Sfuei Mensîl Furlan Indipendent
Archivi de Patrie

Orlando Dipiazza: compositôr e mestri dal Nûfcent musicâl furlan

Alessio Screm
Orlando Dipiazza

Chest an a colin i dîs agns de muart dal compositôr di Dael Orlando Dipiazza, un grant riferiment tal mont de musiche furlane, in particolâr de coralitât, tant inte composizion che inte direzion. Di origjins umilis, prin di fâ il musicist a timp plen al è stât operari intai cantîrs di Monfalcon e dopo impleât tal ufici programazion. La passion pe musiche le à vude fin di piçul, tant che al veve domandât, a dîs agns, di jentrâ inte bande dal paîs, ma al jere stât scartât parcè che il so fisic al jere stât calcolât masse debil. Dut câs, lui al continuave a interessâsi, di bessôl, al so grant amôr, e al scoltave l’orghin e il côr tes messis, cu la voie di imparâ. Al à scrit che «tal 1943, in cjase di parincj, o ai podût meti lis mans suntun pianoforte, scuvierzint che o varès podût svicinâmi ae musiche. Di chel moment, cence la vuide di un insegnant e cence nancje un strument, o ai torzeonât intes cjasis di parincj e di int che o cognossevi par sunâ dutis lis musichis che mi capitavin sot man».
◆ Cul lâ dal timp e cul cressi des sôs competencis, al tire sù un côr a Dael e un a Roncjis di Monfalcon, e a trente agns al decît di svoltâ la sô vite par deventâ musicist professionist. Daûr dal consei di Giorgio Kirschner, mestri tal teatri Verdi di Triest, al va a studiâ cun Bruno Cervenca, stimât mestri di cuintripont polifonic vocâl e insegnant di cjant corâl tal conservatori Tartini di Triest. E, come se nol bastàs, al studie pianoforte cun Maria Puxeddu e cun Giuseppe Radole. Al devente cussì mestri di musiche, al refude diviers invîts par insegnâ intes altis istituzions musicâls, preferint jessi mestri intes scuelis mediis, puartant diviersis novitâts e inovazions tal cjamp de didatiche musicâl.
◆ Al è il moment ancje indulà che al tache a fâ cognossi lis sôs composizions a editôrs come Suvizi-Zerboni, Edizioni Musicali Europee, Pro musica studium, Offerta musicale, Carrara e Pizzicato, par nomenâ i plui impuartants. La sô opare e conte cuasi cinccent composizions, tra oparis par côr, teatrâls, musiche di cjamare, par orchestre, sacre e profane. Tantis sôs scrituris a àn vint concors talians e internazionâi, come a Arezzo, Milan, Rome, o a Tours in France. Al à direzût diviersis corâls: i “Veneziani” di Dael, il “Verdi” di Roncjis di Monfalcon, il “Coro Polifonico di Ruda”, il côr feminîl “Fauré” di Romans dal Lusinç, il côr “Tomadini” di Udin.
◆ Tant e à scrit di lui la riviste furlane Choralia, che e à sburtât par Pizzicato ancje une biele antologjie di musiche corâl sacre dal titul “Florilegium Sacrum”. Al veve un caratar risiervât Orlando Dipiazza, al jere umil e sempliç, ma al jere ancje bon di no mandâlis a dî e di no vê pêi sù pe lenghe, cuant che al coventave. Il so lûc di lavôr al jere essenziâl, come lui: une taule, un pianoforte e pôc altri, in plui des fotografiis di cognossincis che i jerin cjaris: i siei amîs Goffredo Petrassi, Ildebrando Pizzetti e Luigi Dallapiccola. ❚

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +