç artistic. Scuvierzi la musiche di Paolo Forte al significhe jentrâ intun univiers sonôr fuart di emozion e bielece. Scoltait la sô musiche, partecipait ai siei concierts e partecipait aes sôs prossimis esplorazions acustichis par vivi la magjie di un artist bon di trasformâ ogni note intune conte di no podê dismenteâ. ❚