Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.
◆ Tirade dongje la int e soredut lis risorsis finanziariis, e tacà duncje la storie di une gnove formazion, il “Club manduliniscj e ghitariscj udinês”, che si cjatà pe prime volte par fâ provis insiemi ai 9 di Zenâr dal 1886, sot de vuide di un zovin mestri che al veve a pene passât i vincj agns, ven a stâi Giovanni Battista Marzuttini, un non che al varès dade prove des sôs abilitâts no dome intal setôr de musiche, ma ancje ta chel de piture, de poesie e soredut de inzegnarie mecaniche.
◆ A son passâts 137 agns di in chê dì, intune aventure che e à puartât la orchestre a jessi la plui antighe realtât a pletri intal mont inmò in vore.
Un biel travuart, segnât di tancj concierts, premis e colaborazions, ma tocjât ancje di cetantis disfidis, viodûts i mudaments intai gjenars, intai stîi e intai guscj musicâi de ete contemporanie.
◆ Dai prins pas in compagnie di “Tite Grison”, clamât intal 1890 a direzi il circul mandulinistic di Triest, ma restât intal cûr dal club udinês, che dal 1926 al cjaparà il so non, la orchestre e à viodût passâ diviers mestris. Tra i tancj diretôrs, no si pues no ricuardâ Angelo Prenna, che al puartà il circul a cressi in cualitât, repertori e esibizions dal 1951 al 1986, an de muart, rivade propit pôcs mês dopo de fieste pai 100 agns de Marzuttini.
◆ Ore presint, la formazion e je vuidade dal mestri Luca Zuliani, biel che di uns dîs agns il diretôr artistic e prin mandulin, Andrea Miola, al à inviade une gnove sperimentazion cu la “Marzuttini giovani”, ensemble li che si dan dongje i zovins arlêfs dai cors di musiche inmaneâts de orchestre stesse.
◆ Tra i ricognossiments plui impuartants si puedin ricuardâ i premis e lis partecipazions a concors internazionâi (Logroño in Spagne, Falkenstein in Gjermanie, Ala di Trent), cun concierts in dute Italie e tal forest (Austrie, Cravuazie, France, Svuizare).
Intai ultins agns, al è cressût ancje un sens di apartignince che al va di là dai confins udinês, intun bracecuel che al cjape dentri dut il teritori furlan. In gracie di cheste cussience, a son stadis inviadis colaborazions cun altris realtâts, tant che chê cul Comun di Gonârs, li che Marzuttini al à passade buine part de sô vite. E je nassude cussì la idee di vierzi une classe a Favuiis, te scuele CEDIM, cuntune convenzion cu la catidre di mandulin dal conservatori di Padue.
◆ L’entusiasim e la passion stiçâts intai fantats a son dal sigûr une buine cjarte di zuiâsi pal avignî e nus confermin che la orchestre a pletri Tita Marzuttini e varà ancje passât i cent carnevâi, ma e je plui vivarose e zovine che mai, cuntune braùre dute furlane che ancjemò vuê e je in stât di incjantâ il mont.
Pirulis par savê
• Daspò de Unitât di Italie, i struments a pletri a gjolderin di une stagjon di aur. La Regjine Margarite e jere une grande passionade di mandulin, cussì intal 1881 al vignì fondât un Reâl circul manduliniscj che al puartave il so non.
• No cate il stereotip che nus fâs subit pensâ ae citât di Napoli, cuant che si fevele di mandulin, la fortune di chest strument vie pe fin dal Votcent si slargjà soredut intal Nord di Italie. Inte nestre regjon, a nasserin circui a Udin, Triest e Cividât.
• I mandulins no son ducj compagns! Chel napoletan, par esempli, a 8 cuardis, al à une sonoritât diferente rispiet a chel milanês, che al jere plui dificil di sunâ (cumò no si lu dopre plui) e che al fo ancje il model sielzût di Tita Marzuttini. ❚
……………………………………………………………….
Musicist, fotograf, inzegnîr, pitôr e poete
Giovanni Battista Marzuttini, nassût a Udin ai 9 di Fevrâr dal 1863 di une famee abenade, al à vût tant che precetôr il barbe di bande di mari, Carlo Facci, innomenât patriot furlan.
◆ A 13 agns al ven iscrit al Coleç Militâr di Milan, che al mole dopo nancje doi agns pal Istitût Tecnic di Udin, abandonât ancje chel par dedicâsi ae sô grande passion, la piture, inte Academie des Bielis Arts di Florence, che però nol puarte insom.
◆ Intal 1883 al tache il so percors musicâl, sot de vuide di Luigi Cuoghi, e in curt al devente une vore cognossût, tant che intal 1885 al tache a direzi la bande di Tarcint. Si maride cun Maria Troiano, che i darà cinc fruts, ancje se dome doi a rivaran a deventâ grancj.
◆ Intal 1887, dopo che si è disfate la bande di Tarcint, adun cun Nicolò Serafini al da vite al Circul Mandulinistic di Udin, e po dopo a chel di Triest, che al dirêç fin al 1897. Pal editôr musicâl Carlo Schmidl al publiche il famôs “Metodo per mandolino” (1898), voltât in cuatri lenghis, e il “Metodo completo per chitarra” (1913).
◆ Intal 1897, par cuistions economichis, al torne a Udin, dulà che al vent e al comede machinis: al dirêç il Garage delle Grazie, al met adun la Società Garage e cul inzegnîr Carlo Fachini al fonde il Garage friulano, indulà che al lavorarà par passe 20 agns. Intal 1910 al progjete e al costruìs dut di bessôl un avion, che però nol rivarà mai a svolâ. Si dediche ancje ae costruzion di machinis e ae fotografie.
Intal 1914 al met sù une fabriche di zugatui, tant preseade che il re Vittorio Emanuele III i darà une medaie di aur pal “alt nivel artistic e creatîf di cheste ativitât” (1916).
◆ Daspò de disfate di Cjaurêt si trasferìs a Milan, dulà che e je une sucursâl de fabriche di zugatui di Udin, e po dopo a Napoli, par direzi l’implant Ingano e Di Lauro, che al prodûs components par motôrs di aviazion.
Culì i rive la brute gnove de muart dal fi Guido sul front francês inte bataie di Ardre.
◆ Intal 1919 Tite al torne in Friûl, inte tignude di campagne di Favuiis, che e jere restade in pîts. Al larà indevant a piturâ, a fotografâ, a scrivi poesiis cul non di Tite Grison e a componi musiche, in plui di cjapâ la cjarie di Comissari Prefetizi dal Comun di Gonârs intai agns 1919-1920 e di Sindic e Podestât dal 1924 al 1930. Amât dai paisans, il so inzen si distudarà il prin di Dicembar dal 1943. ❚
